ޔޫގެންޑާގެ ރެފިއުޖީ ކޭމްޕަށް ހޮނުއަޅައި 13 ކުއްޖަކު މަރުވެއްޖެ

ޔޫގެންޑާގެ ރެފިއުޖީ ކޭމްޕަކަށް ހޮނުއަޅައި 13 ކުޑަކުދިންނާއި ބޮޑު މީހަކު މަރުވެއްޖެ އެވެ. 

އެ ހާދިސާ ހޮނިހިރު ދުވަހު ހިނގީ އެ މީހުން ދީނީ އަޅުކަމެއްގައި ބައިވެރިވުމަށް ދަނިކޮށެވެ. އަދި އިތުރު 34 މީހަކަށް ވަނީ އަނިޔާވެފަ އެވެ.

އެ ހާދިސާ ހިނގާފައިވަނީ އެ ގައުމުގެ ހުޅަނގު އުތުރުގައި އޮންނަ ރެފިއުޖީ ކޭމްޕެެއްގަ އެވެ. އެ ސަރަހައްދަށް ދާދި ފަހުން ވަނީ ގުގުރުމާ އެކު ބޯކޮށް ވާރޭ ވެހިފަ އެވެ.

ޔުގެންޑާ ފުލުހުންގެ ތަރުޖަމާނު ކިޓުއުމާ ރުސޯކޭ ބީބީސީއަށް ވިދާޅުވީ ހޮނިހިރު ދުވަހު މަރުވި މީހާގެ އުމުރަކީ 21 އަހަރު ކަމަށެވެ. ދެން މަރުވި ކުދިންގެ ސީދާ އުމުރެއް ރުސޯކޭ ވިދާޅެއް ނުވެ އެވެ.

އެ ރެފިއުޖީ ބޯހިޔާވަހިކަމަކީ 80،000އަށް ވުރެ ގިނަ ރެފިއުޖީންނާއި ހިމާޔަތް ހޯދާ މީހުން ދިރިއުޅޭ ތަނެއް ކަމަށް އދ.ގެ ރެފިއުޖީ އެޖެންސީން ބުނެ އެވެ. އޭގެ ތެރެއިން ގިނަ މީހުންނަކީ އަވަށްޓެރި ދެކުނު ސޫދާނަށް ނިސްބަތްވާ މީހުންނެވެ.

މީގެ ހަތަރު އަހަރު ކުރިން ޔޫގެންޑާގެ ހުޅަނގު އުތުރުގައި އޮންނަ އަރޫއާ ސިޓީގައި ހޮނުއަޅައިގެން 10 ކުއްޖަކު ވަނީ މަރުވެފަ އެވެ.