ބަދަލު ދިނުމުގެ މަޝްވަރާގެ ވަގުތު ޖެހިއްޖެ ކަމަށް ކޮމަންވެލްތު ލީޑަރުން އެއްބަސްވެއްޖެ

ސަމޯއާގައި ދެ ދުވަހުގެ މުއްދަތަކަށް ކުރިއަށްދާ ކޮމަންވެލްތު ސަމިޓުގައި އެ މައުލޫއު އެޖެންޑާއިން ދުރުކުރަން އިނގިރޭސިވިލާތުން އެދުނު ނަމަވެސް، އަޅުންގެ ވިޔަފާރީގެ ބަދަލު ދިނުމާ ބެހޭ ގޮތުން ވާހަކަ ދައްކަން ޖެހޭ "ވަގުތު އަތުވެއްޖެ" ކަމަށް ކޮމަންވެލްތުގެ ލީޑަރުން އެއްބަސްވެއްޖެ އެވެ.

އިނގިރޭސި ބޮޑުވަޒީރު ކެއިރު ސްޓާމަ ހިމެނޭ ގޮތަށް ސަރުކާރުތަކުގެ 56 އިސްވެރިން ސޮއިކުރައްވައި ނެރުއްވި ލިޔުމެއްގައި ވަނީ އަޅުންގެ ވިޔަފާރީގެ "ބަދަލު ދިނުމާ ބެހޭ ގޮތުން މަޝްވަރާ ކުރުމަށް" ގޮވާލައިފަ އެވެ.

އެ ބަޔާނުގައި ބުނެފައިވަނީ މިއީ "މާނަ ހުރި، ތެދުވެރި އަދި އިހުލާސްތެރި ވާހަކައެއް" ދައްކަންވީ ވަގުތު ކަމަށެވެ.

ކެއިރު ވިދާޅުވީ އެ ބައްދަލުވުމުގައި ފައިސާއާ ބެހޭ ގޮތުން އެއްވެސް ވާހަކައެއް ދެކެވިފައި ނުވާ ކަމަށެވެ. އަދި ބަދަލު ނުދޭނެ ކަމަށް އިނގިރޭސިވިލާތުން ދެކޭ ގޮތް ވަރަށް ސާފު ކަމަށެވެ.

އަޅުންގެ ވިޔަފާރީގައި އިނގިރޭސިވިލާތުން އަދާކުރި ތާރީހީ ދައުރަށް މައާފަށް އެދުމަށާއި ބަދަލު ދިނުމަށް ކޮމަންވެލްތުގެ ލީޑަރުންގެ ފަރާތުން އިނގިރޭސިވިލާތަށް ދަނީ ގޮވާލަމުންނެވެ.

އަޅުވެތިކަމުގެ ސަބަބުން ހާލުގައި ޖެހުނު މީހުންގެ މަންފާއަށް ބަދަލު ދިނުމަކީ މާލީ ގޮތުން ފެށިގެން ރަމްޒީ ގޮތުން އެތައް ސިފަތަކެއް ގެންގުޅެފާނެ ކަމެކެވެ.

ސަމިޓުގެ ކުރިން އިނގިރޭސި ބޮޑުވަޒީރުގެ ގެކޮޅުން ވަނީ އެ މައްސަލަ އެޖެންޑާ ނުކުރާނެ ކަމަށް ބުނެފަ އެވެ.

އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ކެއިރު ވިދާޅުވީ ކޮމަންވެލްތުގެ ލީޑަރުންނަށް ސަމޯއާގައި "ރަނގަޅު ދެ ދުވަހެއް" ދިޔަ ކަމަށެވެ. އަދި އެ ސަމިޓުގައި ބަދަލު ގެނައުމުގެ އިސްކަން ކުޑަކުރެވުނު ކަމަށެވެ.

"މި ދެ ދުވަހުގެ އެންމެ ބޮޑު ޝިއާރަކީ ރެޒިލިއަންސް އާއި މޫސުން،" ބަދަލުދިނުމާ ބެހޭ ގޮތުން މަޝްވަރާކުރާ ގުޅިފައިވާ ބަޔާނުގައި 20އަށް ވުރެ ގިނަ ޕެރެގްރާފު ހިމެނޭ އިރު އެ ވާހަކަ އޮތީ އެންމެ ޕެރެގްރާފްގައިކަން ފާހަގަކުރައްވައި އިނގިރޭސި ބޮޑުވަޒީރު ވިދާޅުވި އެވެ.

"އެއްވެސް ވާހަކައެއްގައި ފައިސާގެ ވާހަކައެއް ނުދައްކާ. އެކަމާ ގުޅިގެން އަޅުގަނޑުމެންގެ ސްޓޭންޑް ވަރަށް ސާފު."

މިދިޔަ ހަފުތާގައި ޗާންސެލާ ރެޗެލް ރީވްސް ބީބީސީއަށް ވިދާޅުވީ އިނގިރޭސިވިލާތުން އަޅުވެތިކަމުގެ ބަދަލު ނުދޭނެ ކަމަށެވެ.

ބަޔާން ނެރުމުގެ ކުރިން ލީޑަރުންގެ އަމިއްލަ ބައްދަލުވުން ގާތްގަނޑަކަށް ހަ ގަޑިއިރަށް ކުރިއަށް ދިޔަ އެވެ. އެ ބައްދަލުވުމަކީ ކޮމަންވެލްތުގެ ބޮޑުވަޒީރުންނާއި ރައީސުން އެޑްވައިޒަރުންނާ ނުލައި ކުރައްވާ ބައްދަލުވުމެވެ.

ބޮޑުވަޒީރު ވިދާޅުވީ ބައްދަލުވުން ދިގުދެމިގެން ދިޔައީ ކޮންމެހެން ބަދަލު ދިނުމާ ބެހޭ ގޮތުން ވާހަކަ ދެއްކުމުގެ ސަބަބުން ނޫން ކަމަށެވެ.

އިނގިރޭސިވިލާތް ފަދަ ގައުމުތަކުން އެ މީހުންގެ ކުރީގެ ކަންކަމާ ކުރިމަތިލާންވީ ވަގުތު އަތުވެއްޖެ ކަމަށް ހީކުރާ މީހުންނަށް، އެ ވާހަކަ ކުރިއަށް ދާ ކަމަށް ބުނުމުގެ ފުރުސަތު އެ ބަޔާނުގައި ވަނީ ދީފަ އެވެ.

ބަހާމާސްގެ ހާރިޖީ ވަޒީރު ފްރެޑްރިކް މިޝެލް ވިދާޅުވީ އަންނަ މާޗު މަހު ލަންޑަނުގައި ބޭއްވުމަށް ހަމަޖެހިފައިވާ ފޯރަމްގައި އެކަމާ ގުޅޭ "ފުރިހަމަ ރިޕޯޓެއް" އެކުލަވާލެވޭނެ ކަމަށް ލީޑަރުން އުއްމީދު ކުރައްވާ ކަމަށެވެ.

ބީބީސީ ރޭޑިއޯ 4ގެ ޓުޑޭ ޕްރޮގްރާމުގައި އޭނާ ވިދާޅުވީ އިނގިރޭސިވިލާތުން އެންމެ ފަހުން ކެރީބިއަން ގައުމުތަކަށް މާލީ ބަދަލު ދޭނެ ކަމަށް އުއްމީދު ކުރައްވާ ކަމަށެވެ.

ދެ އަހަރު ފަހުން އޮންނަ ކޮމަންވެލްތު ސަމިޓުގެ އެޖެންޑާގެ މައިގަނޑު އަމާޒަކަށް ވާނީ ބަދަލު ހޯދުމުގެ އަދުލު އިންސާފު ކަމަށް އުއްމީދު ކުރައްވާ ކަމަށް ޑިޕްލޮމެޓުން ވަނީ ވިދާޅުވެފަ އެވެ.

މިދިޔަ އަހަރު އދ.ގެ ފަނޑިޔާރަކު ވިދާޅުވީ ކެރީބިއަންގެ 14 ގައުމެއްގައި އަޅުވެތިކަމުގައި އިނގިރޭސިވިލާތުން އަދާކުރި ދައުރަށް ބަދަލުގެ ގޮތުގައި 18 މިލިއަން ޕައުންޑަށް ވުރެ ގިނަ ޕައުންޑް ލިބެން ޖެހޭނެ ކަމަށެވެ.