އާޓެމިސް 2، ގަދަ ހޫނުން ސަލާމަތްވެ އެސްޓްރޮނޯޓުން ހެޔޮ ހާލުގައި ދުނިޔެއަށް

އިންސާނުން އަނެއްކާވެސް ތާރީހުގައި މުހިންމު ސަފުހާއެއް އެ ލިއެލީ އެވެ.

ހަނދަށް އިންސާނުން ފޮނުވަން އެމެރިކާއިން ކުރިއަށް ގެންދާ ޕްރޮގްރާމް، އާޓެމިސް 2ގެ ފަޅުވެރިން ސަލާމަތުން އެނބުރި ދުނިޔެއަށް އައިސް، ދަތުރުގެ ބޮޑު ކާމިޔާބު ފާހަގަކުރަން ފަށައިފި އެވެ.

އާޓެމިސް 2ގައި ތިބެގެން ޖައްވުގައި ހަތަރު އެސްޓްރޮނޯޓުން ނުވަ ދުވަސް ހޭދަކުރީ އޮރަޔަން އުޅަނދުގަ އެވެ. އެނބުރި ދުނިޔޭގެ އެޓްމޮސްފިއާގެ ތެރެއަށް އުޅަނދު ވަނުމާ އެކު ހަ މިނިޓް ހޭދަކުރީ ދުނިޔެއާ އެއްވެސް ގުޅުމެއް ނެތި އަދި 2،700 ޑިގްރީ ސެލްސިއަސް ހޫނުގަ އެވެ. މިއީ އެންމެން ނޭވާ ހިފަހައްޓާލަން ޖެހުނު އަދި އެހާމެ ނުރައްކާތެރި ވަގުތުކޮޅެވެ.

އެއީ އިރުގެ ހޫނުމިނުގެ ގާތްގަނޑަކަށް ދެބައިކުޅަ އެއްބަ އެވެ. ދެން ވިސްނާލާށެވެ. އޮރަޔަންގެ ދަށުގައި ހަރުކޮށްފައި ހުރި އެފަދަ ހޫނަކުން ހިމާޔަތް ލިބޭ ހީޓްޝީލްޑަށް ވާނެ ގޮތް ނޭނގުމަކީ އެންމެ ބޮޑު ބިރެވެ.

އެ ވަގުތުކޮޅުގައި އުޅަނދު ދުނިޔެއަށް ވެއްޓެމުން އެ އައީ ގަޑިއަކު 39،692 ކިލޯމީޓަރުގެ ބާރުމިނުގަ އެވެ.

އެމެރިކާގެ ސެން ޑިއެގޯގެ އައްސޭރި ފަށާ ގާތްގަނޑަކަށް 30 ކިލޯމީޓަރުގެ ބޭރަށް އޮރަޔަން ވެއްޓުމާ އެކު އެމެރިކާގެ ކަނޑުގެ ސިފައިންގެ ހާއްސަ ޓީމެއް ތިބީ ތައްޔާރަށެވެ. އޮރަޔަންއިން ނެރެގެން އެސްޓްރޮނޯޓުން މަނަވަރަށް ގެންދިޔައީ ހެލިކޮޕްޓަރުގަ އެވެ.

ނާސާއިން ބުނީ ހަތަރު އެސްޓްރޮނޯޓުންގެ ހާލު ވެސް ރަނގަޅު ކަމަށެވެ.

އޮރަޔަން އުޅަނދުގައި ދެ ބައެއް ހިމެނެ އެވެ. އެއީ އެސްޓްރޮނޯޓުން ތިބޭ ބަ އާއި އޭގެ މަތީގައި ހަރުކޮށްފައި ހުރި، ޔޫރަޕިއަން ސްޕޭސް އެޖެންސީ (އީއެސްއޭ)އިން ތައްޔާރުކުރި ސާވިސް މޮޑިއުލް އެވެ. މިއީ އޮރިޔަންގެ ދަތުރުގައި މިސްރާބު ހިފަހައްޓައިދިން އިންޖީނާއި ކަރަންޓް އުފައްދައިދިން ސޯލާ ޕެނެލްތައް ވެސް ހިމެނޭ މޮޑިއުލް އެވެ. ދުނިޔޭގެ އެޓްމޮސްފިއާގެ ތެރެއަށް ވަނުމުގެ ކުޑައިރުކޮޅެއް ކުރިން ސާވިސް މޮޑިއުލް، އޮރަޔަންއާ ވަކިވި އެވެ. އޭގެ މާނައަކީ ހޫނުގައި އެ ބައި އަނދާ ހުލިވުމެވެ.

އޮރަޔަންގައި ހިމެނޭ ހީޓްޝީލްޑްއާ މެދު ބައެއް ތަޖުރިބާކާރުންގެ ވަރަށް ބޮޑު ކަންބޮޑުވުމެއް އުފެދުނެވެ. އެއީ އިންސާނުންނާ ނުލައި ހަނދު ސަރަހައްދަށް ފޮނުވި އާޓެމިސް 1 ދަތުރުގައި އޮރަޔަން ދުނިޔެއަށް ވެއްޓުނު އިރު އޭގެ ހީޓްޝީލްޑަށް ލިބިފައި އޮތް ގެއްލުމާ ހެދި އެވެ. ބައެއް ތަންތަން ހުރީ ވަކިވެފަ އެވެ.

އޭގެ ސިއްރު ހޯދަން ހާއްސަ ތަހުގީގެއް ހިންގި އެވެ. ނަމަވެސް ބައެއް ތަޖުރިބާކާރުން ބުނީ އެ މައްސަލައިގެ އަސްލު ދެނެގަނެ ހައްލެއް ނުހޯދައި، ހަމަ ކުރީގެ ހަމަތަކަށް ބިނާވެގެން ތިބެ އިންސާނުން ޖައްވަށް ފޮނުވުމަކީ ބޮޑު ނުރައްކަލެއް ކަމަށެވެ.

ނާސާގެ ޗެލެންޖާ 1986ގައި އަދި ކޮލަމްބިއާ 2003ގައި ޖައްވުގައި ގޮވައި އެސްޓްރޮނޯޓުން މަރުވި ހާދިސާއަކީ ހިތާމައިގެ ފިލާވަޅުތަކެވެ. އޭގެ ތެރެއިން ކޮލަމްބިއާ ގޮވީ ދުނިޔޭގެ އެޓްމޮސްފިއާގެ ތެރެއަށް ވަނުމާ އެކު އެވެ. ސަބަބަކީ ހަލާކުވެފައި ހުރި ހީޓްޝީލްޑެވެ.

ނަމަވެސް ނާސާގެ ތަޖުރިބާކާރުންނަށް އޮރަޔަންގެ ހީޓްޝީލްޑާ މެދު ޔަގީންކަން އޮތެވެ. އެހެންވެ ބައެއް މީހުންގެ ފާޑުކިއުންތަކާ އެކު ވެސް ދަތުރު ކުރިއަށް ގެންދިޔައީ އެވެ. އާ ގޮތަކަށް ހީޓްޝީލްޑް ބަދަލުކުރަން އުޅުނު ނަމަ އެތައް އަހަރަކަށް މި ޕްރޮގްރާމް ފަހަތަށް ސޮއްސާލީހެވެ.

ކުރިއަށް އޮތީ ހަނދުގެ ބިމަށް ސީދާ އިންސާނުން ފޭބުމުގެ ދަތުރެވެ. އާޓެމިސް 4 އުދުއްސާލެވޭނީ 2028ގައި ކަމަށް ލަފާކުރެ އެވެ.

އާޓެމިސް 3 ހާއްސަކޮށްްފައި ވަނީ ހަނދުގެ ބިމަށް އިންސާނުން ފޮނުވަން ބޭނުންކުރާ އުޅަނދުތަކުގެ އަޖުމަބެލުމަށެވެ. އެ ދަތުރު އޮންނާނީ އަންނަ އަހަރު އެވެ.

މިހާތަނަށް ހަނދުގެ ބިމަށް އިންސާނުން ފޮނުވި ހަމައެކަނި ގައުމަކީ އެމެރިކާ އެވެ. އެޕޯލޯގެ ނަމުން މަޝްރޫއު ހުއްޓާލިތާ މިހާރު ބައި ގަރުނަށް ވުރެ ގިނަ ދުވަސް ވެއްޖެ އެވެ.