ޖޭމްސް ވެބް ޓެލެސްކޯޕް ލޯންޗުކުރުން މާދަމާއަށް ފަސްކޮށްފި

މިއަދު ލޯންޗުކުރަން ހަމަޖެހިފައި އޮތް، މިހާތަނަށް ހެދި އެންމެ އަޖައިބުކުރުވަނިވި ޓެލެސްކޯޕް، ޖޭމްސް ވެބް ޓެލެސްކޯޕް، މޫސުން ގޯސްވާނެކަމަށް ލަފާކުރެވޭތީ އުދުއްސާލުން މާދަމަޔަށް ފަސްކޮށްފި އެވެ.

ފްރެންޗް ގިޔާނާގައިވާ ކޫރޫ ސްޕޭސްޕޯޓަށް މިއަދު ގަދަވައި ޖެހޭނަކަމަށް ލަފާކުރެވެ އެވެ. ނަމަވެސް ޓެލެސްކޯޕު ހިފައިގެން ނައްޓާލާ ބިޔަ ރޮކެޓު ލޯންޗު ކުރުމާ ބެހޭ ހުރިހާ ތައްޔާރީތަކެއް ވަނީ ނިމިފަ އެވެ. އަދި ލޯންޗު ޓީމުން ވަނީ އެންމެ ފަހުގެ ފަރިތަކުރުންތައް ވެސް ބާއްވައިފަ އެވެ.

ދިހަ ބިލިއަން ޑޮލަރު ހަރަދުކޮށްގެން ހަދާފައިވާ ވެބް ޓެލެސްކޯޕަކީ މިހާރު ޖައްވުގައިވާ ހަބްލް ޓެލެސްކޯޕުގެ ބަދަލުގައި ދެން ބޭނުންކުރާނެ، މާ އެޑްވާންސް ޓެލެސްކޯޕެކެވެ. އަދި މި ޓެލެސްކޯޕް ހަދާފައިވަނީ ހަބްލްއަށް ވުރެ ފުނަށް ކާއިނާތުގެ ސިއްރުތައް ހޯދަން ބަލައިލެވޭނެ ފެންވަރަށެވެ. ސައިންސްވެރިން އަންދާޒާކުރާ ގޮތުގައި މީގެ 13.5 ބިލިއަން އަހަރު ކުރިން ކާއިނާތުގައި ހިނގާފައިވާ ކަންކަމުގެ ހެކި ހޯދަން ވެބް އެހީތެރިވެދޭނެ އެވެ.

މީގެ އިތުރުން ދުނިޔެއަށް ނުފެންނަ އަދި މިހާތަނަށް އެއްވެސް ޓެލެސްކޯޕަކަށް ވެސް ސީދާ ހޯދިފައިނުވާ ޕްލެނެޓްތަކުގެ ޖައްވު ދެނެގަނެ ދިރުން ހުރިކަމުގެ ނިޝާނެއް ވޭތޯ ބަލަން ވެސް ވެބް ޓެލެސްކޯޕްގެ އެހީތެރިކަން ލިބޭނެ އެވެ.

"މިއީ ވަރަށް އާދަޔާހިލާފު މިޝަނެއް. މިއީ ދެކެމުންދާ ބޮޑު ހުވަފެނެއް ހާސިލް ކުރެވިދާނެ ކަމުގެ ފުރިހަމަ މިސާލެއް،" ނާސާގެ އެޑްމިނިސްޓްރޭޓަރު ބިލް ނެލްސަން ވިދާޅުވި އެވެ.

"މިއީ ހަމައެކަނި ނާސާ އާއި ނާސާގެ ބައިވެރިންނަށް ހިންގިދާނެ ކަހަލަ މިޝަންއެއް. މިކަމުން އަހަރެމެންގެ ކާއިނާތު އިތުރަށް ދަސްވެ، އަހަރެމެން މިވާ ހިސާބު އެނގިގެންދާނެ. އަހަރެމެންނަކީ ކޮން ބައެއްކަން، އަހަރެމެންނަކީ ކޮން އެއްޗެއްކަން. މި ސުވާލުތަކަކީ އަބަދުވެސް ކުރެވޭނެ ސުވާލުތަކެއް،" ނެލްސަން ވިދާޅުވި އެވެ.

ވެބް ޕްރޮޖެކްޓް ހިންގީ ނާސާ އާއި ޔޫރަޕުގެ ޖައްވީ އިދާރާ (އީއެސްއޭ) އާއި ކެނެޑާގެ ޖައްވީ އިދާރާތައް (ސީއެސްއޭ) ބައިވެރިވެގެންނެވެ.

ލޯންޗު ކުރުމުގެ ޒިންމާ ނަގާފައިވާ އީއެސްއޭ އިން ވެބް ޓެލެސްކޯޕް ޖައްވަށް ފޮނުވަނީ އަރިއާން 5 ރޮކެޓެއްގަ އެވެ. އަދި ވެބް މަސައްކަތް ކުރަމުންދާނީ ދުނިޔެއާ 1.5 މިލިއަން ކިލޯމީޓަރު ދުރުގައި އޮވެގެންނެވެ. މި ހިސާބަށް ދާން މަހެއްހާ ދުވަސް ނަގާނެ ކަމަށް ލަފާކުރެވޭ އިރު، މި މުއްދަތުގައި ފަތްޖަހާލައިގެން ރޮކެޓްގެ ކޮޅުގައި ރައްކާކޮށްފައިވާ ޓެލެސްކޯޕު ނިއުޅުވި، އޭގެ 6.5 މީޓަރުގެ ބިއްލޫރިގަނޑާއި، އިރުގެ ދޯދިތަކުން ރައްކާތެރިކުރަން ހިމަނާފައިވާ ޓެނިސް ކޯޓެއް ސައިޒްގެ ފަށަލަ ހުޅުވޭނެ އެވެ.

ސައިޒުގެ ގޮތުންނާއި ޓެކްނޮލޮޖީ ގޮތުން ހަބްލްއަށް ވުރެ ވެބް ޓެލެސްކޯޕް އުޅެނީ އެތައް ގުނައެއް ކުރީގަ އެވެ. އެންމެ މުހިންމު ތަފާތަކަށް ވާނީ ޖައްވުގެ ތެރެ ހޯދަން އިންފްރާރެޑް އަލި ބޭނުންކުރުމެވެ. ހަބްލް ޓެލެސްކޯޕަށް ފެންނަނީ އިންސާނުންގެ ލޮލަށް ފެންނަ ފަދަ ގޮތަކަށެވެ. އެއީ ލޮލަށް އަލި އެޅުމުން މަންޒަރު ފެނުމެވެ. ނަމަވެސް ވެބް ޓެލެސްކޯޕް، ކާއިނާތުގައި ވާ އަނދިރީގެ ތެރެއިން ވެސް އެއްޗެހި ހޯދޭނެ އެވެ.