އެޓްލަސް ރޮބޮޓު އޭގެ ފުރިހަމަ ހަރަކާތްތައް ދައްކުވައިދޭ ތަފާތު ފޮޓޯތައް: މި ފެންނަނީ ބޮސްޓަން ޑައިނަމިކްސްގެ ހިއުމަނޮއިޑް ރޮބޮޓު ދުވެ، އެނބުރި އަދި އެކްރޮބެޓިކް ހުނަރުތައް ދައްކާތަން.
ބޮސްޓަން ޑައިނަމިކްސްއިން އެންވީޑިއާއާއެކު ހިއުމަނޮއިޑް ރޮބޮޓުތަކަށް އެންމެ ފަހުގެ އޭއައި ޓެކްނޮލޮޖީ ތައާރަފުކުރުމަށް އެއްބަސްވެއްޖެ
ދުނިޔޭގެ އެންމެ ކުރިއަރާފައިވާ މޯބައިލް ރޮބޮޓިކްސް ކުންފުނި ބޮސްޓަން ޑައިނަމިކްސްއިން އެންވީޑިއާއާއެކު ހިއުމަނޮއިޑް ރޮބޮޓުތަކަށް އެންމެ ފަހުގެ އޭއައި ޓެކްނޮލޮޖީ ތައާރަފުކުރުމަށް އެއްބަސްވެއްޖެއެވެ. އެންވީޑިއާގެ އިސާކް ޖީއާރު00ޓީ ޕްލެޓްފޯމް އެންމެ ފުރަތަމަ ބޭނުންކުރާ ކުންފުނިތަކުގެ ތެރޭގައި ހިމެނޭ ބޮސްޓަން ޑައިނަމިކްސްއިން އެ ކުންފުނީގެ އެޓްލަސް ރޮބޮޓުގައި އެންވީޑިއާގެ ޖެޓްސަން ތޯ ކޮމްޕިއުޓިން ޕްލެޓްފޯމް ބޭނުންކުރާނެއެވެ.
-
ކުޑަ ސައިޒު، މަތީ ޕާފޯމަންސް އަދި އެފިޝެންސީ އެކުލެވޭ ޖެޓްސަން ތޯ ބޭނުންކޮށްގެން އެޓްލަސް ރޮބޮޓަށް ކޮމްޕްލެކްސް، މަލްޓިމޯޑަލް އޭއައި މޮޑެލްތައް ބޭނުންކުރެވޭނެ އެވެ. އަދި މި ޓެކްނޮލޮޖީ ބޮސްޓަން ޑައިނަމިކްސްގެ އެހެނިހެން ކޮންޓްރޯލާތަކާ ގުޅިގެން މަސައްކަތް ކުރާނެ އެވެ.
"ރޮބޮޓުތަކަކީ ސިމިއުލޭޝަނާއި ހަގީގީ ދުނިޔެއާ ދެމެދު ފާލަމެއް" ކަމަށް ބޮސްޓަން ޑައިނަމިކްސްގެ ޗީފް ޓެކްނޮލޮޖީ އޮފިސަރު އެރަން ސޯންޑާސް ބުނެފައިވެ އެވެ. "އަހަރެމެންގެ އިލެކްޓްރިކް އެޓްލަސްއާއެކު، އަހަރެމެން ބިނާކުރަނީ ދުނިޔޭގެ އެންމެ ގާބިލް ހިއުމަނޮއިޑް ރޮބޮޓް. އަދި އެންވީޑިއާއާ ގުޅިގެން ޖެޓްސަން ތޯ އިންޓަގްރޭޓްކުރުމާއެކު، މި ރޮބޮޓުގައި އެންމެ ޕާފޯމަންސް މަތީ ކޮމްޕިއުޓިން ޕްލެޓްފޯމް ބޭނުންކުރެވޭނެ."
-
އެޓްލަސް ރޮބޮޓާއެކު ކުރެވޭ މަސައްކަތުގެ އިތުރުން، ބޮސްޓަން ޑައިނަމިކްސްއިން ސްޕޮޓް ނަމަކަށް ކިޔާ ހަތަރު ފައި ހުންނަ ރޮބޮޓަށާއި، އޯބިޓް ނަމަކަށް ކިޔާ ރޮބޮޓް ފްލީޓް މެނޭޖްމަންޓް އަދި ޑޭޓާ އެނަލިސިސް ސޮފްޓްވެއާއަށްވެސް އާ އޭއައި ޓެކްނޮލޮޖީތައް ތައާރަފްކުރަމުންދެ އެވެ.