ފަހު ވޯލްޑް ކަޕްގެ ބައްޔާ އެކު ރޮނާލްޑޯއަށް ރޮވިއްޖެ

ފަހު ކަށިގަނޑާ އެކު ކްރިސްޓިއާނޯ ރޮނާލްޑޯގެ ލޮލުން ކަރުނަ އުފެދުނެވެ. މިއީ ކާމިޔާބީގެ ވިދުންތަކުން ފުރިފައި އޮތް އޭނާގެ ފުޓްބޯޅަ ކެރިއަރުގައި ވޯލްޑް ކަޕްގެ ފަހު މެޗެވެ. ސްޕެއިން އަތުން 1-0އިން ބަލިވެ، ކްއާޓާ ފައިނަލަށް ނުގޮސް މިއަދު ކެޓުމަކީ، ވޯލްޑް ކަޕްގައި އަތްލާން އޭނާ ކުރި އުއްމީދު ބިލާހަކަށް ވުމެވެ.

ރޭގެ މެޗުގައި 41 އަހަރުގެ ފޯވަޑްގެ ބޭނުން ނުހިފުނަސް ކޯޗު ރޮބާޓޯ މާޓިނޭޒް އޭނާ ނުބާލަ އެވެ. މުޅި މެޗުގައި ރޮނާލްޑޯގެ ފައިގައި ޖެހުނީ އެންމެ 19 ބޯޅަ އެވެ. ތިން ހަމަލާ ފޮނުވާލި އެވެ. ލަނޑު ޖަހަން އެއް ފުރުސަތު ތަނަވަސްކޮށްދިނެވެ.

އެކަމަކު ވޯލްޑް ކަޕްގެ ގަދަ 16ގައި ޕޯޗުގަލް ފަދަ މޮޅު، ޒުވާން ކުޅުންތެރިން ގިނަ ޓީމަކަށް ބަލާ ނަމަ ދަނޑުމަތީގައި ރޮނާލްޑޯ ބެހެއްޓުމަކީ ފުޓްބޯޅަ ފާޑުކިޔުންތެރިންނަށް ވެސް ގަބޫލުކުރަން އުނދަގޫ ކަމެކެވެ. އެހެންވެ ޕޯޗުގަލް ކެޓުމުގެ ސީދާ ޒިންމާ މާޓިނޭޒް ނަގަން ޖެހޭނެ ކަމަށް، ބައެއް ދިރާސާވެރިން ބުނެ އެވެ.

ޕޯޗުގަލްގެ ކޯޗުކަމުން މާޓިނޭޒް ވަކިވިކަން އޭނާ ރޭ އިއުލާންކުރި އެވެ. ރޮނާލްޑޯއަށް ތައުރީފު ވެސް ކުރިމެވެ.

"މި ވޯލްޑް ކަޕްގައި އޭނާ ކުރި މަސައްކަތަށް އަހަރެމެން ޝުކުރު އަދާކުރަން ޖެހޭ،" މާޓިނޭޒް ބުންޏެވެ.

"އޭނާގެ ހުވަފެނަކީ ވޯލްޑް ކަޕް ކާމިޔާބުކުރުން. އެކަމަށްޓަކައި އޭނާ އެހާ މަސައްކަތް ވެސް ކުރި."

މާޓިނޭޒް ބުނީ ރޮނާލްޑޯއަކީ އެންމެންނަށް ވެސް ނަމޫނާއެއް ކަމަށެވެ. 

ރޮނާލްޑޯ ވަނީ ޕޯޗުގަލްއަށް 146 ގޯލު ޖަހައިދީފަ އެވެ. މި ވޯލްޑް ކަޕް އޭނާ ނިންމާލީ ތިން ލަނޑާ އެކުގަ އެވެ. އޭނާއަކީ ވޯލްޑް ކަޕް މެޗެއްގައި، އުމުރުން 41 އަހަރުގައި، ލަނޑު ޖެހި ހަމައެކަނި ކުޅުންތެރިޔާ އެވެ.

މާޓިނޭޒް ބުނީ ގޯލެއް ޖަހަން ބޭނުން ނަމަ ރޮނާލްޑޯ ބޭލޭނެ ގޮތެއް ނޯންނާނެ ކަމަށެވެ.

"ޖިސްމާނީ ގޮތުން އޭނާގެ އެ ފެންވަރު އެބަ ހުރި،" މާޓިނޭޒް ބުންޏެވެ.

ރޮނާލްޑޯގެ ހަ ވޯލްޑް ކަޕްގެ ތެރެއިން ތައްޓާ އެންމެ ކައިރިއަށް ވެސް ދެވުނީ އޭނާގެ ފުރަތަމަ ވޯލްޑް ކަޕް 2006ގަ އެވެ. އެ ފަހަރު ސެމީ ފައިނަލްގައި ކުޅުނެވެ.

ފުޓްބޯޅައިގެ އެހެން ބޮޑެތި ކާމިޔާބީތައް އޭނާގެ ހަޔާތުގައި ވަނީ ލިޔެވިފަ އެވެ: ފަސް ފަހަރަަށް ޗެމްޕިއަންސް ލީގު ކާމިޔާބުކުރި އެވެ. ޔޫރޯގެ ޗެމްޕިއަން 2016ގައި ހޯދި އެވެ. ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ވެސް ފަސް ފަހަރަށެވެ. ޕޯޗުގަލް އާއި ކްލަބްތަކަށް ޖުމްލަ 976 ލަނޑު ޖެހި އެވެ.