އާސެނަލް މޮޅުކޮށްދިން ވީއޭއާރުގެ ނިންމުގެ އަސަރު އެތައް ޓީމަކަށް

މެޗުގެ 83 ވަނަ މިނިޓްގައި ލިއަންޑްރޮ ޓްރޮސާޑް ޖަހާލި ލަނޑުން އިނގިރޭސި ޕްރިމިއަ ލީގުގެ ތައްޓާ ދެ ފިޔަވަޅު ކައިރިއަށް އާސެނަލް ގެންގޮސްދީފި އެވެ. ނަމަވެސް އިތުރު ވަގުތުގެ ފަހު ސިކުންތުކޮޅުގައި ލިބުނު ކޯނަރެއްގައި ވެސްޓް ހެމް ޔުނައިޓެޑުން އެއްވަރުކުރި ލަނޑު ވީއޭއާރުން ކެންސަލްކުރީ އެވެ.

މިއީ އެތައް ޒަމާނަކަށް ވާހަކަ ފެތުރިގެން ދާނެ ފަދަ ނިންމުމެކެވެ. އޭގެ ނުބައި އަސަރާއި ރަނގަޅު އަސަރު، ލީގުގެ އެންމެ ފަހުކޮޅު، އެތައް ޓީމަކަށް ކުރާނެ އެވެ.

މި މެޗު އެއްވަރުވި ނަމަ ރެލިގޭޝަނުން ސަލާމަތްވާން ވެސްޓް ހެމްއަށް ރަނގަޅު ފުރުސަތެއް ތަނަވަސްވީހެވެ. އޭރުން 17 ވަނާގައި އޮތް ޓޮޓެންހަމް ހޮޓްސްޕާއާ ޕޮއިންޓްގެ ގޮތުން އެއްވަރުވާނެ އެވެ.

އެ ލަނޑު ކެންސަލްވުމުން ޓޮޓެންހަމްއަށް ދިރުމުގެ ނޭވާއެއް ލެވުނީ އެވެ. އެކަމަކު އާސެނަލް ފަހަތުން ވިއްދާފައި އޮތް މެންޗެސްޓާ ސިޓީއަށް، ތަށި ހޯދަން ހުޅުވެން އޮތް ފުރުސަތެއް ގެއްލުނީ އެވެ.

ވެސްޓް ހެމްގެ ގޯލު ކެންސަލްވީ ކޯނަރުގައި އައި ބޯޅަ އާސެނަލްގެ ކީޕަރު ޑޭވިޑް ރާޔާ ހިފަން އުޅެނިކޮށް ވެސްޓް ހެމްގެ ޕަބްލޯގެ ވާތް، ރާޔާގެ ކަރުގައި ރަނގަޅަށް އަޅުވާފައި އޮތުމެވެ. ވީއޭއާރުން ނިންމީ އެއީ ފައުލެއް ކަމަށެވެ. ރެފްރީ ކްރިސް ކަވަނާ ގޮސް ވީޑިއޯއިން ބަލައި، އެކަން ކަށަވަރުކުރި އެވެ.

މި ފަހަރުގެ ލީގުގެ ޗެމްޕިއަންކަން ކަނޑައަޅާނީ އާސެނަލް އާއި ސިޓީގެ އެންމެ ފަހު ފަސް މެޗުންނެވެ. މިރޭގެ މޮޅާ އެކު އާސެނަލްގެ ފަސް މެޗުގެ ތެރެއިން ތިން މެޗުން އެ މޮޅުވީ އެވެ. ސިޓީ މިހާތަނަށް ކުޅުނު ދެ މެޗުގެ ތެރެއިން އެއް މެޗުން މޮޅުވެ އަނެއް މެޗު އެއްވަރުވެ ދެ ޕޮއިންޓް އޮތީ ގެއްލިފަ އެވެ. އެހެންކަމުން އާސެނަލްގެ ފަހު ދެ މެޗުން ޕޮއިންޓެއް އުނިވެގެން ނޫން ގޮތަކަށް ސިޓީއަށް ޗެމްޕިއަންކަން ލިބޭކަށް ނެތެވެ.

މި ވަގުތު އާސެނަލް އެވަނީ ފަސް ޕޮއިންޓްގެ ކުރިއެއްގަ އެވެ. އެކަމަކު އެއީ ސިޓީއަށް ވުރެ އެއް މެޗު އިތުރަށް ކުޅެގެންނެވެ.

އިނގިރޭސި ޕްެރިމިއަ ލީގުގެ ޗެމްޕިއަންކަން އާސެނަލްއަށް ނުލިބޭތާ މިހާރު 22 އަހަރު ވެއްޖެ އެވެ.

(އަންނަ ސީޒަންގައި ރެލިގޭޓްވާނީ އެންމެ ފުލަށް ދާ ތިން ޓީމެވެ.)