އިނގިރޭސި ޕްރިމިއަ ލީގުގައި ރޭ ޗެލްސީގެ މޮއީސެސް ކައިސެޑޯއަށް ރަތް ކާޑު ދެއްކި ވަގުތު ޗެލްސީގެ ކުޅުންތެރިން ރެފްރީ ކައިރީގައި

އިނގިރޭސި ޕްރިމިއަ ލީގު

ޗެލްސީން 10 ކުޅުންތެރިންނާ އެކު އާސެނަލް ހިފަހައްޓައިފި

ލަންޑަންގެ ދެ ވާދަވެރިންގެ ކުރިމަތިލުމުގައި ޗެލްސީން ގިނަ ވަގުތު ކުޅުނީ 10 ކުޅުންތެރިންނާ އެކު. މެޗު 1-1އިން އެއްވަރުވުމުން އާސެނަލްގެ ލީޑު މިހާރު ވަނީ ފަސް ޕޮއިންޓަށް ހަނިވެފައި
1 ޑިސެމްބަރު 2025

އާސެނަލްގެ މިކޭލް މެރީނޯގެ ފަޔަށް ދިން ހަމަލާއަކާ ގުޅިގެން މިޑްފީލްޑަރު މޮއީސެސް ކައިސެޑޯއަށް މެޗުގެ 38 ވަނަ މިނިޓްގައި ދެއްކި ރަތް ކާޑާ އެކު ޗެލްސީއަށް ބޮޑު މައްސަލައެއް ކުރިމަތިވި އެވެ. ނަމަވެސް ދެވަނަ ހާފު ފެށިތާ މާ ގިނަ އިރެއް ނުވެ ލަނޑެއް ޖަހައި، ކުރި ހޯދީ އެވެ.

ތާވަލްގެ ކުރީގައި އޮތް އާސެނަލްއާ ދެކޮޅަށް 10 ކުޅުންތެރިންނާ އެކު ޗެލްސީން ދެއްކީ ވަރަށް ވަރުގަދަ ކުޅުމެކެވެ. ނަމަވެސް އޭގެ 10 މިނިޓް ފަހުން މެރީނޯ ލަނޑެއް ޖަހައި ނަތީޖާ 1-1އަށް ބަދަލުކޮށްލި އެވެ.

އެހާ ހިސާބުން ވެސް ޗެލްސީން އިތުރު ފުރުސަތެއް އާސެނަލްއަކަށް ނުދެ އެވެ. ރަނގަޅަށް ދިފާއުކޮށް، ދޭތެރެ ދޭތެރެއިން އެހާމެ ނުރައްކާ ވެސް ކުރި އެވެ.

ލަންޑަންގެ ވާދަވެރި ދެ ޓީމުގެ މި މެޗަކީ ޕްރިމިއަ ލީގުގައި ފެންނާނެ މޮޅު އެއް މެޗަށް ވާނެ ކަމަށް ވެސް ބެލެވުނެވެ. ނަމަވެސް ފައުލްތައް ގިނަވެ، މެޗުގައި ދެ ޓީމުގެ ކުޅުން ފެނުނީ އުއްމީދުކުރި ގޮތަކަށެއް ނޫނެވެ. އާސެނަލްގެ ހަ ކުޅުންތެރިޔަކަށް ރީނދޫ ކާޑު އަދި ޗެލްސީގެ އެއް ކުޅުންތެރިޔަކަށް ރީނދޫ ކާޑު ދެއްކި އެވެ.

މި ނަތީޖާއާ އެކު ޗެލްސީ މިހާރު އޮތީ އާސެނަލްއަށް ވުރެ ހަ ޕޮއިންޓް ފަހަތުން ތިން ވަނައިގަ އެވެ.

އިނގިރޭސި ޕްރިމިއަ ލީގުގެ ގަދަ ފަހެއް

  • 1-

    އާސެނަލް، ކުޅުނު 13، ޕޮއިންޓް 30

  • 2-

    މެންޗެސްޓަ ސިޓީ، ކުޅުނު 13، ޕޮއިންޓް 25

  • 3-

    ޗެލްސީ، ކުޅުނު 13، ޕޮއިންޓް 24

  • 4-

    އެސްޓަން ވިލާ، ކުޅުނު 13، ޕޮއިންޓް 24

  • 5-

    ބްރައިޓަން، ކުޅުނު 13، ޕޮއިންޓް 22

ކުޅިވަރު އިނގިރޭސި ޕްރިމިއަ ލީގު އާސެނަލް ޗެލްސީ ފުޓްބޯޅަ ދުނިޔޭގެ ކުޅިވަރު

އިތުރު އާޓިކަލް

އިތުރު އާޓިކަލް