މާޒިޔާގެ އުއްމީދީ ފެށުމަށް ތުރުކުމެނިސްތާންގެ ޓީމުން ހުރަސް އަޅައިފި

ކްވޭތުގައި އިއްޔެ ފެށި އޭއެފްސީ ޗެލެންޖް ލީގުގެ ގްރޫޕް ބީގެ މެޗުގައި މާޒިޔާއިން ފުރަތަމަ ހާފުގައި ލީޑު ނަގާފައި އޮއްވާ ތުރުކުމެނިސްތާންގެ ޗެމްޕިއަން އެފްސީ އަރްކަޑާގް 2-1 އިން މޮޅުވެއްޖެ އެވެ.

މިއީ ރާއްޖޭގައި މިހާރު ގަވާއިދުން ޕްރެކްޓިސްކޮށް ދިވެހި ފުޓްބޯޅައި މަތީ ހަރުފަތުގައި ބާއްވަން މަސައްކަތްކުރަމުން އަންނަ ހަމައެކަނި ކްލަބްގެ އުއްމީދީ ފެށުމަށް އެޅުނު ބޮޑު ހިޔަންޏެކެވެ.

އޭޝިއާގެ މުބާރާތެއްގައި ރަނގަޅު ކާމިޔާބީއެއް ހޯދުމުގެ އަޒުމް އޮތް މާޒިޔާއިން މިފަހަރުގެ މުބާރާތަށް ވެސް ބޮޑު ހޭދައެއް ވަނީ ކޮށްފަ އެވެ. އެގޮތުން އިއްޔެ އެރި ފުރަތަމަ 11ގައި ބިދޭސީ ހަ ކުޅުންތެރިން ހިމެނެ އެވެ.

ފުރަތަމަ ހާފު ނިމެން އުޅެނިކޮށް، 45 ވަނަ މިނިޓްގައި، މާޒިޔާއަށް ލަނޑު ޖަހައިދިނީ ފަލަސްތީނުގެ ގައުމީ ޓީމުގެ ޖޮނަތަން ކަންޓިލާނާ އެވެ. އަލީ ފާސިރު (ސެންޓޭ) ކަނާތް ފަރާތުން އޭރިޔާ ތެރެއަށް ހުރަސްކޮށްލި ބޯޅަ ދިފާއުކުރަން އަރްކަޑާގްގެ ކުޅުންތެރިޔަކު ޖެހި ބޯޅަ ވެއްޓުނީ ގޯލުގެ ހަމަ ކުރިމަތީގައި ހުރި ކަންޓިލާނާގެ ފަޔަށެވެ. އޭނާ ބާރަށް ފޮނުވާލި ބޯޅަ ދިޔައީ ގޯލުގެ ކަނަށެވެ.

ނަމަވެސް އެ ނަތީޖާގައި މެޗު ނިމުމުގެ ފުރުސަތެއް އަރްކަޑާގްގެ ކުޅުންތެރިން ނުދިނެވެ. މެޗުގެ 66 އާއި 76 ވަނަ މިނިޓްގައި ދެ ލަނޑު ޖަހައި، މެޗުގެ ކުރި ހޯދި އެވެ.

މާޒިޔާ ހިމެނޭ ގްރޫޕްގައި ދެން އޮތީ ކުވޭތުގެ އަލް އަރަބީ އާއި ކިރިގިސްތާންގެ އަބްޑީޝް-އަޓާ ކާންޓް އެވެ. މި ދެ ޓީމު ކުޅުނު މެޗުން 1-0 އިން މޮޅުވީ ކާންޓް އެވެ.

އަންނަ އަންގާރަދުވަހު މާޒިޔާ ކުޅޭނީ އަލް އަރަބީއާ އެވެ.