އިންގްލެންޑްގެ ކޯޗަކަށް ޓުޗެލް ހަމަޖައްސަން ނިންމައިފި

އިންގްލެންޑްގެ ގައުމީ ފުޓްބޯޅަ ޓީމުގެ ކޯޗަކަށް ޖަރުމަންގެ ތޯމަސް ޓުޗެލް ހަމަޖައްސަން، އެފްއޭއިން ނިންމައިފި އެވެ.

އަށް އަހަރު ދުވަހު އެ މަގާމުގައި ހުރި ގެރެތު ސައުތުގޭޓް، އެންމެ ފަހުން އޮތް ޔޫރޯއަށް ފަހު އިސްތިއުފާ ދިނުމުން އިންގްލެންޑްގެ ގައުމީ ޓީމަށް ދާއިމީ ކޯޗެއް ހަމަޖައްސާފައެއް ނުވެ އެވެ. މިހާރު އެ ޒިންމާ ނަގަމުން އަންނަނީ ވަގުތީ ގޮތުން ލީ ކާސްލޭ އެވެ.

ކުރިން ޗެލްސީއަށް ކޯޗުކަން ކޮށްދީ، ޕްރިމިއަ ލީގުގެ ތަޖުރިބާ ވެސް ހޯދާފައިވާ 51 އަހަރުގެ ޓުޗެލް، އިންގްލެންޑްގެ ގައުމީ ޓީމަށް ހަމަޖެއްސުމުން ބައެއް މީހުންގެ ފާޑުކިއުން ވަނީ އަމާޒުވެފަ އެވެ.

އިންގްލެންޑްގެ ގައުމީ ޓީމުތަކަށް އެ ގައުމުން ބޭރު މީހުން ހަމަނުޖެއްސުމުގެ އުސޫލުތަކެއް ދަމަހައްޓަމުން އަންނަތާ 10 އަހަރަށް ވުރެ ގިނަ ދުވަސް ވެއްޖެ އެވެ. އެއީ އިންގްލެންޑްގެ ކޮންމެ ޓީމެއްގައި ވެސް އެއް ކަހަލަ ފިލޯސަފީއެއް ދަމަހައްޓަން ނިޔަތް ގަނެގެން ހިފަހައްޓަމުން އައި އުސޫލެކެވެ.

ނަމަވެސް އިނގިރޭސި ކޯޗުން ލައިގެން ވެސް، 1966ގެ ފަހުން، ދުނިޔޭގެ ބޮޑު މުބާރާތެއްގެ ތައްޓަކާ ހަމައަށް ދެވޭވަރެއް ނުވެ އެވެ. އެއީ އިންގްލެންޑުން ވޯލްޑް ކަޕް ކާމިޔާބުކުރި އަހަރެވެ.

އިނގިރޭސި ބައެއް ފާޑުކިއުންތެރިން ބުނާ ގޮޮތުގައި ޓުޗެލްއަށް މަގާމު ދެނީ 2026ގެ ވޯލްޑް ކަޕަށް އަމާޒުކޮށް ވަގުތީ ހައްލުތަކެއް ހޯދާށެވެ.

"މިއީ އަމިއްލަ ގައުމުގައި އުފެދެމުން އަންނަ މެނޭޖަރުންނަށް އިސްކަން ދިނުމުގެ ހަމަޔަށް ބޭވަފާތެރިވުން" ކަމަށް، ބީބީސީގެ ލިއުންތެރިޔާ ފިލް މެކްނަލްޓީ ބުންޏެވެ.

"މިއީ އެމީހުންނަށް ކުރި މަލާމާތެއް ވެސް މެ އެވެ،" އޭނާ ލިއުނެވެ.

ޖަރުމަނަކީ ފުޓްބޯޅާގައި އިންގްލެންޑްގެ އެންމެ ބޮޑު ވާދަވެރިޔާ ވެސް މެ އެވެ. އެހެންކަމުން ޓުޗެލްއާ މެދު ބައެއް މީހުންގެ ހިތްހަމަނުޖެހުން، އެ ސަބަބާ ހުރެ ވެސް އަތުވެދާނެ އެވެ.

އަނެއް ބަޔަކު ދެކޭ ގޮތުގައި ޓުޗެލްއަކީ އިންގްލެންޑަށް ބޭނުންވާ ކަހަލަ ކާމިޔާބު ކޯޗެއް ނޫނެވެ. އިންގްލެންޑްގެ ފުޓްބޯލް އެސޯސިއޭޝަނުން ފުރަތަމަ ބެލީ މެންޗެސްޓަ ސިޓީގެ ކޯޗު ޕެޕް ގާޑިއޯލާ ހޯދާށެވެ. ނަމަވެސް އޭނާ އެކަމަކަށް އެއްބަހެއް ނޫނެވެ.

އިންގްލެންޑް ޓީމަށް ޓުޗެލް ހަމަޖެއްސިކަން ރަސްމީކޮށް އިއުލާންކުރުން ވިމްބްލިގައި މިއަދު އޮންނާނެ އެވެ.