ސައުތު އޭޝިއާގެ ޖޫނިއަ މުބާރާތުގެ ރިލޭއިން ރާއްޖެއަށް ލޯ މެޑަލް

އިންޑިއާގެ ޗެންނާއީގައި އިއްޔެ ނިމުނު ސައުތު އޭޝިއަން ޖޫނިއަ އެތުލެޓިކްސް ޗެމްޕިއަންޝިޕްގައި އަންހެނުންނާއި ފިރިހެނުންގެ 100 މީޓަރުގެ ރިލޭއިން ރާއްޖެ ލޯ މެޑަލް ހޯދައިފި އެވެ.

އަންހެނުންގެ ރިލޭގައި ރަން މެޑަލް ހޯދީ 45.08 ސިކުންތުން ނިންމައިގެން އިންޑިއާ އެވެ. ރިހި މެޑަލް ކާމިޔާބުކުރި ސްރީ ލަންކާ 46.48 ސިކުންތުން ނިންމި އިރު ރާއްޖޭގެ ވަގުތަކީ 48.04 ސިކުންތެވެ.

ލޯ މެޑަލް ހޯދި ރާއްޖޭގެ ޓީމުގައި ދުވީ މަރިޔަމް ރޫޔާ އަލީ އާއި އަހްނާ ނިޒާރު އާއި ހައްވާ މުޒްނާ ފާއިޒް އަދި ޒިވާ މޫސާ ޝަފީއު އެވެ.

ފިރިހެން ކުދިންގެ 100 މީޓަރު ރިލޭގައި ރާއްޖެ ލޯ މެޑަލް ހޯދީ ބަންގްލަދޭޝް އާއި ޕާކިސްތާން ބަލިކޮށްފަ އެވެ. މި ރިލޭ 40.28 ސިކުންތުން ނިންމައިގެން ސްރީ ލަންކާ ރަން މެޑަލް ކާމިޔާބުކުރި އިރު 40.76 ސިކުންތުން ނިންމި އިންޑިއާ ރިހި މެޑަލް ހޯދި އެވެ. ރާއްޖޭގެ ވަގުތަކީ 41.98 ސިކުންތެވެ.

ލޯ މެޑަލް ކާމިޔާބުކުރި ދިވެހި ރިލޭ ޓީމުގައި ދުވީ ހުސެއިން ޒީކް ސުއާދު އާއި ޒުއިޒް މުހައްމަދު ސުއާދު އާއި އިބްރާހިމް ނާހިލް ނިޒާރު އަދި މުހައްމަދު މިންހާލް ޝާމިން އެވެ.

މި ދެ ކާމިޔާބީއަށް މަރުހަބާ ވިދާޅުވެ ރައީސް މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ އެއީ ގައުމަށް ހޯދައިދިން ރީތި ނަމެއް ކަމަށެވެ.

"ދިވެހި ޒުވާން އެތުލީޓުން ބްރޯންޒް މެޑަލް ހާސިލްކޮށް، ގައުމަށް ހޯދައިދިން ރީތި ނަމާ، ދެއްކި ހުނަރާއި ހިތްވަރަށް ފަހުރުވެރިވެ، ސާބަހާއި މަރުހަބާ ދަންނަވަމެވެ،" ރައީސް މުއިއްޒުގެ މެސެޖްގައި ވިދާޅުވި އެވެ.

މި މުބާރާތުގައި މެޑަލްގެ ގޮތުން އިންޑިއާ އާއި ސްރީ ލަންކާއާ އެހެން އެއްވެސް ބަޔަކަށް ވާދައެއް ނުކުރެވުނެވެ. އިންޑިއާ އެއްވަނަ ހޯދީ 21 ރަން، 22 ރިހި އަދި ފަސް ލޯ މެޑަލްއާ އެކު ޖުމްލަ 48 މެޑަލް ކާމިޔާބުކޮށްނެވެ.

މެޑަލް ތާވަލްގެ ދެވަނަ ސްރީ ލަންކާއިން ހޯދީ ޖުމްލަ 35 މެޑަލްއާ އެކު އެވެ. އެއީ ނުވަ ރަން، ނު ރިހި އަދި 17 ލޯ މެޑަލް އެވެ.

ބަންގްލަދޭޝް ތިން ވަނާގައި އޮތީ ލޯ ތިން މެޑަލްއާ އެކު އެވެ. ހަތަރު ވަނަ މަގާމަށް ރާއްޖެއަށް ދެވުނީ ލޯ ދެ މެޑަލް ހޯދައިގެންނެވެ.