ދިރާގު ރޯޑް ރޭހުގައި ބައިވެރިވާން ހުޅުވާލައިފި، މިފަހަރު އޮފީސް/ރިސޯޓްތަކަށް ހާއްސަ ބައެއް ހިމެނޭ

އޮފީހާއި ރިސޯޓްތަކަށް ހާއްސަ ބައެއް ހިމަނައިގެން މި އަހަރުގެ ދިރާގު މޯލްޑިވްސް ރޯޑް ރޭސް (ޑީއެމްއާރުއާރު)ގައި ރަޖިސްޓްރީވުމުގެ ފުރުސަތު އިއްޔެ ދިރާގުން ހުޅުވާލައިފި އެވެ.

ވީ ކިހިނެއް؟ - ރާއްޖޭގައި ބާއްވާ ދުވުމުގެ އެންމެ ބޮޑު ރޭހުގައި ބައިވެރިވުމުގެ ފުރުސަތު ހުޅުވާލިކަން ދިރާގުން އިއުލާންކުރީ އިއްޔެ އެކަމަށް ބޭއްވި ހާއްސަ އިވެންޓެއްގަ އެވެ. އެ އިވެންޓްގައި ދިރާގުން އިއުލާންކުރީ ރޭހުގައި މުޅިން އަލަށް އޮފީސްތަކާއި ރިސޯޓްތަކަށް ހާއްސަ ބައެއް ވެސް ހިމެނޭނެ ކަމަށެވެ.

ތަފްސީލް - ދިރާގު ރޯޑް ރޭސް މި އަހަރު އޮންނާނީ 25 އޮކްޓޯބަރު ވާ ހުކުރުދުވަހު ހުޅުމާލޭ ސެންޓްރަލް ޕާކްގަ އެވެ. މިފަހަރުގެ ރޭސް ވެސް ބިނާވެފައި އޮތީ؛

މީގެ ތެރެއިން އޮފީސް/ރިސޯޓްތަކުން ވާދަކުރަން ޖެހޭނީ ހަވީރު އޮންނަ 5 ކިލޯމީޓަރުގަ އެވެ. ކޮންމެ ޓީމެއްގައި ހިމެނޭނީ ހަތަރު ދުވުންތެރިންނެވެ.

ދިރާގުގެ ޑިރެކްޓަ ބްރޭންޑް އެންޑް މާކެޓިން ކޮމިޔުނިކޭޝަން މުހައްމަދު މިރުޝާން ހަސަން ވިދާޅުވީ ޓީމެއްގައި ދުވާ ދުވުންތެރިޔާ އޯޕަން ބައިގައި ނުހިމެނޭނެ ކަމަށެވެ.

"އޮފީސް ނޫނީ ރިސޯޓެއްގެ ޓީމުގައި ތިބެން ޖެހޭނީ އެތަނެއްގެ މުވައްޒަފުން. އެ ދުވުންތެރިން އޯޕަން 5ކޭގައި ދުވިޔަސް އެ މީހުންގެ ވަގުތު ބަލާނީ ޓީމުގެ ވަގުތުގެ ތެރޭގައި. އޯޕަން ބައިގެ އެހެން ވަނައެއްގައި އެ މީހުން ނުހިމެނޭނެ،" މިރުޝާން ވިދާޅުވި އެވެ.

އޮފީސް/ރިސޯޓް ބައިން ވަނަ ހޮވާނީ ހަތަރު ދުވުންތެރިން ރޭސް ނިންމާ ވަގުތު އެއްކޮށްލައިގެންނެވެ. ޓީމެއްގައި ދެ ޖިންސްގެ ދުވުންތެރިން ވެސް ހިމެނިދާނެ އެވެ.

ދިރާގު ރޯޑް ރޭހުގެ އެކި ބައިތަކުން ވަނަތަކަށް ހޮވޭ ދުވުންތެރިންނަށް ދޭ ފައިސާގެ އިނާމުގެ މިންވަރު މިފަހަރު 256،000ރ.އަށް އަރާކަމަށް ދިރާގުން ބުންޏެވެ.

ރޭހުގައި ހޮވާ ވަނަތަކުގެ ތެރޭގައި ހާފް މެރެތަން އާއި 10 ކިލޯމީޓަރު އަދި 5 ކިލޯމީޓަރުން ކޮންމެ ޖިންސަކުން ވެސް އެކެއް، ދޭއް ތިނެއް ހިމެނެ އެވެ. އޭގެ އިތުރުން އޮފީސް/ރިސޯޓްތަކުގެ ބަޔާއި ސްކޫލްތަކުގެ ބައިން ވެސް ވަނަ ހޮވަ އެވެ. މި ދެ ބައިގެ ދުވުން އޮންނާނީ 5ކިލޯމީޓަރުގެ ރޭހުގެ ތެރޭގަ އެވެ.

ދިރާގު ރޯޑް ރޭހުގައި ހިމެނޭ އެންމެ މުހިންމު އެއް ކަމަކީ މި ރޭސް މެދުވެރިކޮށް ރާއްޖޭގެ އަމިއްލަ ޖަމިއްޔާތަކަށް ލިބޭ ފައިސާގެ އެހީ އެވެ. ރޭހުގައި ބައިވެރިވާން ނަގާ ފީގެ ތެރެއިން ވަކި މިންވަރެއް އަމިއްލަ ޖަމިއްޔާތަކަށް ދެ އެވެ. މިފަހަރު 12 ޖަމިއްޔާއެއް ވަނީ ހިމަނައިފަ އެވެ.

ރޭހުގައި ރަޖިސްޓްރީވާ އިރު ދުވުންތެރިޔަކު އެހީވާން ބޭނުންވާ ޖަމިއްޔާއެއް އިހުތިޔާރުކުރެވެ އެވެ. އޭނާގެ ރަޖިސްޓްރީ ފީގެ ތެރެއިން 100ރ އެ ޖަމިއްޔާއަކަށް ލިބޭނެ އެވެ. އޭގެ އިތުރުން ބައިވެރިންނަށް އެހެން ގޮތްގޮތުން ވެސް އެހީތެރިވެވެ އެވެ. ރޭހުގައި ހާއްސަ ބިބް ނަންބަރެއް ބޭނުންވާ ނަމަ ނަގާ ފީ އެއްކޮށް ދާނީ އޭނާ އިހުތިޔާރުކުރާ ޖަމިއްޔާއަކަށެވެ.

ދިރާގުން ބުނީ މިދިއަ އަހަރުގެ ރޭސް މެދުވެރިކޮށް ފަސް ޖަމިއްޔާއަކަށް 635،000ރ ލިބުނު ކަމަށެވެ. މީގެ ތެރޭގައި ދިރާގުން ދޭ 200،000ރ ވެސް ހިމެނެ އެވެ.

ފައިސާގެ އެހީ ލިބޭނީ ދުވުންތެރިން އެންމެ ގިނައިން ރަޖިސްޓްރީވާ ފަސް ޖަމިއްޔާއަކަށެވެ.

މިފަހަރުގެ ރޭހުގައި 4،000 ދުވުންތެރިންނަށް އޮތީ ފުރުސަތު ހުޅުވާލައިފަ އެވެ.  www.dmrr.mv މި ވެބްސައިޓް މެދުވެރިކޮށް ރަޖިސްޓްރިވެވޭނެ އެވެ.