ނަބާހާގެ މައްޗަށް ސިންދު ކާމިޔާބު ހޯދީ ބައިގަޑިއިރުގެ ތެރޭގައި

ކުރިން ހީކުރި ގޮތަށް ޕެރިސް އޮލިމްޕިކްސްގެ އަންހެން ސިންގަލްސްގައި ރާއްޖޭގެ އެއްވަނަ ކުޅުންތެރިޔާ ފާތުމަތު ނަބާހާ އަބްދުއްރައްޒާގު، މުބާރާތުގެ 10 ވަނަ ސީޑް އިންޑިއާގެ ޕީ.ވީ ސިންދު އަތުން ސީދާ ދެ ގޭމުން މިއަދު ބަލިވެއްޖެ އެވެ.

ގްރޫޕް އެމްގެ މި މެޗުގައި ސިންދު ދެ ގޭމް ކާމިޔާބުކުރީ 21-9 ،21-6 އިންނެވެ.

އުމުރުން 24 އަހަރުގެ ނަބާހާގެ ދެ ވަނަ މެޗުގައި އަންނަ އަންގާރަދުވަހު ވާދަކުރާނީ ގްރޫޕް އެމްގައި ދެން ހިމެނޭ އަނެއް ކުޅުންތެރިޔާ އެސްޓޯނިއާގެ ކްރިސްޓިން ކުބާއާ އެވެ.

އެންމެ ފަހުން އޮތް ދެ އޮލިމްޕިކްސްގެ އަންހެން ސިންގަލްސްގެ ރިހި އަދި ލޯ މެޑެލް ހޯދާފައިވާ ސިންދު މިއަދުގެ މެޗު ކާމިޔާބުކުރީ ބައިގަޑިއިރުގެ ތެރޭގަ އެވެ. 

މިދިއަ އަހަރެއްހާ ދުވަހު ވަރަށް ބުރަ މަސައްކަތްކޮށް، ބޭރުގެ ގިނަ މުބާރާތްތަކެއްގައި ކުޅެ ހޯދި ނަތީޖާގެ ސަބަބުން އޮލިމްޕިކްސްއިން ފުރުސަތު ލިބުނު ނަބާހާއަށް މިއަދުގެ މެޗުގައި ވަރަށް ފަސޭހައިން ގިނަ ޕޮއިންޓްތަކެއް އަތުން ދޫވި އެވެ. ބައެއް ކޯޗުން ބުނީ މި ކަހަލަ ބޮޑު މުބާރާތެއްގައި، ސިންދު ކަހަލަ ކުޅުންތެރިޔަކާ ކުޅޭ އިރު އެއީ ވެދާނެ ގޮތެއް ކަމަށެވެ.

ނަބާހާއަކީ ދެ އޮލިމްޕިކްސްގައި ރާއްޖެއިން ވާދަކުރާ ފުރަތަމަ ބެޑްމިންޓަން ކުޅުންތެރިޔާ އެވެ.