ޕެނަލްޓީ ގޯލާ އަނާޒުނުވެ ބޭރުވުމުން މެސީ ބޮލުގައި އަތް އަޅައިގެން.
މެސީގެ ޕެނަލްޓީ ގޯލާ ވެސް އަމާޒެއް ނުވި
އާޖެންޓީނާގެ ލިސަންޑްރޯ މާޓީނޭޒް ޖެހި ގޯލަކާއި ފަހު ހާފުގެ އިތުރު ވަގުތުގައި އިކުއެޑޯގެ ކެވިން ރޮޑްރިގޭޒް ޖެހި ގޯލަކާ އެކު ކޮޕާ އެމެރިކާގެ ކުއާޓަ ފައިނަލުގައި އެ ދެ ޓީމު ބައްދަލުކުރި މެޗުގެ ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ.
އާޖެންޓީނާގެ ކެޕްޓަން ލިއޮނެލް މެސީ، ހަމަޖެހިލާފައި ހިނގާފައި ގޮސް ޕެނަލްޓީ ސްޕޮޓުގައި ބޯޅަ ބާއްވައިފި އެވެ. ބޫޓުން ޖަހައި، ފަސްގަނޑު ހެޔޮވަރުކޮށްލުމަށް ފަހު ތެދުވެއްޖެ އެވެ. އުނހު، އަދި ކަމަކު ނުދިޔަ އެވެ. އަނެއްކާވެސް ބޯޅަ އޮތް ގޮތް ބަދަލުކޮށްލުމަށް ފަހު ޖަހަން ތައްޔާރުވާން ފަހަތަށް ހިނގައިގަތެވެ.
ރެފްރީ ކަށިގަނޑު ފުމެލުމާ އެކު ގޯލާ ދިމާލަށް ބަލައިލުމަށް ފަހު ދުވެފައި ގޮސް ޖަހައިފި އެވެ. ޖަހަން ދިމާކުރީ ޗިޕު ޝޮޓެކެވެ. ނުވަތަ މަޝްހޫރު ނަމުން ނަމަ 'ޕަނެންކާ' އެކެވެ. ނަމަވެސް ހުރަސް ދަނޑީގައި ޖެހި، ބޯޅަ ދިޔައީ ބޭރަށެވެ.
މެސީ، ދެ އަތުން ބޯ ކަހަމުން ކަހަމުން ހިނގައިގަތްއިރު، ސަޕޯޓަރުން ތިބީ ބުނާނެ އެއްޗެއް ނޭނގި، ހުއްޓުން އަރާފަ އެވެ.
މިކަން މި ދިމާވީ، ހުރިހާ ގޮތަކުން ވެސް މެސީއާ އެންމެ ވާދަވެރި ކްރިސްޓިއާނޯ ރޮނާލްޑޯއަށް ޔޫރޯގެ ގަދަ 16ގައި ޕެނަލްޓީއަކުން ގޯލެއް ނުޖެހިގެން ބައެއް މީހުންގެ މަލާމާތް އަމާޒުވިތާ ދެ ތިން ދުވަސް ފަހުންނެވެ. ނަމަވެސް ރޮނާލްޑޯ އާއި މެސީ ޖެހި ޕެނަލްޓީގެ އެންމެ ބޮޑު އެއް ތަފާތަކީ މެސީ ޖެހި ޕެނަލްޓީއާ ހިލާފަށް ރޮނާލްޑޯ ޖެހި ޕެނަލްޓީ ގޯލާ އަމާޒު ވުމެވެ. ގޯލަށް ނުވަނީ ކީޕަރު މަތަކޮށްގެންނެވެ.
ރޮނާލްޑޯ ޖެހީ މެޗުގެ ތެރެއިން ލިބުނު ޕެނަލްޓީއެކެވެ. އެ ޕެނަލްޓީއިން ގޯލެއް ނުޖެހި، ޕޯޗުގަލް އާއި ސްލޮވީނިއާ ބައްދަލުކުރި މެޗުގެ ނަތީޖާ ވެސް ނެރުނީ ޕެނަލްޓީ ޝޫޓްއައުޓަކުންނެވެ.
ޕެނަލްޓީ ނުޖެހުނު ނަމަވެސް، އޭގެ 15 ވަރަކަށް މިނެޓު ފަހުން ޝޫޓްއައުޓުގައި ވެސް އެންމެ ފުރަތަމަ ޕެނަލްޓީ ޖަހަން ދިޔައީ ރޮނާލްޑޯ އެވެ. އަދި ގޯލަށް ވައްދާލުމަށް ފަހު ޓީމަށް އިތުރު ހިތްވަރެއް ހޯދައިދިނެވެ. އޭނާގެ ފަހުން ޕޯޗުގަލްއިން ޖެހި ހުރިހާ ޕެނަލްޓީއެއް ވެސް ކާމިޔާބުވިއިރު، އެ ޓީމުގެ ކީޕަރު ވަނީ ތިން ޕެނަލްޓީ މަތަކޮށްފަ އެވެ.
މެސީ ފިޔަވައި އާޖެންޓީނާއިން ޕެނަލްޓީ ޖަހަން އެރި އެހެން ހުރިހާ ކުޅުންތެރިންގެ ޕެނަލްޓީ ވެސް ކާމިޔާބެވެ. ނަމަވެސް ޝޫޓްއައުޓުގައި އާޖެންޓީނާ ސަލާމަތްކޮށްދިނީ، އެންމެ ފަހުން ބޭއްވި ވޯލްޑް ކަޕުގައި އެ ޓީމު ސަލާމަތްކޮށްދިން 'އާޓު ބޮޑު' ކީޕަރު އެމީ މާޓިނޭޒް އެވެ. ރޭ ވެސް އޭނާ ވަނީ އިކުއެޑޯގެ ދެ ޕެނަލްޓީއެއް މަތަކޮށްފަ އެވެ.
ސެމީގައި އާޖެންޓީނާ ބައްދަލުކުރާނީ ވެނެޒުއޭލާ އާއި ކެނެޑާ ބައްދަލުކުރާ މެޗުން މޮޅުވާ ޓީމަކާ އެވެ.
ސެމީއާ ހަމައަށް ދިޔައިރު މި މުބާރާތުގައި މެސީއަށް އަދި ގޯލެއް ނުޖެހެ އެވެ.
ކޮމެންޓް (2)
ހެހެ
މޮޔަ