އެންމެ ފަހުން ބައްސާމް އަމިއްލައަށް އެފްއޭއެމްއާ ދުރަށް ޖެހިވަޑައިގެންފި

އާ މެނޭޖްމަންޓަކަށް ފުރުސަތު ދެއްވުން ސަބަބެއް ކަމަށް ދައްކަވަމުން އެފްއޭއެމްގެ ރައީސް ބައްސާމް އަދީލް ޖަލީލް، އަންނަ މަހު އޮންނަ އިންތިހާބުގައި ވާދަނުކުރައްވަން ނިންމަވައިފި އެވެ.

ބައްސާމްގެ ނިންމުން މިއައީ އެފްއޭއެމުން އޭނާ ބޭރުކުރުމުގެ ހަރަކާތެއް ފެށިފައި އޮތުމުގެ އިތުރުން މަނީ ލޯންޑަރިންއަށް ތުހުމަތުކޮށް ޕްރޮސިކިއުޓަ ޖެނެރަލް (ޕީޖީ)ގެ އެންގެވުމަކަށް ފުލުހުން އެފްއޭއެމްއާ ބެހޭ ޖިނާއީ ތަހުގީގެއް ވެސް ކުރަމުން ދަނިކޮށެވެ.

އަންނަ އަހަރުގެ ކުރީކޮޅު ބާއްވާނެ ކަމަށް ބެލެވުނު އެފްއޭއެމްގެ އިންތިހާބު 31 ޖެނުއަރީ 2024ގައި ބާއްވަން ނިންމިކަން މިއަދު އެ އިދާރާއިން ވަނީ އިއުލާންކޮށްފަ އެވެ. ބައްސާމްގެ ބަޔާން އާންމުކުރެއްވީ އޭގެ ފަހުންނެވެ.

އެފްއޭއެމް މިހާރު އޮތީ ވަރަށް ބޮޑު ދަރަންޏެއްގަ އެވެ. އެތަނުގެ މުވައްޒަފުންނަށް މުސާރަ ނުދެވުމުގެ އިތުރުން ބައެއް މުބާރާތްތައް ކުރިއަށް ގެންދަން ވެސް ވަނީ ހުރަސް އެޅިފަ އެވެ.

އެފްއޭއެމްގެ ރައީސްކަމުގައި ހަތް އަހަރު ހޭދަކުރެއްވި ބައްސާމް ވިދާޅުވީ "ފުޓްބޯޅައަށް ގިނަ ގުނަ ހެޔޮ ބަދަލުތަކެއް ގެނައުމަށްޓަކައި އެތަކެއް މަސައްކަތްތަކެއް ކުރެވިފައިވީ ނަމަވެސް އަދިވެސް ކުރަން ހުރި ކަންކަން އެބަ ހުރި" ކަމަށެވެ.

"އެހެންކަމުން ދިވެހި ފުޓްބޯޅައަށް ފާގަތި ދުވަސްތަކެއް ހޯދައިދިނުމަކީ އަޅުގަނޑުގެ ވެސް އުއްމީދެކެވެ. އެކަން ހާސިލްކުރުމަށް އަޅުގަނޑު ވެސް އެތަކެއް މަސައްކަތްތަކެއް ކޮށްފައިވާ ކަމެކެވެ،" ބައްސާމްގެ ބަޔާނުގައި ވިދާޅުވި އެވެ.

"ވުމާ އެކު ދިވެހި ފުޓްބޯޅަ އައު ޒައާމަތެއްގެ ގިޔާދަތުގެ ދަށުން ކުރިއަށް ގެންދިއުމަށް ފުރުސަތު ދިނުމަކީ އެންމެ ރަނގަޅު ކަމެއް ކަމުގައި ދެކޭ ހާލު، ކުރިއަށް މި އޮތް އެފްއޭއެމްގެ އިންތިހާބުގައި އަޅުގަނޑު ވާދަނުކުރާނެކަން އިއުލާންކުރަމެވެ."

އޭނާ ވިދާޅުވި ގޮތުގައި އެފްއޭއެމްގެ އިދާރީ ކަންކަން މިހާރު ވާނީ ނައިބު ރައީސް އާއި ޖެނެރަލް ސެކްރެޓަރީއާ ހަވާލުކުރައްވައިފަ އެވެ. ނައިބު ރައީސްއަކީ ކުރީގެ ގައުމީ ޓީމުގެ ފޯވަޑް އަލީ އުމަރެވެ.

އެފްއޭއެމްގެ އިންތިހާބުގައި ވާދަކުރައްވާނެ ކަމަށް މިހާތަނަށް އިއުލާންކުރައްވާފައި ވަނީ، 2016ގައި ބައްސާމް އަތުން ބަލިވެވަޑައިގެންނެވި ގައުމީ ޓީމުގެ ކުރީގެ ފޯވަޑް އަދި ރައްޔިތުންގެ މަޖިލިހުގެ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) އެވެ.