އެއްމާބަނޑު ދެބެން އެކުގައި ގޮސް އެ ހޯދައިދިނީ ރަން މެޑެލް

މިއަދު އެންމެ ފުރަތަމަ އޮތް ސިންގަލްސް ފައިނަލްގައި ދައްތަ ފާތުމަތު ނަބާހާ އަބްދުއްރައްޒާގު ބަލިވެ ލިބުނު މާޔޫސްކަން މާ ގިނަ ވަގުތަކަށް ދެމިގެން ނުދިޔަ އެވެ. ދެން ކޯޓަށް ނުކުތީ ދައްތައާ އެކު ކޮއްކޮ، އައިމިނަތު ނަބީހާ އަބްދުއްރައްޒާގެވެ. ދެ ކުޅުންތެރިން ރާއްޖެއަށް އެ ހޯދައިދިނީ އައިއޯއައިޖީގެ ބެޑްމިންޓަންގެ އަންހެން ޑަބަލްސްއިން ރަން މެޑެއްޔެވެ.

އެއްމާބަނޑު ދެބެން ކަމަށްވާ ނަބާހާ އާއި ނަބީހާ، މަޑަގަސްކަރައިގައި ކުރިއަށް ދާ އިންޑިއަން އޯޝަން އައިލެންޑް ގޭމްސްގެ ޑަބަލްސް ޗެމްޕިއަންކަން ހޯދީ ފައިނަލްގައި މޮރިޝަސްގެ ލޯނާ ޓީ.ޖޭ ބޮދާ އާއި ކޮބިޓާ ދޫހީ، ސީދާ ދެ ސެޓުން 21-14 ،21-15 އިން ބަލިކުރުމަށް ފަހު އެވެ. މިއީ 2019ގައި އޮތް އައިއޯއައިޖީގެ ބެޑްމިންޓަން އަންހެން ޑަބަލްސް ފައިނަލްގައި ދެ ކުޅުންތެރިން ހޯދި ރިހި މެޑެއްޔަކީ، މިހާރު އެ މީހުންގެ ފެންވަރެއް ނޫންކަން ސާބިތުކޮށްދިން މޮޅެކެވެ.

އެފަހަރުގެ މުބާރާތުގެ އަންހެން ސިންގަލްސް ޗެމްޕިއަންކަން ނަބީހާ ހޯދައިގެން ކަރުގައި އެޅުވި ރަން މެޑެއްޔަކީ، ބޭރުގެ މުބާރާތެއްގެ ބެޑްމިންޓަނުން ރާއްޖެ ކާމިޔާބުކުރި ފުރަތަމަ ރަން މެޑެއްޔެވެ. މިއަދު ހެނދުނު ނަބާހާއަށް، ކޮއްކޮ އެ ލިބިގަތް ޝަރަފާ ކައިރިއަށް ދަތުރުކުރި އެވެ. ނަމަވެސް ފައިނަލްގައި މޮރިޝަސްގެ ޖޭ.ކޭ.އެލް ލުޑިކް އަތުން 21-13 ،21-19 އިން، ބަލިވެ ހިތްހަމަޖައްސާލަން ޖެހުނީ ރިހި މެޑެލްއިންނެވެ.

އުމުރުން 23 އަހަރުގެ ނަބާހާ އާއި ނަބީހާއަކީ އެކުގައި ބެޑްމިންޓަން ކުޅެން ފެށި، އެކުގައި ކުރިއަރަމުން އަންނަ އަދި ދެބެންގެ ލޯބި އެހާމެ ބޮޑަށް ދައްކުވައިދޭ ދެ ކުޅުންތެރިން ވެސް މެ އެވެ.

"އެކެއްގެ ގޮތުގައި މަސައްކަތް މި ކުރަނީ. ވާދަވެރިންގެ ގޮތަށް ކޯޓަށް ދެ ފަޅިއަށް ދެ މީހުން އެރީމަ ފައިޓް ކުރާނީ ހަމަ މޮޅުވާން ދެ މީހުން ވެސް. ކޮންމެ ކަމެއް ކުރަން ޖެހުނަސް މޮޅުވުމަށް ދެ މީހުން ވެސް މަސައްކަތް ކުރާނީ،" މީގެ ފަސް އަހަރު ކުރިން، 'މިހާރު'އަށް ދިން އިންޓަވިއުއެއްގައި، ނަބާހާ ބުންޏެވެ.

"އެކަމަކު ކޯޓުން ފައިބައިފައި ޔަގީނުން ވެސް ދައްތަ އާއި ކޮއްކޮ މިއީ. ދެ މީހުން އެއްކޮށް މަސައްކަތް ކުރަމުން މި އަންނަނީ. ނަބާއަށް ލިބޭ ކޮންމެ އެއްޗަކީ ހަމަ ނަބީއަށް ވެސް ލިބޭ އެއްޗެއް."

ދެ ކުޅުންތެރިންނަށް އުފާވެރިކަމެވެ. އާއިލާއަށް އުފާވެރިކަމެވެ. އަދި މުޅި ގައުމަށް ވެސް އުފާވެރިކަމެވެ.