މެކްއާ މެދު އާޓިސްޓުން އޮއްސާލަނީ ޝަކުވާ އާއި ތުހުމަތުތައް

ގައުމީ އާޓް ގެލަރީގެ ފާރުތައް ފަޅުފިލުވައިދީފައި ހުރީ ދިވެހި ފަންނުވެރިންގެ ހުނަރުވެރިކަމުންނެވެ. އެކި ކުލަތަކާއި އިހުސާސްތަކާއި މައުލޫއުތައް ރަމްޒުކޮށްދޭ ވަރަށް ތަފާތު ކުރެހުންތަކެކެވެ. ބަލާލަން ރީތި، މާނަ ފުން، އަގުހުރި މަސައްކަތްތަކެކެވެ.

މޯލްޑިވިއަން އާޓިސްޓް ކޮމިއުނިޓީ (މެކް)އިން ކޮންމެ އަހަރަކު ކަހަލަ ގޮތަކަށް އިންތިޒާމްކުރާ އަންވެއިލިން ވިޝަންސް (ޔޫވީ)އަކީ ރާއްޖޭގެ އާޓިސްޓުންގެ އުފެއްދުންތައް ދައްކާލާ އެންމެ ބޮޑު މައުރަޒެވެ. ރާއްޖޭގެ އެކި ކަންކޮޅުތަކުން ބައިވެރިވާ އާޓިސްޓުންގެ ހުނަރުވެރިކަން ފެންނަ މި މައުރަޒުގެ މަގުބޫލުކަން އަހަރުން އަހަރަށް އަންނަނީ ބޮޑުވަމުންނެވެ. މިދިޔަ މަހު ޔޫވީގެ ހަތްވަނަ މައުރަޒު ކާމިޔާބު ކަމާ އެކު ނިންމާލީ، އެ އިވެންޓަށް މިހާތަނަށް އެންމެ ގިނަ އަދަދަކަށް އާންމުން ޒިޔާރަތް ކުރި އަހަރުގެ ގޮތުގަ އެވެ.

ނަމަވެސް އޭގެ އަނެއްކޮޅުން، މި މައުރަޒު ރާވައި ހިންގާ ގޮތާ މެދު އާޓިސްޓުންގެ ތެރޭގައި ކަންބޮޑުވުން ވެސް ދަނީ މައްޗަށެވެ.

"އަންވެއިލިން ވިޝަންސް އާއި މެކްގެ މަގުބޫލުކަން އިތުރުވެ އެމީހުންނަށް އެތައް ސްޕޮންސަރުންނެއް ލިބެމުންދާ އިރު، އަދި ނޭޝަނަލް އާޓް ގެލަރީ ވެސް މި އިވެންޓު ބާއްވަން ހިލޭ ލިބޭ އިރު، އަދި ޕްރިންޓިން ފަދަ ހުރިހާ ކަމެއް ވެސް ސްޕޮންސަރުން މެދުވެރިކޮށް ކުރާ އިރު، އަޅުގަނޑުގެ ސުވާލަކީ ކީއްވެހޭ އިވެންޓަށް ވަންނަން 25 ރުފިޔާގެ ފީއެއް ނަގަނީ؟" މަޝްހޫރު ޑިޖިޓަލް އާޓިސްޓް އަލީ ޝިމްހާގް ސުވާލު އުފެއްދި އެވެ.

ކަންބޮޑުވުން ފާޅުކުރި ފަންނުވެރިންގެ މައިގަނޑު އެއް ކަންބޮޑުވުމަކީ މި އިވެންޓުގެ އިންތިޒާމްތަކާއި ފައިސާގެ ކަންކަމުގައި ދެފުށް ފެންނަ މިންވަރު ކުޑަވުމެވެ.

"އަހަރެމެންގެ ޓެލެންޓް ބޭނުންކޮށްގެން ހިންގާ އެގްޒިބިޝަނެއްގައި އަހަރެމެންނަށް އެނގެން ޖެހޭނެ އެ މީހުންނަށް ލިބޭ ފައިސާގެ އަދަދު އަދި އެ ފައިސާ ބޭނުންކުރާ ގޮތް،" އަންވެއިލިން ވިޝަންސްގެ އެކި މައުރަޒުތަކުގައި ބައިވެރިވެފައިވާ އާޓިސްޓެއް، ނަން ނުޖަހާ ގޮތަށް ވާހަކަދައްކަމުން، ބުންޏެވެ.

"އަޅުގަނޑަށް ހީވަނީ [ޔޫވީގައި ބައިވެރިވާ] ހުރިހާ އާޓިސްޓުންނަށް ވެސް ކޮންމެވެސް އެއްޗެއް ލިބެން ޖެހޭނެހެން. ކެޓަލޮގް އާއި ޓިކެޓު ވިއްކައިގެން ލިބޭ ލާރީގެ ކޮންމެވެސް އިންސައްތައެއް ނަމަވެސް،" މިއީ ވެސް ބައިވެރިއެއްގެ ހިޔާލެވެ.

އަންވެެއިލިން ވިޝަންސްގެ މި އަހަރުގެ މައުރަޒުގައި އެކި އުމުރުފުރާގެ 105 އާޓިސްޓުންގެ އުފެއްދުންތައް ބައިވެރިކުރި އެވެ. ގިނަ އަދަދެއްގެ ޒުވާނުންނާއި 18 އަހަރު ނުފުރޭ އުންމީދީ އާޓިސްޓުންގެ ހުނަރު ވެސް ވިދާލި އެވެ. ދިވެހި ފަންނުވެރިންގެ ޗާލު މަސައްކަތްތައް އެއް ތަނަކުން މިގޮތަށް ފެނުމުން ފަހުރުވެރިވެ، ރާއްޖޭގެ ފަންނުވެރިކަމުގެ ކުރިމަގާ މެދު އުންމީދު އާވެ އެވެ.

ކުރެހުންތެރިން އެކި މީޑިއަމްތަކުގައި ތައްޔާރުކުރާ އާޓްވޯކްތައް ދައްކާލާ މި މައުރަޒުގައި، އެ އާޓްވޯކްތައް ގަތުމުގެ ފުރުސަތު މައުރަޒަށް ޒިޔާރަތްކުރާ މީހުންނަށް ވަނީ ހުޅުވާލައިފަ އެވެ. އަންވެެއިލިން ވިޝަންސް މިހާރު ވެފައިވަނީ އާޓިސްޓުންގެ މަސައްކަތްތަކަށް ސަމާލުކަން ހޯދާ، އާންމުންނަށް ފެނިދެނިވެ، އެހެނިހެން އާޓިސްޓުންނާ ގުޅުން ބަދަހި ކުރަން ފަންނުވެރިންނަށް ލިބޭ އެންމެ ބޮޑު ޕްލެޓްފޯމަށެވެ.

'ދައުރު'އާ ވާހަކަ ދެއްކި އާޓިސްޓުން ވެސް އެކަން ފާހަގަކޮށް، ޝުކުރުވެރިވި އެވެ.

ނަން ނުޖަހާ ގޮތަށް ކުރިން ވާހަކަދެއްކި އާޓިސްޓަކު ފާހަގަކުރި ގޮތުގައި:

"މެކް އިން މި ކުރާ ކަންތައް އަޅުގަނޑުމެން ބަލައިގަންނަން. މިއީ ރާއްޖޭގައި މިގޮތަށް ބާއްވާ އެންމެ ބޮޑު އިވެންޓް. އެކަމަކު އަޅުގަނޑު ދެކޭ ގޮތުގައި [މެކް އިން] މިކަން ކުރަނީ އެހާ ދެފުށް ފެންނަ ގޮތަކަށް ނޫން،" މައުރަޒުގެ ބައިވެރިޔާ ބުންޏެވެ.

އެހެން ބައެއް އާޓިސްޓުންގެ ފަރާތުން ވެސް ސުވާލުތަކާއި ކަންބޮޑުވުންތައް އިވުނެވެ. އަހަރަކަށް ވުރެ އަހަރެއް އިވެންޓު ބޮޑުވަމުންދާ އިރު، ބޮޑެތި އިސްލާހުތަކެއް ގެންނަން ޖެހިފައިވާ ކަމަށް އެ ބައިވެރިން ގަބޫލުކުރެ އެވެ.

އަންވެއިލިން ވިޝަންސްގައި މިފަހަރު ބައިވެރިވި އާޓިސްޓުންގެ ތެރެއިން 'ދައުރު'އާ ވާހަކަދެއްކި ހުރިހާ އާޓިސްޓުންގެ މެދުގައި ވެސް ހުރީ އެއްކަހަލަ ޝަކުވާތަކެކެވެ. އެ މީހުން ފާހަގަކުރި ބައެއް ކަންކަމަކީ:

"ރަށްރަށުން ވެސް ވަރަށް ގިނަ ކުދިން އާދޭ [ޔޫވީގައި ބައިވެރިވާން]. އެކުދިންގެ ހުރުމާއި ކެއުމަށް ވެސް ވަރަށް ބޮޑު ހަރަދެއް ކޮށްފައި އަންނަނީ،" އާޓިސްޓަކު ފާހަގަކުރި އެވެ.

އޭނާ ބުނިގޮތުގައި އާޓްއަށް އޮންނަ ލޯތްބެއްގެ ބޮޑުކަމުން އެ މީހުން މައުރަޒަށްޓަކައި އެ ހޭދަކުރި ނަމަވެސް، އާޓްވޯކް ނުވިކިއްޖެ ނަމަ އެއީ އެ މީހުންނަށް ލިބޭ ވަރަށް ބޮޑު ގެއްލުމެކެވެ.

ފައިސާ ނުލިބުމަށް ވުރެ ވެސް އާޓިސްޓުންނަށް ބޮޑީ، ޔޫވީ މެދުވެރިކޮށް މެކްއަށް ލިބޭ ފައިސާއަށް ވާނުވާ އެ މީހުންނަށް ނޭނގުމުގެ ކަންބޮޑުވުމެވެ. މެކް އިން 'ދައުރު'އަށް ބުނި ގޮތުގައި މި އަހަރުގެ ޔޫވީއަށް ޓިކެޓު ގަނެގެން 6،000އަށް ވުރެ ގިނަ މީހުން ޒިޔާރަތްކުރި އެވެ. އަދި ޕްރިންޓްކުރި 300 ކެޓަލޮގް ތެރެއިން 100އެއްހާ ކެޓަލޮގް ވިކިފައިވާ ކަމަށް ވެސް ބުންޏެވެ. އެހެންކަމުން:

"އަހަރެން ގަބޫލުކުރަނީ މެކްއިން މިކަމުގައި ކޮންމެހެން ޖަވާބުދާރީ ވާން ޖެހޭނެ ކަމަށް. އަހަރެމެންގެ ޓެލެންޓް ބޭނުންކޮށްގެން ހިންގާ އެގްޒިބިޝަނެއްގައި އަހަރެމެންނަށް އެނގެން ޖެހޭނެ އެ މީހުންނަށް ލިބޭ ފައިސާގެ އަދަދު އަދި އެ ފައިސާ ބޭނުންކުރާ ގޮތް،" އާޓިސްޓަކު ބުންޏެވެ.

"ވަރަށް ގިނަ އާޓިސްޓުން އެބަ ދައްކާ މިވާހަކަ. އެމީހުން ވެސް ބުނަނީ މި އިވެންޓް 'އިޒް ރިގްޑް' އޭ. [މެކް އިން] އާޓިސްޓުން 'އެކްސްޕްލޮއިޓް' ކުރަނީއޭ."

ޔޫވީ ރާވާ ހިންގަމުން އަންނަ މެކްއަކީ އާޓިސްޓުން ކުރިއަރުވާ، އާޓިސްޓުންނަށް ފުރުސަތު ފަހިކޮށްދީ، އަލަށް އުފެދިގެން އަންނަ ޒުވާން އާޓިސްޓުންނަށް ދާއިރާގައި ފައިހަމަކޮށްދޭން އެހީތެރިވުމުގެ މަގްސަދުގައި ޖެނުއަރީ 2016ގައި އުފެއްދި ޖަމިއްޔާއެކެވެ. އެ މަގުން ރަނގަޅު މަސައްކަތްތަކެއް މެކް އިން ފުރަތަމަކޮޅު ކުރި ނަމަވެސް މިހާރު އެ ޖަމިއްޔާގެ މަގްސަދު އޮޅިފައިވާ ކަމަށް ބައެއް އާޓިސްޓުން ތުހުމަތުކުރެ އެވެ.

ޑިޖިޓަލް އާޓިސްޓް ޝިމްހާގް ވަނީ، އިވެންޓުގެ ހުރިހާ ހަރަދަކަށް ސްޕޮންސަރުންގެ އަތުން ފައިސާ ލިބޭ އިރު، މައުރަޒަށް ޒިޔާރަތްކުރާ މީހުންގެ އަތުން 25 ރުފިޔާގެ ފީއެއް ނެގުމާ މެދު އޭނާ އުފައްދާ ސުވާލު މެކްގެ ބޯޑަށް ވެސް ކުރިމަތިކޮށްފަ އެވެ. މީގެ އިތުރުން، ޖަމިއްޔާގެ ހައިސިއްޔަތުން މެކްއިން ތައްޔާރުކުރާ އަހަރީ ރިޕޯޓާއި މިދިޔަ އަހަރުގެ އަންވެއިލިން ވިޝަންސް ހަރަކާތުގެ ހަރަދުތަކާ ގުޅޭ ރިޕޯޓް ހާމަކުރަން ވެސް ބޯޑު މެމްބަރުން ގާތު މީގެ ކުރިން އެދިފައިވާނެ ކަމަށް ޝިމްހާގް ބުންޏެވެ. ނަމަވެސް އޭނާ ބުނީ، އެއިން އެއްވެސް ސުވާލަށް މިހާތަނަށް ޖަވާބު ލިބިފައި ނުވާ ކަމަށެވެ.

"މެކްގެ އެންމެ ކުރީގެ އެއް މެމްބަރުގެ ހައިސިއްޔަތުން އަޅުގަނޑު ގަބޫލުކުރަނީ މެކް ވަކި މިންގަނޑެއްގައި ހިފެހެއްޓުމަށް ޑިމާންޑް ކުރުމުގެ ހައްގު އަޅުގަނޑަށް ލިބޭ ކަމަށް، އަދި އެހެން އާޓިސްޓުން ވެސް އެގޮތަށް އެކަން ކުރަން ޖެހޭނެ ކަމަށް،" ޝިމްހާގް ބުންޏެވެ.

މެކްއަށް ފައިސާ ވަންނަ ގޮތާއި ހަރަދުކުރާ ގޮތް ދެފުށް ފެންނަ ނިޒާމެއްގެ ތެރެއިން ހާމަނުކުރާ ކަމަށް ތުހުމަތުކުރުމުގެ އިތުރުން، އާޓިސްޓުންގެ ހުނަރުތައް ނަހަމަ ގޮތުގައި ބޭނުންކޮށްގެން މެކްގެ ބޯޑު މެމްބަރުން މަންފާ ހޯދާ ކަމުގެ ތުހުމަތުތަކެއް ވެސް އާޓް ކޮމިއުނިޓީގެ ތެރެއިން ދަނީ އަމާޒުވަމުންނެވެ.

"މެކް އަކީ ފައިދާ ހޯދަން އުފައްދާފައި އޮތް ޕްރައިވެޓް ކުންފުންޏެއް ނަމަ މި ވާހަކައެއް ނުދައްކާނަން. [އެކަމުގައި] އެއްވެސް މައްސަލައެއް ވެސް ނެތް. އެކަމަކު އެންޖީއޯއެއްގެ ގޮތުގައި މިހެން އޮޕަރޭޓް ކޮށްގެން ނުވާނެ،" މައްސަލައިގެ ބާވަތުން ނަން ނުޖަހާ ގޮތަށް 'ދައުރު'އާ ވާހަކަދެއްކި ތަޖުރިބާކާރު ފަންނުވެރިޔަކު ބުންޏެވެ.

އޭނާ ފާހަގަކުރި ގޮތުގައި:

"މިދިޔަ އަހަރާއި މި އަހަރާ ދޭތެރޭގައި އެމީހުން އިތުރު އެއްވެސް އިވެންޓެއް ނުބާއްވަންޏާ މެކް އިން ކީއްކުރީ އެހެންވެއްޖެއްޔާ؟ އެ ލާރިއަށް ކިހިނެއްވީ؟" އޭނާ ސުވާލު އުފެއްދި އެވެ.

މެކް އިން އާޓިސްޓުން ކުރިއަރުވާކަމަށް ބުނި ނަމަވެސް، އޭނާގެ އެންމެ ބޮޑު އެއް ޝަކުވާއަކީ، އަސްލު ހަގީގީ މާނައިގައި އާޓިސްޓުން ކުރިއަރުވަން މެކް އިން އެއްވެސް މަސައްކަތެއް ކުރާތަނެއް ނުފެންނަކަމެވެ.

"އެ މީހުންނަކީ ރާއްޖޭގެ އާޓިސްޓް ކޮމިއުނިޓީއޭ ބުނަނީ. އެހެންވިއްޔާ ކޮބާ ވޯކްޝޮޕްތައް؟ ކޮބާ ކޮމިއުނިޓީ؟ އަސްލު ކޮން ކަމެއް ކުރަނީ..؟ [ޔޫވީގައި ބައިވެރިވާ ޒުވާނުންނަށް ވެސް] ނުލިބޭ އެއްވެސް ކަހަލަ ކޮންސްޓްރަކްޓިވް ފީޑްބެކްއެއް، އެއްވެސް ކަހަލަ ޓްރެއިނިންއެއް، އެއްވެސް ކަހަލަ ސަޕޯޓެއް. ޔޫވީ އެނައުންސް ކޮށްލާފައި، އިވެންޓް ބާއްވާލާފައި، ސެޓިފިކެޓެއް ދީފައި ނިންމާލަނީ،" އޭނާ ބުންޏެވެ.

މީގެ އިތުރުން ވެސް މެކްއާ ބެހޭ ގޮތުން ފާހަގަކުރި ބައެއް މައްސަލަތަކަށް އޭނާ އަލިއަޅުވާލި އެވެ. އޭގެ ތެރޭގައި:

ފާއިތުވެ ދިޔަ އަހަރުތަކުގައި، މެކްގެ ހިންގުމަށް އައި ބަދަލުތައް ގާތުން ފެނިފައިވާނެ އެކަކީ، ކްރިއޭޓިވް ޑައިރެކްޓަރެއްގެ މަގާމުގައި މެކްގެ ބޯޑު މެމްބަރެއްގެ ގޮތުގައި މީގެ ކުރިން ހުރި ކޮންސެޕްޗުއަލް އާޓިސްޓް މުސްތަފާ މުހައްމަދު (ކުލަ ފިހި) އެވެ. އޭނާ މެކްގެ ބޯޑަށް ތިން އަހަރުގެ ދެ ދައުރަށް ހޮވުނެވެ. ނަމަވެސް ދެވަނަ ދައުރު ނިމުމުގެ ކުރިން، މި އަހަރުގެ ކުރީ ކޮޅު އޭނާ ވަނީ އަމިއްލައަށް އެ މަގާމުން އިސްތިއުފާ ދީފަ އެވެ.

ފުރަތަމަ 2019ގައި ބޯޑަށް ހޮވުނު އިރު، އޭނާއަކީ ވަރަށް ހަރަކާތްތެރިކަމާ އެކު މެކްގެ ކަންކަމުގައި އުޅުނު ފަންނުވެރިއެކެވެ. އޭރު ވެސް ބޯޑުގައި ތިބީ، ގާތްގަނޑަކަށް މިހާރުވެސް ބޯޑުގައި ތިބި މީހުންނެވެ.

"އޭރު އަހަރެމެން ވަރަށް ފައިޓު ކުރާ ކަމެއް އިވެންޓުތައް ބާއްވާއިރު ފަންޑު ނުލިބިގެން އެހެން އުޅެން ޖެހޭ ޖެހުން. މިހާރު ވެއްޖެއްޔާ ޕްރޮޕޯޒަލްއެއް ހަދާލާ އިރަށް ލިބޭނެ،" އޭރު މެކް އިން ބާއްވާފައިވާ ބޮޑު އެގްޒިބިޝަނެއް ނެތުމުން، ސްޕޮންސާ ހޯދަން ދައްކާނެ އެއްޗެއް ނެތްކަން ފާހަގަކުރަމުން އޭނާ ބުންޏެވެ.

މުސްތަފާ އިތުރަށް ކިޔައިދިން ގޮތުގައި:

"[ދެން] 2021ގެ ފަހުން، އެހިސާބުން އާޓް ގެލެރީ ލިބެން ފެށި ފްރީކޮށް. އެހެންވީމަ އެއްވެސް ބޮޑު ހަރަދެއް ނުދާނެތާ އެކަމަކަށް. ދެން 'ތިންކް' އާއި ޕްރިންޓްކުރާ ތަންތަނުން ވެސް އޭރު ސްޕޮންސާ ލިބޭ. ދެން އިންނާނީ ވަނަ ލިބޭ ކުދިންނަށް ދޭ ފައިސާގެ އިނާމު. އެކަމަކު އެއީ 5،000ރ.، 3،000ރ.، ވަރު،" އެހެންކަމުން، ފަހަކަށް އައިސް ޔޫވީއަށް މާ ބޮޑު ހަރަދެއް ކުރަން ނުޖެހޭކަން ގަބޫލުކުރަމުން މުސްތަފާ ބުންޏެވެ. 

ހާއްސަކޮށް، މިހާރު ހުރިހާ ކަމަކަށް ސްޕޮންސަރުން ލިބޭ އިރު، އޭނާ ގަބޫލުކުރަނީ، ހަރަދުތައް ފޫބައްދަން މެކްއިން ޓިކެޓާއި ކެޓަލޮގް ވިއްކަން ނުޖެހޭނެ ކަމަށެވެ. އާޓިސްޓުންގެ މަސައްކަތް ހިމަނައިގެން އެފަދަ ކެޓަލޮގެއް ވިއްކާ ނަމަ، އޭގެ އިންސައްތައެއް ކޮމިޝަންގެ ގޮތުގައި އާޓިސްޓުންނަށް ލިބެން ޖެހޭނެ ކަމަށް ވެސް އޭނާ ގަބޫލުކުރެ އެވެ.

'ދައުރު'އާ ވާހަކަ ދައްކަމުން 26 އަހަރުގެ ޒުވާން އާޓިސްޓް ފާހަގަކުރި އެއް ވާހަކަ އަކީ، "ބޯޑު މެމްބަރުންނަށް ކޮންމެ މަހަކު ފައިސާ ލިބޭ ގޮތަށް ހަދަން" 2021 ހިސާބުގައި މަޝްވަރާ ކުރެވުނު ކަމެެވެ. ނަމަވެސް ބޯޑު މެމްބަރުން އެ އުސޫލުން ފައިސާ ނަގަން ފެށި ކަމެއް އޭނާއަކަށް ޔަގީނެއް ނޫނެވެ.

ސަބަބަކީ އެހިސާބަށް ދިޔަ އިރު، އޭނާއަކީ ބޯޑު މެމްބަރެއްގެ ގޮތުގައި ހުއްޓަސް 'ނަމެއްގައި' ހުރި މީހަކަށް ވުމެވެ. ބޯޑުން ނަގާ ބޮޑެތި ނިންމުންތަކާ ބެހޭ މައުލޫމާތާއި، ކަންކަން ކުރާ ގޮތުގެ ތަފްސީލެއް މުސްތަފާއަކަށް ނޭނގެ އެވެ.

"ގާތްގަނޑަކަށް ދެތިން އަހަރު ކުރިން ފެށިގެން ބޯޑު މީޓިންތަކަށް ވެސް ނުކިޔާ،" އޭނާ ބުންޏެވެ.

މުސްތަފާ ގަބޫލުކުރާ ގޮތުގައި އޭނާ އެގޮތަށް ދުރުކޮށްލާފައި ހުރީ އެމީހުންގެ ވިސްނުމާ އޭނާގެ ވިސްނުން އެއްގޮތް ނުވެފައި، އެމީހުންގެ ހިޔާލުތަކާ މާ ގިނައިން ދެކޮޅުހެދޭތީ އެވެ. އިސްތިއުފާ ދޭން ޖެހޭ ހިސާބަށް ވެސް ދިޔައީ، އޭނާ ބުނިގޮތުގައި، އެ ސަބަބުތަކާ ހުރެ އެވެ.

މިސާލަކަށް އޭނާ ނެގީ، އޭރު ވެސް އާޓިސްޓުން ބޯޑާ ހަމައަށް ގެންނަ ޝަކުވާތައް ބޯޑު މެމްބަރުންނަށް މުހިއްމު ނުވުމެވެ. މައުލޫމާތު ނޭނގިގެން، އާޓްވޯކް ވިއްކާ އިރު އަގު ހަދަންވީ ގޮތް ނޭނގިގެން، ޔޫވީއަށް ކުދިން ހޮވާ އިރު ބަލާ ކަންތައްތަކެއް ނޭނގިގެން އެކި އާޓިސްޓުން އޭރުވެސް ކަންބޮޑުވުން ފާޅުކުރިކަން އޭނާ ފާހަގަކުރި އެވެ.

"ބޯޑުން އެފަދަ ޝަކުވާތަކަށް ޖަވާބެއް ނުދިނުން އެއީ އަޅުގަނޑަށް އެހާ ބަލައިގަނެވުނު ކަމެއް ނޫން. ކިތައްމެ ކުޑަ ކުއްްޖަކަސް ކިތައްމެ އާދައިގެ މީހަކަސް ވާހަކަ ދައްކަން ޖެހޭނެ ކަމަށް ގަބޫލުކުރަނީ،" މުސްތަފާ ބުންޏެވެ.

"އޭރު ވެސް އަންނަ ޝަކުވާތައް މިހާރު ވެސް އެ އަންނަނީ. އެ މައްސަލަތައް ހުންނަތާ އެތައް އަހަރެއް ވެއްޖެ. އެތައް އަހަރެއް ފަހުން ވެސް ރަނގަޅު ނުވަނީ. ރަނގަޅު ނުވީމަ، އެނގެއެއްނު އެއީ ގަސްތުގައި ކަން. އެހެންވީމަ ކަންނޭނގެ މިހާރު އެހާ ބޮޑަށް އެވާހަކަ އެ ދެކެވެނީ."

އެގޮތުން، އޭނާއަށް ފާހަގަކުރެވުނު ބޮޑު އެއް މައްސަލަ ތަފްސީލްކޮށްދެމުން މުސްތަފާ ބުނީ:

ރާއްޖެއިން ބޭރުގެ އިވެންޓުތަކުގައި ބައިވެރިވާން ދިވެހި އާޓިސްޓުންނަށް ލިބޭ ފުރުސަތުގެ ކަންކަން ވެސް ދިޔައީ ހަމަ އެފަދަ ގޮތަކަށެވެ. 'ޕްރޮސެސް އަވަސްކޮށްލުމުގެ ގޮތުން' އެފަދަ ފުރުސަތުތައް ލިބިގެންދަނީ ބޯޑުގައި ތިބި މެމްބަރުންނަށް ކަމަށް މުސްތަފާ ވެސް ބުންޏެވެ.

"އެކަހަލަ ކަންކަން ބޯޑުގައި ހުރެފައި ރަނގަޅު ނުކުރެވެންޏާ ވަރަށް އުނދަގޫ ވާނެ ދޯ. އެހެންވެ އަސްލު އަހަރެންނަށް އެތަނުގައި [ބޯޑުގައި] ނުހުރެވުނީ،" މުސްތަފާ ބުންޏެވެ.

"އަހަރެންނަށް އިހުސާސް ކުރެވުނީ، އާޓިސްޓުންނަކީ ވަކި ބައެކޭ، މި އެންމެން [މެކްގެ ބޯޑު] އަކީ ވަކި ބައެކޭ. އެ ފަރަގު ބޮޑުވެގެން ބޯޑުން ދުރުވާން ވިސްނީ."

މުސްތަފާ އިތުރަށް ފާހަގަކުރީ ޔޫވީ އަކީ މިހާރު ރަސްމީ ފަރާތްތަކާ ގުޅިގެން ހިންގާ ހަރަކާތެއްކަމެވެ. ނޭޝަނަލް ސެންޓަރު ފޯ ދި އާޓްސް (އެންސީއޭ) އާ ވެސް ގުޅިގެން އިވެންޓް ބާއްވާ އިރު، މެކް އިން ފަންޑު ހޯދާ ގޮތާއި ބޭނުންކުރާ ގޮތް ބަލަން ޖެހޭނެކަމަށް އޭނާ ގަބޫލުކުރެ އެވެ. އެކަން ގަވައިދާ ހިލާފަށް ކުރާ ނަމަ ފިޔަވަޅު އެޅެން ޖެހޭނެ ކަމަށް ވެސް ބުންޏެވެ.

ޔޫވީގެ ބައިވެރިންނާއި އާޓްގެ ދާއިރާގައި ފައިހަމަކޮށްފައިވާ އާޓިސްޓުންގެ ކަންބޮޑުވުންތައް ގިނަވެ، މި އަހަރުގެ ޔޫވީ ނިންމާލުމުގެ ރަސްމިއްޔާތުގައި މެކްގެ ފަރާތުން ބުނެފައިވަނީ އަހަރީ ރިޕޯޓާއި ޔޫވީގެ ހަރަދުތަކާއި ލިބުނު ފައިސާގެ ތަފްސީލް އާންމުކުރާނެ ކަމަށެވެ. 

މެކްގެ ބަހެއް ހޯދަން 'ދައުރު' އިން ގުޅުމުން އެ ޖަމިއްޔާގެ ޗެއާޕާސަން ކަމުގައި ދާދި ފަހަކާ ޖެހެންދެން ހުންނެވި އަހުމަދު އަޒްމީ (ބާޗީ) ދެއްވީ، މި އަހަރުގެ އަންވެއިލިން ވިޝަންސް ނިންމުމުގެ ޖަލްސާގައި ޔޫވީގެ ބައިވެރިންނަށް ވެސް އޭނާ ދެއްވި ޖަވާބެވެ. އޭނާ ވިދާޅުވި ގޮތުގައި:

މެކްގެ ހާމަކަމާއި ފައިސާގެ ކަންކަން ހުރި ގޮތާ މެދު އާޓިސްޓުން ފާޅުކޮށްފައިވާ ކަންބޮޑުވުންތަކާ ގުޅިގެން 'ދައުރު'ން ކުރި ސުވާލުތަކަށް ވެސް އަޒްމީ ޖަވާބު ދެއްވި އެވެ. ނަމަވެސް ހޯމަ ދުވަހުގެ ރޭ މެކްގެ ޗެއާޕާސަން ކަމުން އިސްތިއުފާ ދެއްވާފައި ވުމުން މެކްގެ ފަރާތުން ވާހަކަދެއްކެވުމުގެ ބަދަލުގައި، އޭނާ އެކަމުގައި ފާޅުކުރެއްވީ އަމިއްލަ ހިޔާލެވެ. އެގޮތުން އޭނާ ވިދާޅުވީ:

މެކް އިން އަންވެއިލިން ވިޝަންސް 2023އަށް ހުށަހެޅި ސްޕޮންސާޝިޕް ޕްރޮޕޯޒަލް ޑޮކިއުމެންޓެއް ލީކުވެ، އެކަމާ ގުޅިގެން ވެސް މެކްގެ ބޯޑަށް ބައެއް އާޓިސްޓުންގެ ފާޑުކިޔުން އަމާޒުވި އެވެ. އެ ޑޮކިއުމެންޓް 'ދައުރު'އަށް ވެސް ވަނީ ލިބިފަ އެވެ. އޭގައި ވާގޮތުން، އެ ފަހަރުގެ ޔޫވީ އިވެންޓަށް މެކް އިން އެދިފައިވަނީ 400،000ރ. ގެ ސްޕޮންސާޝިޕަކަށެވެ.

ނަމަވެސް އަޒްމީ ވިދާޅުވީ އެ ޑޮކިއުމަންޓުގައި އެދިފައިވާ ވަރަށް އެފަހަރުގެ ޔޫވީއަށް ސްޕޮންސަރުންގެ ފަރާތުން ފައިސާ ނުލިބޭ ކަމަށެވެ. އެގޮތުން، ކެއުމަށާއި ލައިޓިން ފަދަ ކަންކަމަށް ވެސް ބަޖެޓު ނުލިބޭ ކަމަށް ވިދާޅުވި އެވެ.

"ކޮންމެ އަހަރަކު ކުރަން ޖެހޭ ތަންތަނަށް އެނުއަލް ރިޕޯޓް ވެސް ސަބްމިޓް ކުރަން. މިފަހަރުގެ އެނުއަލް ރިޕޯޓު ވެސް އަންވެއިލިންގެ ކަންކަމާ އެކު ހަމަ ދާނެ. ގާނޫނުގައި އަނެއްހެން ނީނދޭ ޕަބްލިކް ކުރާކަށް، ސަރުކާރަށާއި ކަމާ ބެހޭ އޮތޯރިޓީތަކަށް ހުށަހަޅަން އޮންނަނީ. އެކަން ކުރާނެ،" އަޒްމީ ވިދާޅުވި އެވެ.

އަމިއްލަ ވިޔަފާރީގެ ކަންކަމަށް އިތުރު ވަގުތު ދީ، ޒުވާން އާޓިސްޓުންނަށް ފުރުސަތު ދިނުމުގެ ނިޔަތުގައި އަޒްމީ ޗެއާޕާސަން ކަމުން އިސްތިއުފާ ދެއްވުމުން މިހާރު މެކްގެ ބޯޑުގެ ވަގުތީ ޗެއާޕާސަން އަކަށް ހުންނެވީ، ވައިސް ޗެއާޕާސަން އަލީ ރިޝްވާން (ކާޓްމޭން އައްޔަ) އެވެ.

އާޓިސްޓުންގެ ހުނަރުގެ ބޭނުން ނަހަމަ ގޮތުގައި ހިފައިގެން މެކްގެ ބޯޑު މެމްބަރުން ނުހައްގުން މުއްސަނދިވާކަމަށް ކުރެވޭ ތުހުމަތުތަކަށް ރައްދު ދެއްވާ، ރިޝްވާން ޔަގީންކަން ދެއްވީ، "އެކަހަލަ އެއްވެސް ކަމެއް ނުހިނގާނެ" ކަމަށެވެ. އޭނާ އިތުރަށް ވިދާޅުވި ގޮތުގައި:

ޔޫވީގެ އިތުރުން އާޓިސްޓުންގެ ކުރިއެރުމަށް މެކް އިން ކޮށްފައިވާ ކަންކަމާ ބެހޭ ގޮތުން ސުވާލުކުރުމުން ރިޝްވާން ވިދާޅުވީ، މިދިޔަ އަހަރު އެއް ޓްރެއިނިން ޕްރޮގްރާމް ބޭއްވި ކަމަށެވެ. އަދި ކުރިއަށް އޮތް ތަނުގައި ބާއްވަން ނިންމާފައިވާ އިވެންޓްތަކުގެ ލިސްޓެއް ހިއްސާ ކުރި އެވެ. އެ ލިސްޓުގައި ވަނީ:

ރިޝްވާން ވިދާޅުވީ، މެކް އިން އާޓިސްޓުން ފާޅުކުރާ ކަންބޮޑުވުންތައް ބަލައިގަންނަ ކަމަށާއި، މަސައްކަތް ކުރާނީ އާޓިސްޓުންގެ ހިޔާލުތަކާ އެކު، އާޓިސްޓުންނާ ގުޅިގެން ކަންކަން ކުރިއަށް ގެންދަން ކަމަށެވެ. 

ސުވާލަކީ އެ ވާހަކަ އާޓިސްޓުން ގަބޫލުކުރަނީ ކިހާ މިންވަރަކަށް ހެއްޔެވެ؟