ނުރައްކާތެރި މަގުބައްތި ޖެހީ އެނގި ތިބެ؛ ޒިންމާ ނަގަނީ ކާކު؟

މީގެ ދެ ހަފުތާ ކުރިން، 23 މެއިގައި ރ. އުނގޫފާރުގައި ހިނގީ ނުރައްކާތެރި ހާދިސާއެކެވެ. އެ ރަށު ޕާކާ އިންވެގެން އޮންނަ ގޯޅިގަނޑެއްގައި ވިއްސާރައިގެ ސަބަބުން ހެދިފައި އޮތް ފެންގަނޑަކަށް އެރި އުޅުނު ދެ ކުއްޖަކާއި 18 އަހަރުގެ ހުސައިން އަތީކު ނަމަކަށް ކިޔާ ޒުވާނަކު ކަރަންޓުގައި ޖެހުނީ އެވެ. އެ ކުދިން ސަލާމަތް ކުރަން ގާތްވި އަތީކަށް ހިފުނީ އެ ތަނުގައި ހުރި، މަގުބައްތި ހަރުކޮށްފައިވާ ހޮޅިދަނޑީގަ އެވެ. ކަރަންޓުގައި ޖެހި، މިހާރު އެ ދަނީ މަރާ ހަނގުރާމަ ކުރަމުންނެވެ.

ހާދިސާގެ ތަފްސީލު އެނގޭ މީހަކު 'ދައުރު'އާ ވާހަކަ ދައްކަމުން ބުނީ 8 އަހަރުގެ ފިރިހެން ކުއްޖަކު އެ ފެންގަނޑަށް އެރުނީ ބައިސިކަލުގައި ދުއްވާފައި ކަމަށެވެ. ކަރަންޓު ޖެހި، ލިބުނު ޝޮކުގައި އެ ކުއްޖާ ފެންގަނޑު ތެރެއަށް ވެއްޓުނީ އެވެ.

އެ މަންޒަރު ފެނިގެން އެ ކުއްޖާ ސަލާމަތް ކޮށްދޭން އެންމެ ފުރަތަމަ ގާތްވީ 12 އަހަރުގެ އަންހެން ކުއްޖެކެވެ. އެ ރަށުން ވާހަކަދެއްކި މީހުން ބުނާ ގޮތުގައި އަންހެން ކުއްޖާ ގާތްވާން އުޅުމުގެ ތެރޭގައި ފެންގަނޑުގައިި ޖެހުނު ވަގުތު ކަރަންޓު އައުމުން އަވަހަށް ފަހަތަށް ޖެހުނީ އެވެ.

"އެ ކުއްޖާ [ފިރިހެން ކުއްޖާ] ރޯ އަޑަށް އަތީކު ނުކުތީ. އޭނާ އޭރު ހުރީ އެތާ ކައިރީގައި ހުންނަ އޭނާގެ އާއިލާ މީހެއްގެ ގެއެއްގައި،" އެކަކު ބުންޏެވެ.

"ފެންގަނޑު ތެރެއިން އެ ކުއްޖާ ނަގަންވެގެން އަތީކު ގާތްވީ ބައްތި ދަނޑި ހުރި ދިމާލުން. އެ ތަންކޮޅުގައި ފެން ނެތީމަ. ދަނޑީގައި އަތްލާފައި ނަގަން އުޅެނިކޮށް ކަރަންޓު ޖެހިގެން އަތީކު ވެސް ވެއްޓުނީ."

އަތީކު އާއި ކުޑަކުއްޖާ ފެންގަނޑު ނެގީ އެތަނުގައި ތިބި އެހެން ބަޔަކު، ވިއްސާރަ ކޯޓެއް ބޭނުންކޮށްގެންނެވެ. އަދި އޭރު ވެސް އަތީކަށް ވަރަށް ބޮޑުވަރުވެފައި އޮތުމުން އުނގޫފާރު ރީޖަނަލް ހޮސްޕިޓަލަށް ކާރެއްގައި ގެންގޮސް އައިސީޔޫގައި ފަރުވާ ދޭން ފެށި އެވެ.

"ގަޑިއެއް ހާއިރު ވަންދެން ސީޕީއާރު ދިން. އޭރު ވެސް ވިންދު ދާތީވެ،" މައުލޫމާތު ހުރި މީހާ ބުންޏެވެ.

އާއިލާ މީހަކު މީގެ ކުރިން 'ދައުރު'އަށް ބުނެފައިވާ ގޮތުގައި:

ޖެހިގެން އައި ދުވަހު އިތުރު ފަރުވާއަށް އަތީކު ވަނީ މާލެ ގެނެސްފަ އެވެ. މައުލޫމާތު ލިބޭ ގޮތުގައި އޭނާގެ ހާލު އަދިވެސް ރަނގަޅެއްނުވެ އެވެ.

އުނގޫފާރު މީހުން ބުނާ ގޮތުގައި އެ މަގުބައްތި ހަރުކުރީ އެ ގޯޅި އަނދިރިކަމުން ވަރަށް ފަހުންނެވެ. މަގުބައްތި އެ ތަނުގައި ބެހެއްޓީ އުނގޫފާރު ކައުންސިލުންނެވެ. ކަރަންޓު ދިނީ ފެނަކަ ކޯޕަރޭޝަނުންނެވެ.

މި ހާދިސާ ހިނގަން މެދުވެރިވި މައިގަނޑު ސަބަބަކީ އެ މަގުބައްތި ނުވަތަ ހޮޅިދަނޑީގައި އީއެލްސީބީ (އާތު ލީކޭޖް ސާކިޓް ބްރޭކާ)އެއް ނެތުމެވެ.

"މިކޮޅުގެ ފެނަކަ އިސް ބޭފުޅުން އަޅުގަނޑުމެން ގާތުގައި ބުނި، އީއެލްސީބީ ލާފައޭ ހުންނަން ޖެހޭނީ. ދަނޑީގައި ނުވަތަ ފޮށީގައި. ފެނަކައިން ލާން ޖެހޭ އެއްޗެއް އެއީ،" އުނގޫފާރުން ވާހަކަދެއްކި މީހަކު ބުންޏެވެ.

މިކަމާ ގުޅޭ ގޮތުން އުނގޫފާރު ފެނަކަ ބްރާންޗުން، ނަން ނުޖަހާ ގޮތަށް ވާހަކަދެއްކި، މުވައްޒަފަކު ބުނީ މޫސުން ތަން ނުދޭތީ އެ ހާދިސާ ހިނގި ގޮތް އަދި މިހާތަނަށް ދެނެގަނެވިފައިނުވާ ކަމަށެވެ. އޭނާ ވެސް ބުނީ އެއީ އެންމެ ކުރީގެ ނެޓްވޯކުގައި ބޭނުންކުރި މަގުބައްތިއެއް ކަމަށާއި އެ ހާދިސާ ހިނގި ދުވަހުން ފެށިގެން އެފަދަ ހުރިހާ މަގުބައްތިތައް ނިއްވާލާފައިވާ ކަމަށެވެ.

ނަމަވެސް ފެންގަނޑަށް ކަރަންޓު އައި ކަމަށް ބުނާ ވާހަކަ އޭނާ ވަނީ ދޮގުކޮށްފަ އެވެ.

"އެއްވެސް މީހަކަށް ނޭނގޭ އަސްލު ކަން ހިނގާދިޔަ ގޮތެއް. ހަމަ ވެދާނެ ގޮތެއް، ބައިސްކަލުގައި ދަނިކޮށް ހޮޅިދަނޑީގައި ޖެހުނީ ކަމަށް ވެސް،" އޭނާ ބުންޏެވެ.

"އެހެން ނަމަވެސް ފެންގަނޑުގައި ކަރަންޓެއް ނުހުންނާނެ."

ފެނަކައިގެ މުވައްޒަފު އެހެން ބުނި ނަމަވެސް، އުނގޫފާރުން ވާހަކަދެއްކި އެހެން އެންމެން ވެސް އެކަމާ ދެކޮޅުހަދަ އެވެ. އެ މީހުން ބުނާ ގޮތުގައި ކަރަންޓު ހުރީ ހޮޅިދަނޑީގައި އެކަންޏެއް ނޫނެވެ.

"ފިރިހެން ކުއްޖާ ސަލާމަތް ކުރަން ފުރަތަމަ އުޅުނު އަންހެން ކުއްޖާ ވެސް ދުރަށް ޖެހުނީ ފެންގަނޑުން ކަރަންޓު އައިމަ،" ހާދިސާގެ ތަފްސީލު އެނގޭ އެހެން މީހަކު ބުންޏެވެ.

"ކަރަންޓުގެ ކަންކަން އެނގޭ މީހުން އެބަ ބުނޭ، އަތީކަށް އެހާ ބޮޑު ވަރުވީ ހޮޅިދަނޑީގައި ހިފާފައި، ފެންގަނޑާ ވެސް ކޮންޓެކްޓް ވީމައޭ."

މިކަމުގައި އުނގޫފާރު ކައުންސިލްގެ ބަހެއް ލިބޭ ގޮތެއް ނުވި އެވެ. މަގުބައްތި ހަރުކުރަނީ ކައުންސިލުން ކަމަށްވާއިރު، މިފަދަ މަގުބައްތިތައް ސަލާމަތީ މިންގަނޑުތަކަށް ފެތޭތޯ ބެލުމާއި އެކަން ކަށަވަރު ކުރުމުގެ ތަޖުރިބާ ހުންނާނީ ފެނަކައިގަ އެވެ.

އުނގޫފާރުގައި މި ހާދިސާ ހިނގި ދުވަހު ފެނަކައިން ބަޔާނެއް ނެރުނެވެ. އިއުލާންކުރީ ކައުންސިލްތަކާ ގުޅިގެން ރަށްރަށުގައި އިޖުތިމާއީ ބޭނުމަށް ދިއްލާ ބައްތިތައް ސްޓެންޑަޑައިޒް ކުރުމަށް ފެނަކައިން ނިންމި ކަމެވެ.

އެ ބަޔާނުގައި ފެނަކައިން ވެސް ބުނީ، ކައުންސިލްތަކުގެ ބެލެނިވެރިކަމުގެ ދަށުން ބަލަހައްޓާ، އެ ކޯޕަރޭޝަނުން ކަރަންޓު ފޯރުކޮށްދޭ ގޮތަށް ގިނަ ރަށްރަށުގައި ހުންނަ ބައްތިތަކުގައި އީއެލްސީބީ ހަރުކޮށްފައި ނުހުންނަކަން ފާހަގަވެފައިވާ ކަމަށެވެ.

"މިގޮތަށް ހުންނަ މަގުބައްތިތަކަކީ އެންމެ ރައްކާތެރި ބައްތިތަކަކަށް ނުވާތީ، މި ކަންތައް ހައްލުކުރުމަށްޓަކައި ކުރިއަށް އޮތް މަހެއްހާ ދުވަސް ތެރޭ މި ކޯޕަރޭޝަނުން ހިދުމަތް ދެމުން އަންނަ ހުރިހާ ރަށެއްގައި އިންސްޕެކްޝަންތަކެއް  ކުރިއަށް ގެންދިއުމަށް ވަނީ ނިންމާފަ އެވެ،" އެ ބަޔާނުގައިވެ އެވެ.

މިދިޔަ އަންގާރަ ދުވަހު އެ އިންސްޕެކްޝަންތައް ފަށާފައިވާއިރު، ހާއްސަ އިސްކަމެއް ދޭނީ އީއެލްސީބީ ހަރުކޮށްފައި ހުރިތޯ ބެލުމަށެވެ.

މިހާރު ވެސް އުނގޫފާރުގެ މަގުމަތީގައި ބަހައްޓާފައި ހުންނަ ބައެއް ކަރަންޓު ފޮށިތަކުގެ ކޭބަލްތައް ހުންނަނީ ހާމައަށް ފެންނަ ގޮތަށެވެ. އެއީ އީއެލްސީބީ ލާފައި ހުރި ފޮށިތަކެއް ކަން ނުވަތަ ނޫންކަން އާންމު ރައްޔިތުންނަށް ޔަގީނެއް ނުވެ އެވެ. އެހެންވެ މިދިޔަ މަހު ހިނގި ހާދިސާއަށް ފަހު އެއީ ވެސް ކުރިމަތިވެފައި އޮތް ބޮޑު ބިރެކެވެ.

އިންސްޕެކްޝަންގެ އިތުރަށް ކައުންސިލްތަކާ އެއްބަސްވެވޭ ގޮތެއްގެ މަތިން، ފެނަކައިގެ ފަރާތުން އިޖުތިމާއީ ބޭނުމަށް ދިއްލާ ބައްތިތައް އެ ކުންފުނިން ބަލަހައްޓާ ގޮތަށް ހުށަހެޅުމުގެ މަސައްކަތް ވެސް އަންނަނީ ކުރަމުންނެވެ.

އެ މަސައްކަތާ މެދު އެއްވެސް މީހަކު ޝަކުވާއެއް ނުކުރާނެ އެވެ. މައްސަލައަކީ މިފަދަ ކޮންމެ ކަމެއްގައި ވެސް ހިތާމަވެރި ހާދިސާއެއް ހިނގުމުގެ ކުރިން ރައްކާތެރިކަމުގެ ފިޔަވަޅު، އެއްވެސް ބަޔަކު ނާޅާތީ އެވެ.

އަތީކުގެ ހާލަތު އަދިވެސް ސީރިއަސް އެވެ. ވެންޓިލޭޓަރުގައި މަރާ ހަނގުރާމަ ކުރަމުން ދާއިރު، އުނގޫފާރަށް މިހާރު މޫސުން ވެސް ރަނގަޅެވެ. އެ ހޮޅިދަނޑި އަދި އެބަ ހުއްޓެވެ. އަޅާނުލައި ތިއްބާ މާ ގިނަ ދުވަސްތަކެއް ނުވަނީސް މި ހާދިސާ ވެސް ކަމާ ބެހޭ ފަރާތްތަކުގެ ހަނދާނުން ހިނގައިދާނެ އެވެ. އެއީ އާންމުކޮށް ރާއްޖޭގައި ކަން ވާ ގޮތެވެ.