ސަރުކާރަށް އިމްތިހާނެއް؛ އެމްޑީޕީއާ މެދު މާޔޫސް ވެއްޖެ

އިއްޔެ ބޭއްވި ރައްޔިތުން މަޖިލީހުގެ އިންތިހާބުގެ ނަތީޖާއާ އެކު އިދިކޮޅު އެމްޑީޕީއަށް އޮތް މަޖިލީހުގެ މެޖޯރިޓީ، ސަރުކާރު ހިންގާ ޕީއެންސީގެ އަތް މައްޗަށް، އާ މަޖިލިހުގައި، ފުރޮޅުނީ އެވެ. ވަގުތީ ނަތީޖާއިން ދައްކަނީ 67 ގޮނޑިއާ އެކު ސަރުކާރާއި ޕީއެންސީން މަޖިލީހުގެ ފުރިހަމަ މެޖޯރިޓީއާ އެކު ހަމަޖެހިލީ ތަނެވެ.  

މިއީ އެއް ބަޔަކަށް ވަރަށް ބޮޑު ހައިރާން ކަމެކެވެ. ގިނަ ބަޔަކު ހީކޮށްގެން ތިބީ، އެމްޑީޕީއަށް ސުޕަ މެޖޯރިޓީ ދީގެން މަޖިލިހުގެ ކަންކަން ދިޔަ ގޮތުން ދެވަނަ ފަހަރަށް ރައްޔިތުން 'އެ މީހުންގެ ބާރު' ވަކި ކޮޅަކަށް ދޫކޮށް ނުލާނޭ ކަމަށެވެ. އެކަމަކު ނަތީޖާ މިއައީ މުޅިން އެހެން ގޮތަކަށެވެ. މި ނަތީޖާގެ ތަރުޖަމާއަކީ ކޮބައި ހެއްޔެވެ؟

މީގެ ފަސް އަހަރު ކުރިން ރައްޔިތުން ފުރިހަމަ މެޖޯރިޓީ ދިނީ އޭރު ވެރިކަމުގައި އޮތް އެމްޑީޕީއަށެވެ. އޭގެ ކުރިން ރައީސް އަބްދުﷲ ޔާމީންގެ ސަރުކާރުގައި މެޖޯރިޓީ ދިނީ ވެސް އޭރުގެ ސަރުކާރުގެ ޕާޓީ ޕީޕީއެމްއަށެވެ. މި ފަހަރު ވެސް އަނެއްކާ މި ތަކުރާރުވީ ހަމަ އެ މަންޒަރެވެ. 

ސިޔާސީ ކަންކަން ދިރާސާކުރައްވާ ދައުރުގެ މެނޭޖިން އެޑިޓަރު އަހުމަދު ޒާހިރު (ހިރިގާ)ގެ ވިސްނުމުގައި އެގޮތަށް ރައްޔިތުން އަމަލު ކުރަނީ ހަމަޖެހުން ބޭނުން ވާތީ އެވެ. ގައުމުގައި ހުރި ދުވަސްވީ މައްސަލަތައް ހައްލުކޮށް ތަރައްގީ ގެނެސްދެވޭނީ ސަރުކާރަށް ފުރުސަތާއި ބާރުތައް ދީގެން ކަމަށް ރައްޔިތުންނަށް ގަބޫލުކުރެވޭތީ އެވެ.

ސިޔާސީ ގޮތުން އެ ޓްރެންޑް ތަކުރާރުވާން ފެށީ، ހިރިގާ ޒާހިރު ވިދާޅުވާ ގޮތުގައި، އާ ގާނޫނުއަސާސީގެ ދަށުން 2009ގައި ބޭއްވި ފުރަތަމަ ރައްޔިތުން މަޖިލީހުގެ އިންތިހާބުގައި އޭރުގެ ރައީސް މުހައްމަދު ނަޝީދުގެ ސަރުކާރަށް މެޖޯރިޓީ ނުލިބުމުން ކުރިމަތިވި 'ޖެއްސުމާއި' ހަލަބޮލިކަމުގެ ތަޖުރިބާއަށް ފަހު ރައްޔިތުން އެގޮތް ބޭނުން ނުވާތީ އެވެެ.

"ރައްޔިތުންނަށް ވިސްނެނީ ސަރުކާރަކަށް ގަވާންކުރަން ފުރުސަތު ދިނުމޭ ރަނގަޅު ގޮތަކީ. ތަރައްގީ ގެނެސް މައްސަލަތައް ހައްލުކުރަން އެ ފުރުސަތު ސަރުކާރަކަށް ދީފައި ދެން ރައްޔިތުން އަނެއްކާ ގޮތް ނިންމާނީ. އެ މަންޒަރު މި ތަކުރާރު ވަނީ. ބާރު ދީފައި އަމަލު ކުރާ ގޮތަށް، އެ ބާރު ބޭނުންކުރާ ގޮތަށް ރައްޔިތުން ބަލާނީ،" ޒާހިރު ވިދާޅުވި އެވެ. 

މިއީ ސަރުކާރަށް ބޮޑު އިމްތިހާނެކެވެ. މިހާތަނަށް ހުރިހާ ސަރުކާރުތަކުން ވެސް އޮތީ މި އިމްތިހާނުން ފެއިލްވެފަ އެވެ. ޕީޕީއެމްގެ ސަރުކާރަށް މެޖޯރިޓީ ދިނުމުން މަޖިލިސް މެދުވެރިކޮށް ގޯސް އެތައް ކަމެއް ހިންގި އެވެ. އެމްޑީޕީއަށް ދިން މެޖޯރިޓީން ވެސް، ގިނަ މީހުން އުއްމީދުކުރި ވަރުގެ ނަތީޖާއެއް ނުނިކުތެވެ. ރައްޔިތުން އެދުންތަކާ އެއްވަރަށް މަސައްކަތް ކުރިއަށް ނުގެންދެވުނީ އެވެ.

ދައުރުގެ މަޖިލިސް ރިޕޯޓަރު މުހައްމަދު މުޒައްޔިން ނާޒިމްގެ ވިސްނުމުގައި ވެސް އިއްޔެގެ ނަތީޖާއިން ރައްޔިތުން ބުނެދިނީ ދާއިރާގެ ތަރައްގީ އާއި މައްސަލަތައް ހައްލުކުރަން ސަރުކާރަށް ފުރުސަތު ދިން ކަމެވެ. ސަރުކާރަށް ބޮޑު އިމްތިހާނެއް ރައްޔިތުން ހަވާލުކުރީ އެވެ. މުޒައްޔިން ވިދާޅުވަނީ ދިވެހިންގެ އާންމު ވިސްނުމަކީ ތަރައްގީ ގެނެވޭނީ އަދި މައްސަލަތައް ހައްލުކޮށްދެވޭނީ ސަރުކާރުގައި ތިބޭ ބަޔަކަށް ކަމެވެ. މީހުން ވޯޓް ދެނީ އެ ވިސްނުމުގެ މައްޗަށެވެ.

"މީހުން ގަބޫލުކުރަނީ ސަރުކާރުގައި ތިބޭ ބަޔަކަށޭ ކަންކަން ހައްލުކުރެވޭނީ. އެ މީހުންނަށް ފުރުސަތު ދެވެން އޮތް އެންމެ ބޮޑަށް ދިނީމައޭ. އެ ވިސްނުން ރައްޔިތުން ގެންގުޅެނީ،" މުޒައްޔިން ވިދާޅުވި އެވެ.

މީގެ ކުރީގެ މަޖިލީހުގެ އިންތިހާބުގައި އެމްޑީޕީއަށް ބޮޑު މެޖޯރިޓީއެއް ދިނީ އެތައް ކަންތައްތަކެއް އިސްލާހުކޮށް ބަދަލުތަކެއް ގެނައުމުގެ ވިސްނުމުގަ އެވެ. އެކަމަކު އޭރު އެމްޑީޕީން ވިއްކި އެޖެންޑާ-19ގެ ވައުދުތަކުގެ ބައިކުޅަބައި ވެސް ހާސިލެއް ނުވި އެވެ.

މުޒައްޔިން ވިދާޅުވީ އެމްޑީޕީގެ ދަށް ޕާފޯމަންސާ އެކު އެމްޑީޕީއާ މެދު ރައްޔިތުން މާޔޫސްވީ ކަމަށެވެ. ހާއްސަކޮށް ސިޔާސީ ގޮތުން ވަކިކޮޅެއް ނުނަގާ ތިބޭ ސައިލެންޓް ވޯޓަރުންގެ މާޔޫސްކަން އެމްޑީޕީއާ މެދު ބޮޑުވެ އިތުބާރު ގެއްލުނީ އެވެ. އަދި އެ އިތުބާރު ހޯދަން އެމްޑީޕީން މިފަހަރު ކުރިއަށް ނެރުނު 'މިސްރާބު ހަމަ މަގަށް' ސިޔާސަތުގައި ހަރުދަނާ ކަންކަން ނެތީ އެވެ. 

"ހަގީގަތުގައި އެމްޑީޕީގެ ސިޔާސަތެއް މިފަހަރު ވިއްކި ތަނެއް ނުފެނުނު. އެމްޑީޕީގެ މިހާރުގެ މެންބަރުންގެ ޕާފޯމަންސް އެހާ ދަށް. އެހެންވީމާ އެ މީހުން އަމަލުކުރި ގޮތުން ރައްޔިތުން އަނެއްކާ އެ މީހުންނަށް ފުރުސަތު ދޭން ބޭނުން ނުވީ. އަދި އެމްޑީޕީން ނެރެފައި ތިބި ރައްޔިތުންގެ އިތުބާރު ގެއްލިފައި ތިބި މީހުން،" މުޒައްޔިން ވިދާޅުވި އެވެ.

ހިރިގާ ޒާހިރުގެ ވިސްނުމުގައި ރިޔާސީ އިންތިހާބުގެ ބައްޔަށް ފަހު އެމްޑީޕީގެ ލީޑަޝިޕް ސާފުވާން ޖެހެ އެވެ. ބަދަލުތައް އަންނަން ޖެހެ އެވެ. ގެއްލިފައި އޮތް އިތުބާރު ހޯދޭނީ އޭރުންނެވެ. އެކަމަކު މަޖިލިސް އިންތިހާބު ކުރިމަތިވީ އިރު ވެސް އެމްޑީޕީގެ ލީޑަޝިޕްގެ ވަރުގަދަ ކަމެއް ނުފެނުނެވެ. އޭގެ ބަދަލުގައި ފެނުނީ ރިޔާސީ އިންތިހާބުގައި ވެސް ފޭލިވި ހަމަ ކުރީގެ ލީޑަޝިޕެވެ.

"ރައީސް ސޯލިހި އަނެއްކާވެސް ފެނުނީ. ލީޑަޝިޕް ސާފުވެގެން ވަރުގަދަ މަސައްކަތްތަކެއް ކުރެވުނު ތަނެއް ނުފެނުނު. ސަރުކާރު ޒިންމާދާރު ކުރުވުމުގެ ވާހަކައަށް ވުރެ ރައީސް އަޒުލް ކުރާ ވާހަކައާ މިކަހަލަ ވާހަކަތަކެއް އަޑުއިވުނީ،" ޒާހިރު ވިދާޅުވި އެވެ.

އޭނާ ގަބޫލުކުރައްވާ ގޮތުގައި ދިވެހިން އިސްލާހީ ޑިމޮކްރެޓިކް ބަދަލުތައް ގެނައީ ހެޔޮ ވެރިކަމުގެ ނިޒާމެއްގެ އުންމީދުގަ އެވެ. އެކަމަކު ރައްޔިތުން އުންމީދުކުރި ގޮތާ ހިލާފަށް ސިޔާސީ ވެރިން އެ ނިޒާމު ކިލަނބުކޮށް މުޅި ނިޒާމު ކޮރަޕްޓްކޮށްލީ އެވެ. މާލިއްޔާއިން ވައްކަން ކުރުމާއި ކަޅު ފައިސާއިން ހިންގާ ނިޒާމަކަށް މުޅި ނިޒާމު ބަދަލުކޮށްލީ އެވެ.

"ރައްޔިތުންގެ ފުދުންތެރިކަން ހުންނަ ގޮތުން އެ މީހުންނަށް ނޯވޭ ބާރުގެ ތިބޭ ބަޔަކަށް ފާޑުކިޔައިގެން ދިރިއުޅުމުގައި ސާވައިވް ވެވޭކަށް. އެހެންވީމާ ދެން އެ މީހުން ވޯޓް ވެސް ވިއްކަނީ. ސިޔާސީ ވެރިން ކޮރަޕްޓް ޕްރެކްޓިސްތައް ހިންގިޔަސް ލޯ މަރާލަނީ. މާދިއްޔަތު ޕްރިންސިޕަލްތަކުގެ މައްޗަށް މި އިސްވަނީ. ސިޔާސީ މީހާ ވައްކަން ކުރީމާ އެ ފައިސާއިން ބައެއް ތިމާއަށް ވެސް ލިބެންޏާ އެގޮތް ވަރިހަމައީ. ފެޑަޕްވީ ރައްޔިތުން،" ޒާހިރު ވިދާޅުވި އެވެ.

މުޒައްޔިން ވެސް ގަބޫލުކުރައްވަނީ އިންތިހާބުތަކުގައި ފައިސާގެ ނުފޫޒާއި ވަޒީފާގެ ބިރާއި މި ހުރިހާ ކަމެއް ވަރަށް ބޮޑު ރޯލެއް ކުޅުނު ކަމަށެވެ. ގާނޫނުތައް ހުރީ ވެސް އެކަންކަން ހުއްޓޭ ގޮތަކަށެއް ނޫނެވެ. އެކަން ކުރަން ވެސް ސިޔާސީ ބާރުވެރިން ބޭނުމެއް ނުވެ އެވެ. 

"ފައިސާ ވެސް ބަހާ. ވޯޓް ގަތުން އާންމުވެއްޖެ. ޕްރޮޖެކްޓްތައް އިއުލާންކޮށް ވަޒީފާތައް ދީ ހަދަނީ ކޮންމެ ސަރުކާރަކުން ވެސް އިންތިހާބާ ދިމާކޮށް. އިދިކޮޅުގައި ތިބޭއިރު ގޯސް. އެކަމަކު ބާރު ލިބުނީމާ ގާނޫނަކުން އެކަން ހުއްޓުވަން ވެސް ގެންނަން ޖެހޭ ބަދަލެއް ނުގެނޭ. ތަންމިނަށް މި ކަންކަމަށް ޖާގަ ދީފައި އޮންނަނީ،" މުޒައްޔިން ވިދާޅުވި އެވެ.

"ރައްޔިތުންގެ ވިލްއަކީ ސިޔާސީ މީހާ ގަންނަ، ސޭލް އަޅުވާފައި ހުންނަ އެއްޗަކަށް ވެއްޖެ."

އެމްޑީޕީގެ ފުރަތަމަ ރައީސް އަދި ކުރިން މާލޭގެ މެމްބަރުކަން ކުރެއްވި އިބްރާހިމް އިސްމާއިލް (އިބުރާ)ގެ ވިސްނުން ވެސް ހުރީ އެގޮތަށެވެ. އޭނާ ވިދާޅުވީ މިހާރުގެ ޖީލު ބޮޑުވީ މާ ބޮޑު އުނދަގޫތަކެއް ނެތް ހުޅުވިފައިވާ މުޖުތަމައެއްގައި ކަމަށް ވުމުން ޑިމޮކްރަސީ އާއި ހައްގުތަކުގެ މުހިންމުކަން މިހާރުގެ ޖީލަކަށް ނުވިސްނޭ ކަމަށެވެ. 

އެހެންވެ އާންމުންގެ މެދުގައި އެންމެ މަގުބޫލު ވިސްނުމަށް މިހާރުގެ ޖީލު ދީލައިލެވެނީ އެވެ.

"ކުރިމަތީގައި އޮތީ ބަނަ ދުވަސްތަކެއް. މިއީ ރާއްޖޭގެ މުޖުތަމައު މިހާ ދަށަށް ދަށަށް ގޮސްފައިވާ ވަރު،" އިބުރާހިމް އިސްމާއިލް ވިދާޅުވި އެވެ. 

ކުރީގެ ފޮރިން މިނިސްޓަރު އަދި ސިޔާސީ ދާއިރާ އާއި ހާރިޖީ ދާއިރާގެ ތަޖުރިބާކާރު ޑރ. އަހުމަދު ޝަހީދު އެކްސްގައި ވިދާޅުވި ގޮތުގައި އިއްޔެގެ ނަތީޖާއިން ހާމަވި އެއް ކަމަކީ ދައުލަތުގެ ބާރުތައް ވަކިވެފައި އޮންނަ ގޮތާ މެދު ރައްޔިތުންގެ ވިސްނުން މިވީ ދުވަސްތަކުގައި ބަދަލުވެފައިވާ ކަމެވެ. އަދި ރާއްޖެއަށް ގެނައި އިސްލާހީ ބަދަލުތަކުގެ ތެރެއިން ވަރަށް މުހިންމު އުސޫލުތަކެއް ދިވެހިންގެ ތެރެއިން ދޫވެފައިވާ ކަމަށް ވެސް އޭނާ ގަބޫލުކުރައްވަ އެވެ. 

"އިންސާނީ ތަރައްގީ، މީހުންނަށް އިހުތިރާމް ކުރުން، މިކަހަލަ މުހިންމު ވެލިއުސްތައް ދޫވެފައި ހުރިތަން މި ފެންނަނީ. ވިހި އަހަރުގެ ތެރޭގައި ޖެނެރޭޝަނަށް އައި ބަދަލާ އެކު ދަރަނި ނެގުމާއި އިޖުތިމާއީ ހަމަހަމަކަން ގާއިމްކުރުމަށް ސިޔާސީ އަދި އިގްތިސާދީ ހަރުދަނާ އުސޫލުތަކެއް އަންނަން އެބަ ޖެހޭ،" ޝަހީދު ވިދާޅުވި އެވެ. 

އިއްޔެގެ އިންތިހާބުގައި ސަރުކާރަށް ލިބުނު މެޖޯރިޓީއަކީ އިމްތިހާނެއް ކަމަށް ސަރުކާރުން ގަބޫލުކުރާކަން ނުވަތަ ނޫންކަން ކުރިއަށް އޮތް ދުވަސްތަކުގައި އެނގޭނެ އެވެ. ހަނދާނުގައި ބަހައްޓަން ޖެހެނީ، ރައްޔިތުންގެ މަޖިލިހުގެ މެޖޯރިޓީ ރައްޔިތުން ދިން ކުރީ ދެ ސަރުކާރަށް ރައްޔިތުން ފަހުން ނޫނެކޭ ބުނި ކަމެވެ. މިއީ މި ވަގުތަށް ލިބެން އޮތް ފިލާވަޅެކެވެ.