ހައްޖާޖީންގެ ކަރުނައިގެ އަލްވަދާއު

ކާފަ ދަރިފުޅު އުރާލައި ގައިގާ ބައްދާލި އެވެ. އޭނާ ހުރީ ފެންކަޅިވެފަ އެވެ. ހައްޖުގެ މަތިވެރި އަޅުކަމަށް ފުރުމުގެ ކުރިން ވެލާނާ އިންޓަނޭޝަނަލް އެއާޕޯޓްް (ވީއައިއޭ)ގައި ހުރެ މިއީ އޭނާގެ އާއިލާގެ މީހުންނަށް ކުރި ވަދާއީ ސަލާމެވެ. މިއީ ކޮންމެ މީހަކުހެން ފުރަން ޓާމިނަލްއަށް ވަނުމުގެ ކުރިން އާއިލާގެ މީހުންނަށް ކޮށްލާ ވަދާއީ ސަލާމެވެ. 

އެންމެން ވެސް ތިބެނީ ފެންކަޅިވެފަ އެވެ. އާއިލާ މީހުންނާ ދުރަށް މަދު ދުވަސްކޮޅަކަށް ދާން ޖެހުމުގެ ނުތަނަސްކަން އޮތަސް ހިތުގައި އުފާވެރިކަމުގެ ޝުއޫރުތައް ވެސް ހިނގަ އެވެ. ދިގު އިންތިޒާރަކަށް ފަހު ހައްޖުގެ އަޅުކަމަށް މައްކާގެ މާތް ބިމަށް ދެވޭތީ އެންމެން ވެސް ތިބީ އުފަލުންނެވެ. ހިތް ހަމަ ޖެހުމުގެ އިހުސާސްތައް ވެސް ބޮޑެވެ. 

ބައެއް މީހުން އާއިލާގެ މީހުންނަށް ވަސިއްޔަތް ވެސް ކުރެ އެވެ. ހެޔޮކޮށް ރަނގަޅަށް އުޅުމަށެވެ. މީހުންނަށް ހެޔޮ ފޯރުކޮށްދިނުމަށެވެ. ވިޔާ ނުދާ އަަމަލުތައް ނުކުރުމަށެވެ. ރަނގަޅު ރައްޓެހިން ހިޔާރު ކުރުމަށެވެ. މިއީ އެތަނުން އިވުނު ވަސިއްޔަތްތަކުގެ އަޑެވެ. 

ހައްޖަށް ދާން ކިއުގައި 6،000 އެއްހާ މީހުން ތިބިއިރު މިއަހަރު ހައްޖަށް ދާން ފުރުސަތު ލިބުނު މީހުންނަށް މިއީ ބޮޑު ނަސީބެކެވެ. ހަޔާތުގައި އެއް ފަހަރު ލިބޭނޭ ބޮޑު ނަސީބެކެވެ. އެ މީހުންގެ ހިތްތައް އެހެންވެ، ވަނީ ޝުކުރުން ފުރިފަ އެވެ. 

މާތް ވެގެންވާ މި ބޮޑު އަޅުކަމަށް އެ މީހުން ވަނީ ނިޔަތް ގަނެފަ އެވެ. ހިތް ހަލާސްކޮށް ސާފުކޮށްފަ އެވެ. އެ މީހުން އެ ފުރަނީ ސާފު ހިތަކާ އެކު އެވެ. 

ހައްޖަށް ދާ ގިނަ މީހުންނަކީ ދުވަސްވީ މީހުންނަށް ކަމަށްވާއިރު އާއިލާތަކުގެ ކަންބޮޑުވުމަކީ އެ މީހުންނާ ނުލާ ދުރަށް ދަތުރު ކުރަން ޖެހުމެވެ. 

މިއަހަރު ރާއްޖެއިން 1،000 މީހުން ހައްޖަށްދެ އެވެ. އޭގެ ތެރެއިން 400އަށް ވުރެ ގިނަ މީހުން މިހާރު ވަނީ ސައުދީ އަރަބިއްޔާއަށް ގޮސްފަ އެވެ. އަދި ހުރިހާ ހައްޖުވެރިންގެ ހާލު ވެސް އާންމުކޮށް ރަނގަޅު ކަމަށް ހައްޖު މިޝަންއިން ވަނީ ބުނެފަ އެވެ. 

ދިވެހި ހައްޖާޖީންގެ ތެރޭގައި ކޮންމެ ދުވަހަކު ޑަޔަލިސިސް ހަދަން ޖެހޭ ފަދަ ބަލި މީހުން ވެސް އެބަ ތިއްބެވެ. ހައްޖު ކޯޕަރޭޝަނުން ބުނަނީ، އެ މީހުންގެ ސިއްހީ ކަންކަން ކައިރިން ބަލަހައްޓާ ދޭން ޖެހޭ ފަރުވާތައް ބަރާބަރަށް ދީ އެ މީހުންގެ ހައްޖުގެ ކަންކަން އޮމާންކަމާ އެކު ގެންގޮސްދޭ މުޅި ޓީމް ތައްޔާރުވެ މަސައްކަތް ކުރަމުން އަންނަ ކަމަށެވެ. 

ހައްޖަށް ދެވުމަކީ އެތައް ބައެއްގެ ހުވަފެން ހަގީގަތަކަށް ވުމެވެ. އަދި އެކަމަށް ކިޔާ އަލްވަދާއު އަކީ ވެސް ހިތްދަތި ވަގުތުކޮޅެކެވެ. އެހެން ނަމަވެސް ދީނީ މި ބޮޑު އަޅުކަމަށް އެންމެން އެ ތިބީ ކެތް މަދުވެފަ އެވެ.

"ވަރަށް ހިތް ހެޔޮ ކުރާތި،" މިއީ އެންމެން ވެސް އެ އަޅުކަމަށް ފުރުމުގެ ކުރިން ބުނެލާ ބަސްކޮޅެވެ.