ކުޑަކުޑަ މި "ވިޔަފާރިވެރިން"ގެ ހިނިތުންވުން ބޮޑު

ކުޑަކުދިންގެ ދުވަހު އަސްރުން އިރު ތިރިވެލުމާ އެކުހެން މާލޭގެ އާޓިފިޝަލް ބީޗް ފުރާލީ ކުޑަކުޑަ "ވިޔަފާރިންތަކެއް" ޖަމާވެގެންނެވެ. ހުސް ކުޑަކުދިންނެވެ. މި ކުޑަކުޑަ "ވިޔަފާރިވެރިން"ގެ މަގްސަދަކީ އެމީހުންގެ ހިޔާލުގެ މައްޗަށް ބިނާކޮށް އުފައްދާފައިވާ ތަކެތި މާކެޓްކުރުމެވެ.

މާލެ، ހުޅުމާލެ އަދި ވިލިމާލޭގެ އެކި ސަރަހައްދުތަކުގައި ކުޑަކުދިންގެ ދުވަހާ ގުޅުވައިގެން ކުޅިވަރު ހަރަކާތްތައް އޮތަސް އާޓިފިޝަލް ބީޗު ހާއްސަކޮށްފައި އޮތީ ކުޑަކުދިންގެ ވިޔަފާރީގެ ހިޔާލުތަކުން ނެރުނު ތަކެތި ދައްކާލައި، ވިޔަފާރިކުރުމުގަ އެވެ. މިއީ ބައިވެރިންނަށް މުޅިން ތަފާތު ތަޖުރިބާއެކެވެ.

އެތަނަށް ޒިޔާރަތްކުރި ކުދިންނަށް އޮތީ ކުޑަކުދިން އުފެއްދި އެއްޗެހި ގަނެލުމެވެ. 

ޗިލްޑްރަންސް އޮމްބަޑްސްޕާސަން އޮފީހުން ބޭއްވި "ޔަންގް އޮންޓަޕްރެނުއާ ފެއާ" މިއީ ރާއްޖޭގައި ކުޑަކުދިންގެ މެދުގައި ވިޔަފާރިއަށް ލޯބި އުފައްދައި، ހިޔާލު ތަރައްގީކުރަން މިފަދަ ފުރަތަމަ ފެއާ އެވެ.

ފެއާއިން ތަފާތު ހުނަރުގެ ކުދިން ފެނުނެވެ. ކާ އެއްޗެހި ހަދާ ކުދި ގުރޫޕްތަކެވެ. މިނާއިން އަމުނައިގެން ފަށާއި ޓެގް ހަދާ ކުދިންނެވެ. އަތްތެރި މަސައްކަތުގެ އުފެއްދުންތަކެވެ. އެކުދިން ތިބީ ވަރަށް ބޮޑަށް ތައްޔާރުވެލައިގެންނެވެ.

އެއް ކުއްޖަކު އަމިއްލައަށް ލިޔެގެން ޕަބްލިޝްކޮށްފައިވާ ވާހަކަ ފޮތްތަކެއް ވެސް އޭނާގެ ސްޓޯލުގައި ވިއްކަން ހުއްޓެވެ. ހަމަ ސޭޓުންގެ ގޮތުގަ އެވެ. ފަހުރުވެރިކަމާ އެކު އެވެ.

 މިއީ އެ ކުދިންގެ އުފެއްދުންތަކެއްތޯ އަހާލެވޭހާ ރަނގަޅު އެއްޗެހި ހުއްޓެވެ. އެކަމަކު އެއީ އެ "ވިޔަފާރިވެރިން"ގެ ހުނަރެވެ.

މި އުމުރުގެ ކުދިންނަށް އާންމުކޮށް ނުލިބެނީ ކަންކަން އަމިއްލައަށް ކުރުމުގެ ތަޖުރިބާ ކުރުމުގެ ފުރުސަތެވެ. ދިވެހި ވިޔަފާރިވެރިންނަކީ މިފަދަ ފުރުސަތުތައް ނުލިބި ފޮތުގެ ދެލިގަނޑުން ވިޔަފާރި ދަސްކުރި ބައެކެވެ.

ވާހަކަ ދެއްކި ބެލެނިވެރިން ބުނާ ގޮތުގައި ފެއާގެ ސަބަބުން ކުދިންނަށް އެތައް ކަމެއް ދަސްވެއްެޖެ އެވެ.

"އެއްބައި ސްޓޯލްތަކުގައި ކުދިންގެ އަމިއްލަ އުފެއްދުން ނޫނަސް އެއްޗެހި ބަހައްޓާފައި ހުރީ މާކްއަޕެއް ލިބޭ ގޮތަށް. މިއީ އަސްލު ވިޔަފާރީގެ ތެރެއަށް ކުދިން ވަރަށް ބޮޑަށް ލޯ ހުޅުވިގެން ދިޔަ ފުރުސަތެއް،" ބެލެނިވެރިޔަކު ބުންޏެވެ.

ބައިވެރިވި ކުދިންގެ ހަނދާނުން މި ތަޖުރިބާ ފިލައިގެން ނުދާނެ އެވެ. 

ޗިލްޑްރަނަސް އޮމްބަޑްޕާސަން ނިއުމަތު ޝަފީގު ވިދާޅުވީ މި ފެއާގެ އެންމެ ބޮޑު މަގުސަދަކަށް ވީ ކުޑަކުދިންނަށް އަމިއްލަ އުފެއްދުންތެރިކަމާއި ވިޔަފާރީގެ ދާއިރާއިން އަގުހުރި ފިލާވަޅުތަކެއް ދަސްވާ ގޮތަށް އެ ދާއިރާއިން އެކުދިންގެ ހުރި ހުނަރާއި ގާބިލުކަން ދައްކާލުމުގެ ފުރުސަތު ފަހިކޮށްދިނުން ކަމަށެވެ.

"އެ މަގްސަދު އަޅުގަނޑުމެންނަށް ވަރަށް ފުރިހަމައަށް މިއަދު ހާސިލުވި ކަމުގެ އުފާ އެބަ އޮތް. އަޅުގަނޑު ގަބޫލުކުރާ ގޮތުގައި މިއީ މަޖާ، ޝައުގުވެރި މާހައުލެއްގައި ކުދިންނަށް އެކުދިންގެ ނަފްސު ތަރައްގީކުރުމަށް ދެވުނު ފުރުސަތެއް. އެހެންކަމުން ކުޑަކުދިންނަށް ހާއްސަކުރެވިފައިވާ ދުވަހެއްގައި، މިއީ މި ދުވަހާ ވަރަށް ގުޅޭ، ވަރަށް މުނާސަބު ހަރަކާތެއް،" އޭނާ ވިދާޅުވި އެވެ.

"އަޅުގަނޑު ގަބޫލުކުރަނީ މިއީ، ފެއާގައި ބައިވެރިވި ހުރިހާ ކުދިންނަށް ވެސް ވަރަށް ގިނަ ކަންކަން [ވިޔަފާރި އާއި އުފެއްދުންތެރިކަމުގެ ދާއިރާއިން] ދަސްވެގެން ދާނެ ކަމަށް. އަދި މީގެ ސަބަބުން އެކުދިންގެ ތައުލީމީ އަދި މުސްތަގުބަލުގެ ހަޔާތަށް ހެޔޮ ބަދަލުތަކެއް ގެނުވާނެ ފަދަ ފުރުސަތަކަށް މި ފުރުސަތު ވެގެންދިޔަ ކަމަށް."