ފުޑް ކާނިވަލްގެ ފައްކާ ރަހަތަކާ އެކު ފޯރި ވެސް ގަދަ

ހުޅުމާލޭ ސެންޓްރަލް ޕާކަށް މާ އަވަހަށް ބޮޑު އީދު އައި ކަހަލަ އެވެ. އެތަނުގައި ކުރިއަށްދާ ފުޑް ކާނިވަލުގައި އެކި ބާވަތްތަކުގެ ކާބޯތަކެތި އަޖުމަ ބެލުމަށް އެތައް ބަޔަކު އަންނަނީ ޒިޔާރަތް ކުރަމުންނެވެ. ލައިވް މިއުޒިކް އަޑުއަހާލުމަށް ސްޓޭޖް ކައިރީ އަތުރާފައިވާ ކުނާތައް އޮންނަނީ ފުރިފަ އެވެ. އެތަނުގައި ހަދާފާއިވާ ބިރުވެރި ހޮހޮޅަ 'ހަންޑި ގަނޑުވަރު' އަށް ވަނުމަށް ދަމާފައިވާ ކިއުތައް ދިގެވެ.

ސްކޫލް ބަންދާ ގާތްވެފައިވާތީ ކުދިން ގޮވައިގެން އެންމެން އެކީގައި ދާ އާއިލާތަކެވެ. ޒުވާން ފުރައިގެ ރައްޓެހިންނާއި އަތް ޖޯޑުކޮށްގެން ދާ ދެމަފިރިންނެވެ.

ޖާގަ ތަނަވަސް ސެންޓްރަލް ޕާކުގައި މިއީ މިހާތަނަށް ބާއްވާ އެންމެ ބޮޑު ކާނިވަލެވެ. ސްޓޯލްތައް ހަދާފައި ހުރީ ހިނގާބިނގާވާ މިހުންނަށް ފަސޭހަވާނެ ގޮތަށް، މީހުން އެއް ތަނަކަށް ބޮނޑިނުވާ ގޮތަށެވެ.

ހުވަނދުމާ ހިނގުމުން އައިސް ސެންޓްރަލް ޕާކަށް ވަންނަ އިރު ކުލަގަދަ ދިދަތަކާއި ބޮކި ފަތި ދަމާފައި އޮތް މާހައުލުގެ ދެ ފަރާތުގައި ސްޓޯލްތައް އަތުރާލާފައިވެ އެވެ.

މިއުޒިކާއި ބޮކި އެރުވުމުމާއި ކުޑަކުދިން ދިއްލޭ އެކި ސާމަނު ހިފައިގެން ކުޅެ ދުވެ އުފާ ކުރާ މަންޒަރު ފެނެ އެވެ. 

ލުއިކާނާ، ސަގާފީ ކެއުން، ފޮނިކާ ތަކެތި، މިހެން ގޮސް ނެތް ބާވަތެއް ފުޑް ކާނިވަލްގައި މަދެވެ. ކާބޯތަކެތި ހޯލްސޭލް ކުރާ ކުންފުނިތަކުގެ ސްޓޯލްތަކާއި ބޮޑެތި ރެސްޓޯރަންޓްތަކުގެ އިތުރުން ގޭގައި ކާބޯތަކެތި ތައްޔާރުކޮށްގެން ވިއްކާ މީހުންގެ ސްޓޯލްތަކެވެ. އެ ތަންތަނުން ފެންނަނީ ގިނައިން ޒުވާން މޫނުތަކެވެ. 

'އައްޑޫ ރަހަ' ސްޓޯލްގައި ދެ ޒުވާނަކު ތިބީ އެމީހުންގެ މަންމަ ސ. ފޭދޫގައި ހަދާފައިވާ ތަކެތި ވިއްކާށެވެ.

އަލައިން ހަދާފައިވާ މެޓާތަކެއް އެންމެ 5 ރުފިޔާއަށް މި ސްޓޯލްގައި ހުއްޓެވެ.

ސްޓޯލްގައި ހުރި އެއް ޒުވާނަކު ބުނީ ރަށުން ގެނެސްގެން ވިއްކަން ބެހެއްޓި ބޮނޑި އާއި އެހެނިހެން އައްޑޫ ހަދިޔާގެ ސްޓޮކް އަރައިގެން ދިޔަ ގޮތް ވެސް ނޭނގޭ ކަމަށެވެ.

"މިއީ އެންމެ ފަހު ކުދިގުޅަ ޕެކެޓް،" އޭނާ ބުންޏެވެ.

ކާނިވަލުގެ އެތެރެއަށް ވަދެގެން ކުރިއަށްދާ އިރު ޑިޒާޓް ބޮކްސް ލޮލުގައި އަޅައިގަންނާނެ އެވެ. އިންސްޓަގްރާމްގައި ބޮޑު މަގުބޫލުކަމެއް ހޯދާފައިވާ ވެން ގޯ ކޭކް ހަދާ ފާތިމާ ޒައީމް ބުނިގޮތުގައި އޭނާގެ އުފެއްދުންތަކަށް ބޮޑު ތަރުހީބެއް ލިބެ އެވެ.

އާއްމުކޮށް ފޮނިކާތަކެތި ތައްޔާރުކުރާ ފާތިމާ ކާނިވަލަށް ކޮންމެވެސް ވަރަކަށް ކުޅި އެއްޗެހި ވެސް ތައްޔާރުކޮށްފައިވެ އެވެ.

އެއް ސްޓޯލެއްގައި އަވަން ބަހައްޓައިގެން ވަގުތުން ކުކީ ފިހަމުން ދިޔަ އެވެ. މި ސްޓޯލް އިން ފެންނަނީ މުޅި އާއިލާ އެއްކޮށް ހަރަކާތްތެރިވާ ތަނެވެ.

ބަލާބެލުމަށް މި ސްޓޯލަށް އެންމެ ބޮޑަށް ޝައުގުވެރިވަނީ ކާނިވަލަށް ދާ ކުޑަކުދިންނެވެ. ކުކިސްކުކީގެ ޓާގެޓް މާކެޓަކީ ވެސް އެއީ އެވެ.

'އަތުމީރު' ސްޓޯލްގައި، މަންމަ ތައްޔާރު ކުރާ ބާވާތްތައް ވިއްކަން ދެ ފިރިހެން ދަރިން އަވަދިނެތި އުޅުނެވެ. 

އަތުމީރު ބްރޭންޑްގެ ހިކި ހަވާދާއި ފުނޑި ހަވާދާއި މަސްމިރުހާއި އަސާރަތައް މޭޒުމަތީ އަތުރާފައި ހުއްޓެވެ. ކަނޑުކުކުޅާއި ކުޅިމަހާއި ބޮނޑިބަތް ވިއްކަން ހުއްޓެވެ. މިއީ މަރިޔަމް ޒާހިރާގެ ފަހުރުވެރި މަސައްކަތެވެ.

ޒުވާން ދެ އެކުވެރިންގެ ޖޯވިއަލް ބައިޓްސް ވެސް ތަފާތެވެ.

މި ސްޓޯލްގައި ހުރި ގިނަ އެއްޗެހި ކައްކާ ތައްޔާރުކޮށްފައިވަނީ ޔާނިއާ އެވެ. އޭގެ އިތުރުން އޭނާގެ މާމަ ފިހެފައިވާ މަސްރޮއްޓާއި ބޯކިބާ ފަދަ ދިވެހި ބާވަތްތައް ވެސް ވިއްކަން ހުއްޓެވެ.

މި ސްޓޯލް އިން ވިއްކާ ޕިންކް ލެމަނޭޑް މަގުބޫލެވެ.

ހުޅުމާލޭގައި ބޮޑު ތަރުހީބެއް ލިބެމުން އަންނަ މޯލްޑިވް ކިޗަން ރެސްޓޯރަންޓްގެ ސްޓޯލް ވެސް ތިޔާގި އެވެ.

މޭޒުމަތީ އަތުރާފައިވާ ކޮފީ ތަށިތަކުގައި އެމީހުން ވިއްކަނީ ކޮފީއެއް ނޫނެވެ. ބޯކުރި ފަޅޯ، ބޯކުރި ކައްޓަލަ، ބޯކުރި ބަނބުކެޔޮ، ފުފޫ ކަނދި، މިހެން ގޮސް ތަފާތު އެކި ދިވެހި ބާވަތްތަކެވެ. މީހުން އެ ތަކެތި ގަނެގެން ކޮތަޅު ކޮތަޅުގައި ގެއަށް ގެންދާ ތަން ފެނެ އެވެ.

އެ ސްޓޯލަށް ޑިމާންޑް ބޮޑެވެ. އަގުތައް ވެސް ރަނގަޅެވެ.

މޯލްޑިވް ކިޗަންގެ ޖީހާން ސަލީމް ގާތު އެންމެ ހިނގަނީ ކޯއްޗެއްތޯ ސުވާލުކޮށްލުމުން ބުނީ ޓޮފީ އިން ފެށިގެން ހުރިހާ އެއްޗެއް ވެސް ހިނގާ ކަމަށެވެ.

ހުޅުމާލޭ މަމަކް ކެފޭގެ ސްޓޯލުން ޗިލީ ފްރައިސް، ކޮއްތު އަދި ޗިލީ ޗިކަން ލިބެން ހުއްޓެވެ. ބިރިޔާނީ އެންމެ 50 ރުފިޔާ އަށެވެ. އެ ސްޓޯލުގައި ވަގުތުން ފަރާޓާ ފިހުން ވެސް ކުރިއަށްދެ އެވެ.

ފުޑް ކާނިވަލުގައި ކާބޯތަކެތި ތިޔާގި އެވެ. މޯމޯސް އާއި ޕާނީޕޫރީ ވެސް އެބަހުއްޓެވެ. ތަނުން ފެންނަނީ އުފާވެރި މާހައުލެކެވެ.

މާދަމާގެ ނިޔަލަށް، ހަވީރު 5 އިން ރޭގަނޑު 11:55 އަށް ކާނިވަލް ކުރިއަށް ދާނެ އެވެ. ޖައްސާލާށެވެ.