ނާސާގެ އެޕޯލޯ 17ގައި ހަނދަށް ދިޔަ އެސްޓްރޮނޯޓު ހެރިސަން ސްމިޓް، ހަނދުން ހިރަފުސް ނަގަނީ: މިއީ އެންމެ ފަހުން ހަނދުގައި ހިނގި ދެ އިންސާނުންގެ ތެރެއިން އެކަކު (ފޮޓޯ/ނާސާ)
ހަނދާއި އިންސާނުން: މިއީ ގުޅިފައި އޮތް ލޯތްބެއް
ލޯބިވެރިޔާ ސިފަކުރަން އޭގެ ހިތްގައިމުކަމުގެ ވާހަކަ އެވެ؛ ސާދަ ވިލޭރޭގެ ހަނދެއް ފަދަ އެވެ. ރޭގަނޑުގެ ހިމޭންކަމުގައި އެއަށް ނަޒަރު ހުއްޓާލައިގެން ތިބެވެ އެވެ.
އެ ހުރިހާ ކަމަކާ އެކު ދުނިޔޭގެ ހަނދު އިންސާނުންނާ ގުޅިފައި އޮތް ގުޅުން ބޮޑެވެ. އަދި އިލްމީ ގޮތުން އިންސާނާ ކުރިއަރައި ދިޔަ ވަރަކަށް ހަނދާ ބެހޭ ހޯދުންތައް ވެސް އެހާމެ ގިނަ އެވެ. އެންމެ ފަހުން 'ސާދަ ވިލޭރޭގެ އެ އަލި ގަދަ ރީތި ހަނދު'ގެ ފަސްގަނޑުގައި އިންސާނުންގެ ފައި ބީއްސާލި ދުވަސްތައް ވެސް ދެކެފި އެވެ.
މިއަދަކީ އެ ތާރީހީ ދަތުރުތަކުގައި އެންމެ ފަހު އިންސާނުން ހަނދުގައި ވަގުތު ހޭދަކުރި ދުވަސްތަކުގެ ތެރެއިން އެއް ދުވަހެވެ. މީގެ 50 އަހަރު ކުރިން 11-14 ޑިސެމްބަރު 1972 ގައި، އެމެރިކާގެ ދެ އެސްޓްރޮނޯޓުން ކަމަށްވާ އީޖިން އެންޑްރޫ ކާނަން އާއި ހެރިސަން ހާގަން ސުމިޓް، ތިން ބުރެއްގެ މަތިން ހަނދުގައި 22 ގަޑިއިރާއި ތިން މިނިޓް ހޭދަކުރި އެވެ.
އޭގެ ފަހުން އިންސާނުން އަދި ހަނދަކަށް ނުދެ އެވެ. އެކަމަކު އިއްޔެއަކީ އަލުން އެ ދަތުރު ފަށަން އެމެރިކާގެ ޖައްވީ އިދާރާ ނާސާއިން ކުރިއަށް ގެންދާ އަގުބޮޑު ޕްރޮގްރާމްގައި މުހިންމު ފިޔަވަޅެއް އެޅި ދުވަހެވެ. އެޕޯލޯ 17ގެ ދެ އެސްޓްރޮނޯޓުން ހަނދަށް ފޭބި ދުވަސް، 11 ޑިސެމްބަރާ ދިމާކޮށް އިއްޔެ ޕެސިފިކް ކަނޑަށް އެ ތިރިކުރީ އަލުން އިންސާނުން ހަނދަށް ގެންދަން ބޭނުންކުރާ އުޅަނދު، އޮރާޔަން އެވެ.
އިއްޔެއަކީ އަނެއްކާވެސް ތާރީހީ ދުވަހެކެވެ. އިންސާނުން އަލުން ހަނދަށް ފޮނުވަން ނާސާއިން ކުރިއަށް ގެންދާ އާޓީމިސް ޕްރޮގްރާމްގައި ބޭނުންކުރާ އުޅަނދު އޮރާޔަންގެ ޓެސްޓް ފުރަތަމަ ދަތުރުގައި ހަނދު ވަށައި ތިން ހަފުތާ ހޭދަކުރުމަށް ފަހު ރޭ ވަނީ އެނބުރި ދުނިޔެއަށް އައިސްފަ އެވެ. ހަނދަށް އިންސާނުން އުފުލަން ބޭނުންކުރާ މި އުޅަނދު ޕެސިފިކް ކަނޑަށް ވެއްޓިގަތީ ސަލާމަތުންނެވެ. ދުނިޔޭގެ އެޓްފޮސްފިއާގެ ތެރެއަށް ވަދެގަންނަ އިރު ކުރިމަތިވާ ގަދަ ހޫނުން، ގާތްގަނޑަކަށް 3،000 ޑިގްރީ، ރައްކާތެރިވާން އޭގައި ހަރުކޮށްފައި ހުރި ހީޓްޝީލްޑް ވަރުގަދަ ކަމަށް ވެސް ބެލެވެ އެވެ.
ނަމަވެސް ނާސާއިން އެއާ ބެހޭ ގޮތުން އެއްޗެކޭ ރަނގަޅަށް ބަލައި، ދިރާސާކޮށްފަ އެވެ.
އޮރާޔަން ހަނދު ވަށައި ހޭދަކުރި ދުވަސްތަކުގައި ހަނދާއި ދުނިޔޭގެ އެތައް ފޮޓޯއެއް ނެގި އެވެ. އަދި އޭގައި ހިމެނޭ އެކި އާލާތްތައް ޓެސްޓްކުރި އެވެ. މިއީ ޓެސްޓް ފުރަތަމަ ދަތުރަށް ވާތީ އޭގައި އެއްވެސް މީހަކު ނުދެ އެވެ. އުޅަނދުގެ ހުރިހާ ކަމެއް ކޮންޓްރޯލްކުރީ ދުނިޔޭގައި ތިބި ތަޖުރިބާކާރުންނާއި ފަންނީ މީހުންނެވެ. އެ މީހުން ބުނާ ގޮތުގައި އެ ދަތުރުގެ ހުރިހާ ކަމެއް ވެސް ދިޔައީ ބަރާބރަށެވެ.
ދެން އޮންނާނީ އިންސާނުންނާ އެކު އޮރާޔަންގެ ދެ ވަނަ ދަތުރު ހަނދާ ކައިރިއަށް ކުރުމެވެ. އެކަން އެންމެ އަވަހަށް ވެސް ވާނީ2024 ގައި ކަމަށް ލަފާކުރެ އެވެ. އިންސާނުން ހަނދަށް ފައިބަން، އާޓިމިސްގެ ތިން ވަނަ ދަތުރު ކުރެވޭވަރުވާނީ މިހަރު ބެލެވޭ ގޮތުގައި،2025-2026 ހިސާބުގަ އެވެ.
އެމެރިކާ އިން ހަނދަށް އިންސާނުން ފޮނުވީ އޭރުގެ ރޫސީ ވިލާތާއި އެމެރިކާއާ ދެމެދު ކުރިއަށް ދިޔަ ފިނި ހަނގުރާމައިގައި އެއް ބަޔަކަށް ވުރެ އަނެއް ބަޔަކު ، ޖައްވީ ކަންކަމުގައި ވެސް ކުރިއަރާފައި އޮތް ވަރު ދުނިޔެއަށް ދެއްކުމުގެ ގޮތުންނެވެ. އެ ވާދަ ކާމިޔާބުކުރީ އެމެރިކާ އެވެ. އޭގެ ފަހުން މިއަދާ ހަމައަށް އެހެން އެއްވެސް ގައުމަކަށް އިންސާނުން ހަނދަށް ފޮނުވޭ ވަރުގެ ކުރިއެރުމެއް އަދި ނުލިބެ އެވެ.
އެޕޯލޯ މަޝްރޫއުގެ އަގު މިހާރަށް ބެއްޔަސް ވަރަށް ބޮޑެވެ. އަދި ހަނދާ ބެހޭ ގޮތުން ހޯދިފައި ހުރި މައުލޫމާތު މަދުކަމުން ލިބެން އޮތް ފައިދާ ނޭނގޭތީ، އިންސާނުން ފޮނުވުމުގެ ބުރަ މސައްކަތަށް އޮތީ ދިރުމެއް ނައިހެވެ. އެކަމަކު ހަނދަށް ފޮނުވި ރޮބަޓް މިޝަންތަކާއި ހަނދު ކައިރިއަށް ފޮނުވި ޖައްވީ އެހެން އުޅަނދުތަކުން ލިބުނު މައުލޫމާތުން ހަނދަށް އަލުން ދިއުމުގެ ފައިދާ މިހާރު އޮތީ ބޮޑުވެފަ އެވެ.
އާޓީމިޝް މަޝްރޫއުއަކީ އެ ފައިދާ ހޯދުމުގެ ފެށުމެވެ. މި މަޝްރޫއުގައި އިންސާނުން ހަނދުގައި ތިބޭ ގޮތަށް ވެސް ހަދާނެ އެވެ. އަދި ހަނދު ބޭނުންކޮށްގެން މާސްއަށް އިންސާނުން ފޮނުވުމަކީ ވެސް، އެމެރިކާގެ އެންމެ ބޮޑު އުއްމީދެވެ.
ހަނދާއި އިންސާނުންމާ ދެމެދު އޮތް ލޯބި ހަމަ ވަރަށް ބޮޑެވެ.
ކޮމެންޓް (1)
ހަސަން