މުދިމަށް ހަމަލާ ދިން މައްސަލަ: ތޫނު އެއްޗަކުން މީހަކު މަރާލަން އުޅުމުގެ ދައުވާކޮށްފި

ތ. ދިޔަމިގިލީ މަގުމަތީގައި އެ ރަށު މުދިމަށް ވަޅިން ހަމަލާދީ ޒަހަމްކޮށްލި މައްސަލައިގައި ހައްޔަރުކުރި އޭނާގެ ރަހުމަތްތެރިޔާ، އެ ރަށު ހަސަން ސާމިދުގެ މައްޗަށް ދައުލަތުން ދައުވާކޮށްފި އެވެ.

މައްސަލައިގެ ފެށުން - ދިޔަމިގިލީ މަސްޖިދުލް އަމާނާތުގެ ވަގުތީ މުދިމު، އަހުމަދު ރަޝީދު މުހައްމަދު، 55، އަށް ހަމަލާ ދިނީ މާޗު 13ގެ ހެނދުނު 9:55 އެހާއިރު، ބައިސްކަލެއްގައި ދުއްވާފައި ދަނިކޮށެވެ. އެ މައްސަލައިގައި ސާމިދު ހައްޔަރު ކުރީ ހާދިސާ ހިނގި ދުވަހު އެވެ. އަދި މައްސަލަ ތަހުގީގުކޮށް އޭނާގެ މައްޗަށް ދައުވާކޮށްދޭން އެދި ފުލުހުން ޕީޖީ އޮފީހަށް މައްސަލަ ހުށަހެޅީ މިދިޔަ މަހުގެ ފަހުކޮޅު އެވެ.

ތަފްސީލް - ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު 'ދައުރު'އަށް މިއަދު ވިދާޅުވީ، އެ މައްސަލައިގައި ދައުވާކޮށް، މައްސަލަ ދިޔަމިގިލީ މެޖިސްޓްރޭޓުު ކޯޓަށް ހުށަހެޅީ މިދިޔަ މަހުގެ 28 ވަނަ ދުވަހު ކަމަށެވެ.

ވީ ކިހިނެއް؟ - ޝަފީއު ވިދާޅުވީ، ރަޝީދު ބައިސްކަލުގައި ދަނިކޮށް ސާމިދު އޭނާ ހުއްޓުވައި އޭނާގެ ބޮލާއި ކަރާއި ބުރަކައްޓާއި ކަނާއަތު ކޮނޑާއި ވާއަތަށް ވަޅިއަކުން ހަމަލާދީފައިވާކަން ފުލުހުންގެ ތަހުގީގުން އެނގިފައިވާ ކަމަށެވެ.

ގާތް ރަހުމަތްތެރިއެއްގެ ގޮތުގައި ހުރެ، ރަޝީދުގެ ގަޔަށް ސާމިދު ގަޔަށް ވަޅި ހެރީ ކީއްވެގެން ކަމެއް އަދިވެސް ސާފެއް ނުވެ އެވެ.

އެނގުން މުހިންމު - ރަޝީދަށް ލިބުނު ހަމަލާތަކުގެ ސަބަބުން އޭނާގެ ހާލު ސީރިއަސްވެ، ފުރާނަ ސަލާމަތް ކުރެވުނީ ކިރިޔާ އެވެ. އާއިލާއިން ކުރިން ބުނެފައިވާ ގޮތުގައި، އޭނާގެ ދެ އޮޕަރޭޝަނެއް ކުރި އެވެ. އަދި އޭނާގެ ހާލު ކުރިއަށް ވުރެ ރަނގަޅު ނަމަވެސް ކަނާތު ފައި އެއްވެސް ވަރަކަށް މަސައްކަތް ނުކުރާ ކަމަށާއި ނަފްސާނީ ގޮތުން ވެސް އޭނާއަށް އަސަރުކޮށްފައިވާ ކަމަށް ބުނެފައިވެ އެވެ.

ރަޝީދަށް ސާމިދު ހަމަލާ ދޭ މަންޒަރު ފެންނަ ސީސީޓީވީ ފުޓޭޖު ސޯޝަލް މީޑިއާގައި އާންމުވި އެވެ. އެ ވީޑިއޯއިން ފެންނަނީ: