'އިންޑިއާ އައުޓް'ގެ އަކުރު ބަދަލުކޮށްގެން ބެނާ ދަމަން ފަށައިފި

ރާއްޖެއަށް އިންޑިއާއިން ނުފޫޒު ފޯރުވުމާ ދެކޮޅަށް ކަމަށް ބުނެ އިދިކޮޅު ޕީޕީއެމް/ޕީއެންސީއިން ހިންގަމުންދާ 'އިންޑިއާ އައުޓް' ކެމްޕެއިނަކީ ގައުމީ ސަލާމަތަށް ހުރި ނުރައްކަލެއް ކަމަށް ސަރުކާރުން ކަނޑައެޅުމުން، އެ ކެމްޕެއިންގެ ސްލޯގަން 'އިންޑިއާ އައުޓް'ގެ ސްޕެލިން، ނޫނީ އަކުރު ބަދަލުކޮށް، އަނެއްކާ ވެސް ބެނާ ދަމަން ރޭ ފަށައިފި އެވެ.

މައްސަލައިގެ ފެށުން - އިންޑިއާއިން ނުފޫޒު ފޯރުވާ ކަމަށް ބުނެ އިދިކޮޅުން ހިންގާ ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ބުނެ އެ ހަރަކާތް ހުއްޓުވަން އިއްޔެ ރައީސް އިބްރާހިމް މުހައްމަދު ސޯލިހު ވަނީ ގަރާރަކުން އަންގަވައިފަ އެވެ.

ރައީސްގެ ގަރާރު ނެރުމުގެ ކުރިން ވެސް ފުލުހުން ވަނީ މާލޭގެ އިމާރާތްތަކުގެ ބޭރުގައި ދަމާފައި ހުރި 'އިންޑިއާ އައުޓް' ބެެނާތައް ނަގަން ނުކުމެފަ އެވެ. އެގޮތުން، ޕީޕީއެމްގެ އޮފީހުގައި ދަމާފައި ހުރި ބެނާގެ އިތުރުން، ހަރަކާތް ލީޑު ކުރައްވާ ކުރީގެ ރައީސް އަބްދުﷲ ޔާމީންގެ ގޭގައި ދެމި ބޮޑު ބެނާ ވެސް ނެގި އެވެ.

ވީ ކިހިނެއް؟ - ރައީސްގެ ގަރާރަކުން އިންޑިއާ އައުޓް ހަރަކާތް ހުއްޓުވަން އަންގައި އަދި ބެނާތައް ނެގުމުގެ މަސައްކަތް ފުލުހުން ކުރަމުންދާއިރު، މިހާރު އިދިކޮޅުން ދަނީ ބެނާތަކުގައި "INDIA OUT" ޖެހުމުގެ ބަދަލުގައި އެ ބެނާގެ ސްޕެލިން އިނގިރޭސި ބަހުން "IN DEAR OUT"އަށް ބަދަލުކޮށްގެން ބެނާ ޖަހަމުންނެވެ.

ރައީސްގެ ގަރާރު:

އެނގުން މުހިންމު - އިންޑިއާ އައުޓް ހަރަކާތް ހުއްޓުވަން ރައީސް އަންގަވާފައި ވާއިރު، އިދިކޮޅުން ބުނަމުންދަނީ އެއީ ގާނޫނުއަސާސީއިން ލިބިދޭ އަސާސީ ހައްގުތަކަކާ ހިލާފު ނިންމުމެއް ކަމަށާއި އެ ނިންމުމަށް އަމަލު ނުކުރާނެ ކަމަށެވެ. އަދި އެ ނިންމުން ބާތިލު ކުރަން ކޯޓަށް ދާނެ ކަމަށް ވެސް އިދިކޮޅުން ބުންޏެވެ.