ޒުވާން ލިއުންތެރިޔާ ހަމްދޫން 'ދައުރު'އާ ގުޅިއްޖެ

ޒުވާން ނޫސްވެރިޔާ މުހައްމަދު ހަމްދޫން 'ދައުރު'އާ މިއަދު ގުޅިއްޖެ އެވެ.

ރާއްޖޭގައި މި ވަގުތު ތިބި އެންމެ ހުނަރުވެރި ލިއުންތެރިންގެ ތެރޭގައި ހިމެނޭ ހަމްދޫން، 31، 'ދައުރު'އާ މި ގުޅުނީ މިދިއަ އަހަރުގެ މާޗު މަހުން ފެށިގެން 'އަދަދު'ގައި އިސް މަގާމުތަކެއް ފުރުމަށް ފަހު އެވެ.

ކުޅިވަރު ރިޕޯޓަރެއްގެ ގޮތުން ނޫސްވެރިކަމުގެ ދާއިރާއަށް ވަން، އެކަމަކު ފަހުން އެހެން މައުލޫއުތަކަށް ވެސް މޮޅު ލިއުންތަކެއް ލިއެ، މޯލްޑިވްސް މީޑިއާ ކައުންސިލްގެ އެވޯޑްސް އެކި ފަހަރު މަތިން ހާސިލްކޮށްފައިވާ ހަމްދޫން ބުނީ "ދައުރު ޓީމަކީ މި ވަގުތު ރާއްޖޭގައި އޮތް ނޫސްވެރިކަމުގެ އެންމެ ތަޖުރިބާކާރު އެއް ޓީމު" ކަމަށެވެ.

"މި ޓީމާ އެއްކޮށް ދެން އޮތް ހަރުފަތަކަށް ދާން ބޭނުން،" ސ. ހުޅުދުއަށް އުފަން ހަމްދޫން ބުންޏެވެ.

ސޯޝަލް މީޑިއާއާ އެކު ނޫސްވެރިކަން ވަރަށް ބޮޑަށް މިވަނީ ބަދަލުވެފަ އެވެ. ހަބަރަކީ މިހާރު ކޮންމެހެން ވަކި ނޫހެއްގައި ޖަހަންދެން އާންމުން އިންތިޒާރުކުރާ އެއްޗަކަށް ނުވެ އެވެ. ސޯޝަލް މީޑިއާ ފުރިފައި އޮންނަނީ އާންމުން ފަތުރާ ހަބަރުތަކުންނެވެ. އެހެންކަމުން ނޫސްވެރިންގެ މަސައްކަތް މިވަނީ ކުރިއަށް ވުރެ ބުރަވެފައި، ތަފާތުކުރަން ވެސް ޖެހިފަ އެވެ.

ހަމްދޫނަށް އެކަން ހަމައެކަނި އެނގެނީކީ ނޫނެވެ. އޭނާ އަންނަނީ މި ބަދަލުތައް، ރާއްޖޭގެ އެންމެ ބޮޑު މީޑިއާތަކާ އެކު، ތަޖުރިބާ ވެސް ކުރަމުންނެވެ. އެހެންކަމުން ނޫސްވެރިޔަކަށް، ހާއްސަކޮށް މޮޅު ނޫސްވެރިޔަކަށް ދެން އޮތް ހަރުފަތަކީ، އޭނާ ބުނި ގޮތުގައި، އާންމު މީހާއަށް ފީނައިނުގަނެވޭ މައްސަލަތަކާއި މައުލޫއުތަކުގެ ތެރެއަށް ފީނައިގެން، މޮޅު ލިއުންތައް އުފެއްދުމެވެ.

"އާންމު މީހާއަށް ނުލިބޭ ކޮންޓެންޓް ފޯރުކޮށްދޭ ބަޔަކަށް މީހުން ސަމާލުކަން އެނބުރެނީ،" ހަމްދޫން ބުންޏެވެ.

އެ ތަފާތު އުފެއްދުންތައް ތައްޔާރުކުރުމުގެ ގާބިލްކަން ހަމްދޫންގެ އެބަ ހުއްޓެވެ. އޭނާ ވަނީ ކުޅިވަރުގެ ބިޒީ ނޫސްވެރިކަން ކުރި އިރު ވެސް އަދި ފަހުން 'އަދަދު'ގައި ހޭދަކުރި އަހަރުގެ ތެރޭގައި ވެސް ތަފާތު ލިއުންތައް އާންމުންނަށް ގެނެސްދީފަ އެވެ. ތާރީހީ އަދި އަދަބީ ލިއުންތަކެވެ. މީހުންގެ ޕްރޮފައިލް އާއި އިޖުތިމާއީ ބައެއް މައްސަލަތަކެވެ.

"ކޮންމެ ކޮންމެ އެއްޗެއް ލިޔާކަށް ބޭނުމެއް ނުވޭ. ތަފާތުކޮށް ލިޔަން ބޭނުންވަނީ،" ހަމްދޫން ބުންޏެވެ.

"އެހެން މީހުންނަށް ނޭނގި އޮތް ސައިޑެއް ނަގައިގެން، ނެރޭޓިވް ސްޓައިލަށް ލިޔުމުގެ ޝައުގު ހުންނަނީ."

'ދައުރު'ގެ ލިއުންތެރިން މަސައްކަތްކުރަމުން އަންނަނީ ރީތި ލިއުންތެރިކަމެއްގެ ތެރެއިން އާންމުންނާ ހަމައަށް ކަންކަން ގެނެސްދޭށެވެ. ހަމްދޫން ކަހަލަ ހުނަރުވެރި، ޒުވާން ލިއުންތެރިޔަކު މި ޓީމާ ގުޅުމަކީ، މުއްސަނދި އުފެއްދުންތަކެއް ތައްޔާރުކުރަން ލިބުނު އިތުރު ބާރެކެވެ.