އަހުމަދު މޫސާ އެދެނީ ދައުލަތުން ބޭނުންވާ ކޮންމެ ޝަރުތެއް ކޮށްފައި ވިޔަސް ބަންދުން ދޫކޮށްލަން

ދައުލަތުން ކުރާ ކޮންމެ ޝަރުތެއް ކޮށްފައި ވިޔަސް ބަންދުން ދޫކޮށްލަން ފްލެޓް އަޅައިދޭނެ ކަމަށް ބުނެ މަކާރާއި ހީލަތުން ގިނަ ބައެއްގެ އަތުން ފައިސާ ނަގައިގެން ފިލި، ސީލައިފް ގްލޯބަލްގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އައްމަޓީ) މިއަދު ކޯޓުގައި އެދިއްޖެ އެވެ.

މައްސަލައިގެ ފެށުން - ސީލައިފް ކުންފުނިން ހުޅުމާލޭގައި 3،000 ފްލެޓް އަޅައިދޭނެ ކަމަށް ބުނެ އެތައް ބައެއްގެ އަތުން ފައިސާ ނެގުމަށް ފަހު ފައިސާ އަނބުރާ ނުދެއްކި މައްސަލައިގައި އަހުމަދު މޫސާގެ މައްޗަށް ހިޔާނާތްތެރިވުމުގެ 42 ދައުވާއެއް ދައުލަތުން ކުރެ އެވެ. އެ ދައުވާތަކަށް މީގެ ކުރިން އޭނާ ވަނީ އިންކާރު ކޮށްފަ އެވެ.

އެ މައްސަލައިގެ ޝަރީއަތް ނިމެންދެން ބަންދުކޮށްފައި ވަނިކޮށް، މިދިޔަ އޮކްޓޯބަރު މަހު ކްރިމިނަލް ކޯޓުން ވަނީ އަހުމަދު މޫސާގެ ދައްތަ އާއި ކޮއްކޮ ޖާމިނުކޮށް، އޭނާ ބަންދުން ދޫކޮށްލައިފަ އެވެ. އެކަަމަކު، އެ ނިންމުން ދައުލަތުން ހައި ކޯޓުގައި އިސްތިއުނާފު ކުރުމުން އެ ކޯޓުން ނިންމާފައި ވަނީ އޭނާ ބަންދު ކުރާށެވެ. އެއީ އޭނާ ފިލައިގެން ދިޔުމުގެ ފުރުސަތު އަދިވެސް އޮތް ކަމަށް ބުނެ އެވެ.

ތަފްސީލު - މިއަދު އަހުމަދު މޫސާގެ މައްސަލައިގައި ކްރިމިނަލް ކޯޓުގައި އޮތް އަޑުއެހުމުގައި އޭނާގެ ބަންދު މުރާޖައާ ކުރުމުގެ ބައި ވެސް ކުރިއަށްގެންދިޔަ އެވެ. އެ އަޑުއެހުމުގައި އޭނާގެ ފަރާތުން އެދިފައި ވަނީ ޝަރުތުކޮށްފައި ބަންދުން ދޫކޮށްލާށެވެ.

އަހުމަދު މުސާގެ ވަކީލު އަދި ކުރީގެ ޑެޕިއުޓީ ޕީޖީ މަރިޔަމް ނިހާޔަތު 'ދައުރު'އަށް ވިދާޅުވީ ދައުލަތުގެ މައިގަނޑު ކަންބޮޑުވުމަކީ އަހުމަދު މޫސާ ދޫކޮށްލައިފި ނަމަ ފިލުން ކަމަށްވާއިރު، ފިލުމުގެ އެއްވެސް ނިޔަތެއް ނެތް ކަމަށް އަހުމަދު މޫސާގެ ފަރާތުން މިއަދު ކޯޓުގައި ބުނެފައިވާނެ ކަމަށެވެ.

އޭނާ ފިލާފާނެ ކަމުގެ ބިރު ނައްތާލުމަށްޓަކައި ނުވަތަ ނުފިލާނެކަން ޔަގީން ކުރުމަށް ޓަކައި ދައުލަތަށް ފެންނަ ކޮންމެ ފިޔަވަޅެއް އަޅާފައި ވިޔަސް އޭނާ ދޫކޮށްލަން އޭނާ އެދޭ ކަމަށް ނިހާޔަތު ވިދާޅުވި އެވެ.

"ދައުލަތުން ބުނި ގޮތަކަށް އެއްބަސްވެގެން ޖަލުން ނުކުންނަން އަންމަޓީ ބޭނުންވަނީ." ނިހާޔަތު ވިދާޅުވި އެވެ.

އަހުމަދު މޫސާގެ ފަރާތުން ދެކޭ ގޮތުގައި އެޅިދާނެ ފިޔަވަޅުތައް:

މި ފިޔަވަޅުތަކަކީ މީގެ ކުރިން ވެސް އޭނާގެ ފަރާތުން ހުށަހެޅި ކަންކަމެވެ. އެކަމަކު، އޭރު ވެސް ދައުލަތުން އެދުނީ އޭނާ ފިލައިފާނެތީ ބަންދު ދަމަހައްޓާށެވެ.

މިނިވަންވާން އަހުމަދު މޫސާ އެދޭ ސަބަބުތައް:

ދައުލަތުން މިއަދު ވެސް ވަނީ އޭނާ ޝަރުތުކޮށްފައި ވެސް ދޫކޮށްލަން ދެކޮޅު ހަދައިފަ އެވެ. ދައުލަތުން އެދުނީ އޭނާ ޝަރީއަތް ނިމެންދެން ކޮށްފައިވާ ބަންދު ދަމަހައްޓާށެވެ.

މީގެ ކުރިން ވެސް އަހުމަދު މޫސާ ދައުވާތަކަށް އިންކާރުކޮށްފައިވެ އެވެ. އެކަަމަކު، އޭނާގެ ވަކީލު ބަދަލުވުމުން، ދައުވާގައިވާ ބައެއް ކަންކަން ސާފުކުރަން އާ ވަކީލަށް ފުރުސަތުދިނެވެ. އަދި މިއަދު އެކަން ނިމުމުން އަނެއްކާ ވެސް އޭނާ ވަނީ ދައުވާއަށް އިންކާރުކޮށްފަ އެވެ.

މީގެ ކުރިން އަހުމަދު މޫސާގެ ވަކީލެއްގެ ގޮތުގައި މަސައްކަތް ކުރެއްވީ ކުރީގެ ޕީޖީ މުހުތާޒު މުހުސިން އެވެ.

ދައުލަތުން އަހުމަދު މޫސާގެ މައްޗަށް ކުރާ ކޮންމެ ދައުވާއެއް ކޯޓުގައި އިއްވީ ވަކިވަކިންނެވެ. އެ ހުރިހާ ދައުވާތަކެއް އިއްވަން ގިނަ ވަގުތުތަކެއް ވެސް ހޭދަވި އެވެ. މިދިޔަ ސެޕްޓޭމްބަރު މަހު ދައުވާތައް އިއްވަން ބޭއްވި ފުރަތަމަ އަޑުއެހުމުގައި އިއްވުނީ 20 ދައުވާ އެވެ. އެ ދައުވާތައް އިއްވުނީ ހެނދުނުން ހަވީރަށް އަޑުއެހުން ބާއްވައިގެންނެވެ.

އެނގުން މުހިންމު - އައްމަޓީ ވަނީ ގިނަ ދުވަސްތަކެއް ފިލައިގެން ރާއްޖެއިން ބޭރުގައި އުޅެފަ އެވެ. އެކަމަކު، އޭނާ ކޯޓުގައި ބުނެފައި ވަނީ ފިލައިގެން ނޫޅޭ ކަމަށާއި ލަންކާގައި އުޅުނީ އެ ގައުމުގެ މީހަކާ އިނދެގެން ކަމަށެވެ.

ސީލައިފުން ފައިސާ އަނބުރާ ނުދިނުމުގެ ސަބަބުން ގެއްލުންވި މީހުންގެ ތެރެއިން 203 މީހަކު ކޯޓުގައި ދައުވާ ވެސް ކުރި އެވެ. އެ މައްސަލައިގެ ތެރެއަށް ސަރުކާރުން ވަދެ، އެ މީހުންނަށް ބަދަލުދީ، ސަރުކާރުގެ ހައުސިން މަޝްރޫއުއަކުން ފްލެޓު ގަންނަން ފުރުސަތު ދޭން ނިންމި އެވެ.