ޕީއެންސީ އިންތިހާބުގެ މާރާމާރީ: ދެ މީހަކު ހައްޔަރުކޮށްފި

އިއްޔެ ބޭއްވި ވެރިކަން ކުރާ ޕީއެންސީގެ އެތެރޭގެ އިންތިހާބުގެ ވޯޓު ގުނުން ހުޅުމާލެ ފޭސް 2ގައި ހުންނަ ކާމިލްދީދީ ސްކޫލުގައި ކުރިއަށް ދަނިކޮށް، ގްރޫޕަކުން އެތަނަށް ވަދެ، މާރާމާރީ ހިންގި މައްސަލައިގައި ދެ މީހަކު ހައްޔަރުކޮށްފި އެވެ.

ތަފްސީލު - ވަކި ޕާޓީއަކާއި ސްކޫލެއްގެ ނަން ނުބުނެ ފުލުހުން ރޭ މީޑިއާތަކަށް ފޮނުވި މެސެޖެއްގައި ބުނީ ރޭ 9:15 ހާއިރު ބަޔަކު އެ ސްކޫލަށް ވަދެ، ސްކޫލަށާއި ސްކޫލުގެ މުދަލަށް ގެއްލުންދީ، އެތަނުގައި ތިބި މީހުންނާ މެދު މާރާމާރީ ހިންގާފައިވާ މައްސަލައެއް ފުލުހުން ތަހުގީގު ކުރަމުން އަންނަ ކަމަށެވެ.

ފުލުހުން ބުނީ އެ މައްސަލައިގައި މިރޭ ދެ މީހަކު ހައްޔަރުކޮށްފައިވާ ކަމަށެވެ. އެއީ 23 އަހަރާއި 24 އަހަރުގެ ދިވެހި ދެ ފިރިހެނުންނެވެ.

ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި، ބަޔަކު ވަދެ، އެ ތަނުގައި ތިބި މީހުންނަށް ހަމަލާދީ، އެ ތަނުގައި ހުރި ގޮނޑި ފަދަ ތަކެތި އުކާ ހަދާފައިވެ އެވެ. 

އެނގުން މުހިންމު - އިއްޔެ ހެނދުނު 9 އިން ހަވީރު 4އަށް ކުރިއަށް ގެންދިޔަ އިންތިހާބުގައި އެކި މަގާމުތަކަށް 2،500އަށް ވުރެ ގިނަ މީހުން އިންތިހާބު ކުރި ކަމަށް ޕީއެންސީން ވަނީ ބުނެފަ އެވެ.

ޕީއެންސީގެ ކޮންގްރެސްގެ ކުރިން ބޭއްވި މި އިންތިހާބުގައި ދާއިރާތަކުގެ ސްޓިއަރިން ކޮމިޓީތަކުގެ ރައީސުންނާއި ނައިބު ރައީސުންގެ އިތުރުން ޕާޓީގެ އެތެރޭގެ އެކި މަގާމުތަކަށް މެންބަރުން އިންތިހާބު ކުރި އެވެ.

އެ ޕާޓީގެ ކޮންގްރެސް އޮންނާނީ އަންނަ ސެޕްޓެމްބަރު މަހު އެވެ.