ނާޒިމް ތުހުމަތުތައް ދޮގުކުރައްވައި މަޖިލީހުގެ ނައިބު ރައީސްކަމުން އިސްތިއުފާދެއްވައިފި

ރައްޔިތުންގެ މަޖިލީހުގެ ނައިބު ރައީސްކަމުން ދިއްގަރު ދާއިރާގެ މެންބަރު އަހްމަދު ނާޒިމް ވަކިކުރުމަށް ވެރިކަން ކުރާ އަދި މަޖިލީހުގެ ސުޕަ މެޖޯރިޓީ އޮތް ޕީއެންސީން ހުށަހަޅާފައިވާ މައްސަލަ މަޖިލީހުގެ މިއަދުގެ ޖަލްސާގައި ފަށަން ވަގުތު ކުޑަތަންވެފައި ވަނިކޮށް، ނާޒިމް އެ ތުހުމަތުތައް ދޮގުކުރައްވައި އެ މަގާމުން އިސްތިއުފާދެއްވައިފި އެވެ.

ވީ ކިހިނެއް؟ - ރައްޔިތުންގެ މަޖިލީހުގެ ނައިބު ރައީސްކަމުން ނާޒިމް އިސްތިއުފާ ދެއްވީ، އޭނާ އެ މަގާމުން ވަކިކުރުމުގެ މައްސަލަ މިއަދުގެ ޖަލްސާއަށް އެޖެންޑާކޮށްފައި ވަނިކޮށެވެ. ޕީއެންސީއަށް ސުޕަ މެޖޯރިޓި އޮތް މަޖިލީހުން ނަގާ ވޯޓުގައި ނާޒިމް ވަކިކުރަން އޮތީ ނިންމާފަ އެވެ.

ނާޒިމް ނިސްބަތްވެވަޑައިގަންނަވާ، ވެރިކަންކުރާ ޕީއެންސީގެ ޕާލިމަންޓްރީ ގްރޫޕުން އޭނާއަށް އިތުބާރު ނެތް ކަމަށް ނިންމައި އޭނާ މަޖިލީހުގެ ނައިބު ރައީސް ކަމުން ވަކިކުރުމުގެ މައްސަލައެއް މަޖިލީހަށް ހުށަހެޅީ މި މަހު 13ގައި ބޭއްވި ބައްދަލުވުމުގަ އެވެ.

ޕީއެންސީން ހުށަހެޅި ގަރާރުގައި ބުނެފައިވަނީ، މަޖިލީހުގައި ފިތުނަ އުފައްދައި މަސްލަހަތު ގެއްލުވާލުމަށް އޭނާ ތަކުރާރުކޮށް މަސައްކަތްކުރައްވާފައިވާ ކަމަށެވެ.

 ގަރާރުގައި ބުނީ އިތުބާރު ނެތް ކަމަށް ހުށަހަޅަނީ:

ބުނީ ކީކޭ؟ - ނާޒިމް މިއަދު ނެރުއްވި ނޫސްބަޔާނުގައި މަޖިލީހުގެ ނައިބު ރައީސްގެ މަގާމުން އޭނާ ވަކިކުރުމަށް ހުށަހަޅާފައިވާ ގަރާރުގައި ކޮށްފައިވާ ތުހުމަތުތައް ވަނީ ދޮގުކުރައްވާފަ އެވެ.

އޭނާ ވިދާޅުވީ އެ ތުހުމަތުތައް ސާބިތުކޮށްދިނުމަށް އެއްވެސް ހެއްކެއް ނުވަތަ ގަރީނާއެއް އެ ގަރާރުގައި ބަޔާންކޮށްފައި ނެތް ކަމަށެވެ.

މަޖިލީހުގެ ނައިބު ރައީސް ނުވަތަ މެމްބަރެއްގެ ހައިސިއްޔަތުން ވިޔަސް އޭނާ ކޮށްފައިވާ ނުވަތަ ނުކުރާ ކަމަކާ ގުޅިގެން އެއްވެސް މެމްބަރަކު ނުވަތަ އެހެން ވެސް ފަރާތަކުން ގާނޫނުއަސާސީ އާއި މަޖިލީހުގެ ގަވާއިދާ ހިލާފުވެއްޖެ ކަމުގެ ޝަކުވާއެއް ވެސް އުފުލާފައި ނުވާކަން ފާހަގަކުރައްވައި ނާޒިމް ވިދާޅުވީ އެ ތުހުމަތުތަކުގައި އެއްވެސް އަސާސެއް ނެތް ކަމަށެވެ.

އެ ބަޔާނުގައި ނާޒިމް ފާހަގަކުރެއްވި އިތުރު ކަންތައްތަކަކީ:

ނާޒިމް ވިދާޅުވީ އޭނާގެ ވާޖިބުތަކާއި މަސްއޫލިއްޔަތުތައް އަދާކުރެއްވީ ގާނޫނީ ހަމަތަކުގެ މަތިން މެމްބަރުންގެ މެދުގައި އެއްވެސް ތަފާތު ކުރުމެއް ނެތި، ހަމަހަމަކަމާއި އިންސާފުވެރިކަމާ އެކު ކަމަށެވެ. އަދި ވަކި ސިޔާސީ ފިކުރަކަށް ތަބާވެ، އެއްވެސް ކަމެއް ގާނޫނާ ގަވާއިދާ ހިލާފަށް ނުކުރައްވާ ކަމަށް ވެސް އެ ބަޔާނުގައި އޭނާ ވަނީ ފާހަގަކުރައްވާފަ އެވެ.

"ކަން މިހެން ހުރުމާ އެކު ވެސް ވެރިކަން ކުރާ ޕާޓީގެ ޕާލިމެންޓްރީ ގްރޫޕުގެ ހުރިހާ މެމްބަރުން ސޮއިކުރައްވައި، މަޖިލީހުގެ ނައިބު ރައީސްކަމުގެ މަގާމުން އަޅުގަނޑު ވަކިކުރުމަށް ހުށަހަޅުއްވާފައި ވުމުން އޭގައިވާ ސަބަބުތަކަކީ ތެދު ހަގީގަތްކަމުގައި ނުވި ނަމަވެސް، އިންތިހާބީ މަގާމަކަށް ވޯޓުލީ އެންމެންހެން އެ މަގާމުން އެ މީހަކު ދުރުވުމަށް އެދެމުން އެކަމަށް އިޖާބަ ދިނުމަކީ ޑިމޮކްރެސީގެ ހަމަތަކުގެ މަތިން ތަހުޒީބީ ގޮތެއް ކަމުގައި ދެކެމެވެ،" ނާޒިމްގެ ބަޔާނުގައި ވިދާޅުވެފައިވެ އެވެ.

"ވުމާ އެކު އަޅުގަނޑާ މެދު ކުރައްވާފައިވާ އެންމެހާ ތުހުމަތުތަކަށް އެއްވެސް އިސްތިސްނާއެއް ނެތި އިންކާރު ކުރަމުން، ރައްޔިތުންގެ މަޖިލީހުގެ ނައިބު ރައީސްގެ މަގާމުން މި ވަގުތުން ފެށިގެން އަޅުގަނޑު އިސްތިއުފާ ދީފީމެވެ."

މަގާމުން އިސްތިއުފާ ދެއްވުމަށްފަހު ނާޒިމް ވިދާޅުވީ ދައުލަތުގައި ގާނޫނުގެ ވެރިކަން ނަގަހައްޓާ، ރައްޔިތުންނަށް އުފާވެރި ފާގަތި ދިރިއުޅުމެއް ހޯދައިދިނުމަށް މަސައްކަތް ކުރުމުގައި ދެމިހުންނަވާނެ ކަމަށެވެ.