ޕީއެންސީގެ ވެސް މެމްބަރުންގެ ތާއީދާ އެކު މި އަހަރު ތެރޭ މި ވެރިކަން ބަދަލުކުރާނަން: ނަޝީދު

މި އަހަރު ނިމުމުގެ ކުރިން މި ސަރުކާރު ބަދަލުކުރާނެ ކަމަށާއި އެކަން ކުރާނީ ވެރިކަންކުރާ ޕާޓީ، ޕީއެންސީގެ މަޖިލިސް މެމްބަރުންގެ ވެސް ތާއީދާ އެކު ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.

ވީ ކިހިނެއް؟ - ނަޝީދު މިހެން ވިދާޅުވީ، ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ ބައިއިލެކްޝަނުގައި އެމްޑީޕީން ވާދަކުރައްވާ އަބްދުﷲ ސޯދިގު (ސޯބެ)ގެ ކެމްޕޭން ޓީމުން މިރޭ މާލޭގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

ބުނީ ކީކޭ؟ - އެމްޑީޕީ ހަރުގޭގައި އޮތް މި ޖަލްސާގައި ނަޝީދު ވިދާޅުވީ، ރައީސް މުއިއްޒުގެ އިތުބާރު ނެތްކަމުގެ މައްސަލަ މަޖިލީހަށް މި އަހަރު ތެރޭ ވައްދާނެ ކަމަށެވެ. އަދި، އެ މައްސަލަ ވައްދާނީ، ޕީއެންސީ މެމްބަރުންގެ ވެސް ސޮޔާ އެކު ކަމަށް ވިދާޅުވި އެވެ.

"މި އަހަރު ނިމުމުގެ ކުރީގައި މިވެރިކަން ބަދަލުކުރަން ވެއްޖޭ. އެކަން ހާސްވެ ނުލައްވާ، ރައްޔިތުންގެ މަޖިލީހުގެ ތަނަވަސް އަގުލަބިއްޔަތުން އިތުބާރު ނެތްކަމަށް ނެނގޭ މިންވަރަށް ތިންބައިކުޅަ ދެބައި އަޅުގަނޑުމެންގެ އަތަށް ގެންނާނަން އިރާދަކުރެއްވިއްޔާ،" ނަޝީދު ވިދާޅުވި އެވެ.

މަޖިލީހުގެ ކުރީގެ ރައީސްކަން ވެސް ކުރައްވާފައިވާ ނަޝީދު ވިދާޅުވީ، ހިތަދޫ ދެކުނު ދާއިރާގައި ކުރިން އިންނެވި، ޕީއެންސީގެ މެންބަރު މުހައްމަދު ސިނާންގެ ގޮނޑި ގެއްލުވާލުމަކީ ވެސް އެ މަސައްކަތުގެ ބައެއް ކަމަށެވެ. މި އަހަރު ނިމުމުގެ ކުރިން، ޕީއެންސީއަށް ނިސްބަތްވާ ވަރަށް ގިނަ މެމްބަރުން ޕާޓީ ބަދަލުކޮށް ރައީސްގެ އިތުބާރު ނެތްކަަމަށް ފާސްކުރަން  ހުށަހަޅަން ސޮއިކުރައްވާނެ ކަމަށް ނަޝީދު  ވިދާޅުވި އެވެ.

ނަޝީދު ވިދާޅުވީ:

"އަޅުގަނޑުމެން އިރާދަކުރެއްވިއްޔާ މިވެރިކަން މި އަހަރު ނިމުމުގެ ކުރިން ވަކިކުރާނަން. ސޯބެ ހޮވަން މިއުޅެނީ އެ ސަބަބަށްޓަކައޭ. މެމްބަރަކު ވަކިކުރީ އެ ސަބަބަށް ޓަކައޭ. އެއީ ވެސް އަޅުގަނޑުމެންނަށް އެނގިގެން ކުރި ކަމެއް،" ނަޝީދު ވިދާޅުވި އެވެ.

"ދެން ކުރާ ކަންތައް ވެސް އަޅުގަނޑުމެން ކުރާނީ އެނގިގެން. ޕީއެންސީ ހުރިހާ މެމްބަރުން އައިސް ތިބެގެން ރައީސް މުއިއްޒާ ދެކޮޅަށް ހަމައެކަނި ސޮއިކުރައްވާނީކީ ނޫން، ވޯޓުދެއްވާނީ. ބައްލަވަން ތިއްބަވާތި މި މަންޒަރު."