ސަރަހައްދީ އެންމެ ބޮޑު 'ސީ ޓާޓްލް ހެލްތު އިންސްޓިޓިއުޓް' ޖާވަކަރައިގައި ހުޅުވައިފި

އަނިޔާ ލިބިފައިވާ ވެލާތަކަށް ފަރުވާ ދިނުމަށާއި ވެލާތަކާ ބެހޭ އެކިއެކި ދިރާސާތައް ހަދަން 'އޮލިވް ރިޑްލީ' ޕްރޮޖެކްޓާ ގުޅިގެން ކްރައުން އެންޑް ޗަމްޕާގެ ޖާވަކަރަ އައިލެންޑްސް މޯލްޑިވްސްގައި ހިންގާ 'ސީ ޓާޓްލް ހެލްތު ސެންޓަރު' ރަސްމީކޮށް މިއަދު ހުޅުވައިފި އެވެ.

ވީ ކިހިނެއް؟ - އެންމެ ޒަމާނީ ފެންވަރަށް ތަރައްގީކޮށްފައިވާ އެ ސެންޓަރު ރަސްމީކޮށް ހުޅުވައިދެއްވީ ކްރައުން އެންޑް ޗަމްޕާ ރިސޯޓްސްގެ މެނޭޖިން ޑިރެކްޓަރު ސާރާ މޫސާ އެވެ.

ބުނީ ކީކޭ؟ - ސީ ޓާޓްލް ހެލްތު ސެންޓަރު ހުޅުވުމުގެ ރަސްމިއްޔާތުގައި ކްރައުން އެންޑް ޗަމްޕާ ރިސޯޓްސްގެ ސީއީއޯ މުހައްމަދު ސޮލާހު ދެއްކެވި ވާހަކައިގައި ރާއްޖޭގެ ތިމާވެށި ދެމެހެއްޓުމުގެ މުހިންމު ކަމަށް އަލިއަޅުވާލެއްވި އެވެ.

"އަޅުގަނޑުމެންނަށް މިއަދު މި [ރީތި] މަންޒަރުތައް މި ފެންނަނީ އަޅުގަނޑުމެންގެ ކާބަފައިން ތިމާވެއްޓަށް ދިން އަހަމިއްޔަތުކަމާއި ކުރި އިހުތިރާމުގެ ސަބަބުން،" ސޮލާހު ވިދާޅުވި އެވެ.

އެހެންކަމުން މިއަދު ކުރެވެން އޮތް ކަމަކީ، އޭނާ ވިދާޅުވި ގޮތުގައި، ކަމާ ބެހޭ ފަރާތްތަކާ ގުޅިގެން، ހަރުދަނާ ސިޔާސަތުތަކުގެ ދަށުން، އަންނަން އޮތް ޖީލުތަކަށް ތިމާވެށި ރައްކާތެރިކަމާ އެކު ދަމަހައްޓައިދިނުމެވެ.

އޮލިވް ރިޑްލީ ޕްރޮޖެކްޓުގެ ޑިރެކްޓާ އޮފް ކޮންޒަވޭޝަން މެޑިސިން ޑރ. މެކްސިމީލިއަން ޕަލްޔަކް ވިދާޅުވީ ސީ ޓާޓްލް ހެލްތު އިންސްޓިޓިއުޓުން ދައްކުވައިދެނީ ރާއްޖެ އާއި ރާއްޖެއިން ބޭރުގެ ގިނަ ބަޔަކު ގުޅިގެން ކުރި ބުރަ މަސައްކަތެއް ކަމަށެވެ.

ދުނިޔޭގެ އެކި ތަންތަނުގައި މިފަދަ މަރުކަޒުތައް ގާއިމްކުރުމުގައި އަމަލީ ގޮތުން ބައިވެރިވި ބޭފުޅެއްގެ ހައިސިއްޔަތުން އޭނާ ވިދާޅުވީ ޖާވަކަރައިގައި ގާއިމްކޮށްފައިވަނީ ދުނިޔޭގެ ފެންވަރުގެ މަރުކަޒެއް ކަމަށެވެ.

އޮލިވް ރިޑްލީ ޕްރޮޖެކްޓް މޯލްޑިވްސްގެ ޕްރޮޖެކްޓް ކޯޑިނޭޓަރު އަހްމަދު އިޔާދު ވިދާޅުވީ މި މަރުކަޒާ އެކު ކްލިނިކަލް ދިރާސާ ހެދުން ފުޅާކުރެވި، ތަޖުރިބާކާރުންނާއި ދަރިވަރުންނާއި މިކަމަށް ޝައުގުވެރިވާ މީހުން އެއްތަނަކުން ބައްދަލުވެ، ވެލާތަކާ ގުޅޭ ގޮތުން އެކި ކަހަލަ ދިރާސާތައް ހެދުމުގެ ފުރުސަތު ތަނަވަސްވާނެ ކަމަށެވެ.

އެ ރަސްމިއްޔާތުގައި ކްރައުން އެންޑް ޗަމްޕާ ރިސޯޓްސްގެ އެމްޑީ ސާރާ ވަނީ މިފަދަ ޒަމާނީ މަރުކަޒެއް ގާއިމްކުރުމުގައި ބުރަ މަސައްކަތްކޮށް، ބައިވެރިވި އެންމެހާ ފަރާތްތަކަށް ޝުކުރު އަދަކުރައްވައިފަ އެވެ.

އޭނާ ވިދާޅުވި ގޮތުގައި ދެމެހެއްޓެނިވިކަމާއި ޒިންމާދާރުކަމާ އެކު ފަތުރުވެރިކަމުގެ ސިނާއަތް ކުރިއެރުވޭނެކަން މި މަރުކަޒުން ދައްކުވައިދެ އެވެ. އަދި މިކަން ދުރު މުސްތަގްބަލަކަށް ފުޅާވާނެ ކަމަށް އުންމީދުކުރައްވާ ކަމަށް ވެސް އޭނާ ވިދާޅުވި އެވެ.

މިއަދު ރަސްމީކޮށް ހުޅުވި ނަމަވެސް، ސެޕްޓެމްބަރު 2025ގައި އެ ތަން ބޭނުން ކުރެވޭ ފެންވަރަށް ވަނީ ނިންމާފަ އެވެ.