އީސީގެ ރައީސްކަމުން ޒާހިދު އިސްތިއުފާ ދެއްވައިފި

އިލެކްޝަންސް ކޮމިޝަން (އީސީ)ގެ ރައީސް ކަމުން މުހައްމަދު ޒާހިދު އިސްތިއުފާ ދެއްވައިފި އެވެ. 

ވީކިހިނެއް؟ - ޒާހިދު މިއަދު އިސްތިއުފާ ދެއްވިކަން އީސީން 'ދައުރު'އަށް ކަށަވަރުކޮށްދިނެވެ. 

ތަފްސީލް - އީސީގެ ނައިބު ރައީސް އަބްދުއްރަހްމާން ސަލާހް ރަޝީދު 'ދައުރު'އަށް ވިދާޅުވި ޒާހިދު އިސްތިއުފާ ދެއްވީ މިއަދު މީގެ ގާތްގަނޑަކަށް ބައިގަޑިއެއްހާ އިރު ކުރިން ކަމަށެވެ. 

"އެއްވެސް ސަބަބެއް ވިދާޅެއް ނުވޭ," ސަލާހް ވިދާޅުވި އެވެ. 

ޒާހިދު މިއަދު އިސްތިއުފާ ދެއްވީ ކޮމިޝަނުގެ ރައީސްކަމުގެ މަގާމުގެ އިތުރުން ކޮމިޝަނުގެ މެންބަރުކަމުގެ މަގާމުން ވެސް މެ އެވެ.

އީސީގެ ރައީސްގެ މަގާމަކީ މިހާރު ވަކިން ނަން ފޮނުވައިގެން، ރައްޔިތުންގެ މަޖިލީހުގެ ރުހުން ލިބުމުން ރައީސުލްޖުމްހޫރިއްޔާ އައްޔަންކުރައްވާ މަގާމެކެވެ.

ފާހަގަކޮށްލެވޭ - ޒާހިދު އެ ކޮމިޝަނުގެ މެންބަރުކަމަށް އައްޔަންކުރީ މިދިޔަ އަހަރުގެ ޖެނުއަރީ މަހުގަ އެވެ. އޭނާ އެ ކޮމިޝަނުގެ ރައީސްކަމަށް އައްޔަންކުރީ ޖެހިގެން އައި ފެބްރުއަރީ މަހުގަ އެވެ.

ޒާހިދު އޭގެ ކުރިން މަސައްކަތްކުރެއްވީ ހިއުމަން ރައިޓްސް ކޮމިޝަން (އެޗުއާރުސީއެމް)ގެ މެންބަރެއްގެ ގޮތުގަ އެވެ.

ގުޅުން ހުރި - ޒާހިދުގެ ލީޑާޝިޕްގައި އީސީން ބޭއްވީ ނިމިގެން ދިޔަ ކައުންސިލް އިންތިހާބާއި ރައްޔިތުންގެ ހިޔާލު ހޯދުމުގެ ވޯޓެވެ. ހިޔާލު ހޯދުމުގެ ވޯޓު ނެގީ ރިޔާސީ އިންތިހާބާއި މަޖިލިސް އިންތިހާބު އެކުގައި ބާއްވާން ފެނޭތޯ ބެލުމަށެވެ. 69% ވޯޓު ލިބުނީ ނުފެންނަ ކަމަށެވެ.

އޭގެ އިތުރުން ޒާހިދު އިސްތިއުފާ ދެއްވި ދަނޑިވަޅަކީ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަނަށް އީސީން ތައްޔާރުވަމުންދާ ދަނޑިވަޅެވެ. އެ އިންތިހާބު ބޭއްވުމަށް ހަމަޖެހިފައިވަނީ އަންނަ މަހުގެ 6 ވަނަ ދުވަހުގަ އެވެ.