ކުޅުދުއްފުށިން ގެއްލުނު މީހާ ފެނުނީ މޫދުއަޑިން މަރުވެފައި އޮއްވާ

ކުޅުދުއްފުށިން ގެއްލިގެން ހޯދަމުންދިޔަ މީހާ އެ ރަށު ބޮޑަވަކިވާ ބީޗުގެ މޫދު އަޑިން މަރުވެފައި އޮއްވާ ފެނިއްޖެ އެވެ.

ވީ ކިހިނެއް؟ - މަރުވެފައި އޮއްވާ ފެނުނީ ސުލައިމާން ހުސައިން، ބަޑިފަސްގަނޑުގެ/ ހދ. ކުޅުދުއްފުށި އެވެ.

ބުނީ ކީކޭ؟ - ފުލުހުން ބުނީ އުމުރުން 59 އަހަރުގެ ދިވެހި ފިރިހެނެއް ގެއްލިގެން އުޅޭކަމުގެ ރިޕޯޓު ލިބުނީ މިއަދު މެންދުރު 1:48 ހާއިރު ކަމަށެވެ.

ފުލުހުން އެ މީހާ ހޯދުމުގެ މަސައްކަތް ކުރަމުން ދަނިކޮށް އެ މީހާ ފެނިފައިވަނީ މިއަދު 3 ހާއިރު، އެ ރަށު ބޮޑުވަކިވާ ބީޗު މޫދު އަޑިންނެވެ.

ފުލުހުން ބުނީ އެ މީހާ ކުޅުދުއްފުށި ސިޓީ ރީޖަނަލް ހޮސްޕިޓަލަށް ގެންދިޔަ ކަމަށާއި އެ މީހާ މަރުވެފައިވާ ކަމަށް ހޮސްޕިޓަލުން ބުނެފައިވާ ކަމަށެވެ.

ފުލުހުން އަންނަނީ އެ މައްސަލަ އިތުރަށް ތަހުގީގު ކުރަމުންނެވެ.