ފަޅު ރަށެއްގައި ފޮރުވާފައި ހުރި 100 ކިލޯ މަސްތުވާތަކެތީގެ މައްސަލައިގައި ހައްޔަރުކޮށް ބަންދުކުރި މީހުން (ފޮޓޯ/ ޕޮލިސް)
100 ކިލޯގެ ޑްރަގް މައްސަލައިގެ ޝަރީއަތް ފަށައިފި
އދ. ބޮޑުކާށިހުރާ ކިޔާ ފަޅުރަށެއްގައި ފޮރުވާފައި ހުއްޓާ ފުލުހުން ހޯދި 100 ކިލޯގެ ޑްރަގުގެ މައްސަލައިގެ ޝަރީއަތް މިއަދު ކްރިމިނަލް ކޯޓުގައި ފަށައިފި އެވެ.
މައްސަލައިގެ ފެށުން - ރާއްޖެއަށް ކަނޑުމަގުން ގިނަ އަދަދެއްގެ ޑްރަގް އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މިދިޔަ އަހަރުގެ އޮކްޓޯބަރު 13ގައި ހިންގި އޮޕަރޭޝަނެއްގައި 10 މީހަކު ހައްޔަރު ކުރި އެވެ. މީގެ ކުރިން ހާމަވެފައިވާ މައުލޫމާތުތަކުން އެނގޭ ގޮތުގައި 100 ކިލޯގެ ޑްރަގު އެތެރެ ކުރީ ސަފާރީއެއްގައި އަތޮޅުން ބޭރަށް ދިގު ދަތުރެއްކޮށް، ބޭރުގެ ބޯޓަކުން ސަފާރީއަށް ޑްރަގް ބަރުކޮށްގެންނެވެ.
ވީ ކިހިނެއް؟ - މި މައްސަލައިގައި 10 މީހެއްގެ މައްޗަށް ދައުލަތުން ވަނީ ދައުވާކޮށްފަ އެވެ. މިއަދު އެ މީހުންގެ ޝަރީއަތް ފަށާފައި ވާއިރު، މިއަދުގެ އަޑުއެހުމުގައި ކުރިއަށް ގެންދިޔައީ އިބްތިދާއީ މަރުހަލާ އެވެ. އެގޮތުން، ލިޔުންތައް ލިބުނުތޯ ސާފުކޮށް، ދައުވާ ލިބޭ މީހުންނަށް ހައްގުތައް ވެސް ކިޔައިދިނެވެ.
މި މައްސަލައިގައި ދައުވާ ލިބޭ މީހުން:
-
1-
ޖުމާން މުސްތަފާ (19އ): ނ. ވެލިދޫ، ބީޗްހެވެން
-
2-
އިބްރާހީމް ޒާއިދު ހަބީބު (25އ): ގއ. ކޮލަމާފުށި، ސޯސަންގެ
-
3-
މުހައްމަދު އަހްމަދު (34އ): ލ. ކަލައިދޫ، ޖަނަވަރީމާގެ
-
4-
އިބްރާހީމް ސިނާނު (24އ): ހދ. ކުމުންދޫ، ޑިއާފުރެންޑް
-
5-
މުހައްމަދު ހުސައިން (61އ): ދ. ބަނޑިދޫ، ޕޮލަރިސް
-
6-
އެމްޑީ ރަފީގުލް އިސްލާމް (35އ): ބަންގްލަދޭޝް
-
7-
ޑީއެމް މޮބިން (24އ): ބަންގްލަދޭޝް
-
8-
މިދުހަތު އިބްރާހިމް (26އ): ގއ. ދެއްވަދޫ، ދޭލިޔާގެ
-
9-
އަހްމަދު ސިރުހާން ޝަމީމް: މ. ކޮޅުފުށި، ޒަހީރާމަންޒިލް
-
10-
އަހުމަދު މާހިރު: ކ. މާފުށި، ސްވީޓްމީޑް
ދައުވާ ލިބޭ މީހުންގެ ތެރެއިން ސިރުހާން އާއި މިދުހަތު ފިޔަވައި އެންމެންގެ މައްޗަށް ޑައިމޯފިން ޓްރެފިކް ކުރުމުގެ ދައުވާ ކުރި އެވެ. އަދި މިދުހަތާއި ސިރުހާންގެ އިތުރުން، ޖުމާން، މުހައްމަދު އަހުމަދު އަދި ރަފީގުލް އިސްލާމްގެ މައްޗަށް ކެނަބިސް ބޭނުން ކުރުމުގެ ދައުވާ ވެސް ކުރި އެވެ. މުހައްމަދު ހުސެއިންގެ މައްޗަށް ޑައިމޯފިން ބޭނުންކުރުމުގެ ދައުވާ ކުރި އެވެ.
މި ދައުވާތަކުގެ ތެރެއިން މައިގަނޑު ދައުވާ އަކީ ޑައިމޯފިން ޓްރެފިކް ކުރުމެވެ. އެ ކުށުގެ އަދަބަކީ:
-
25 އަހަރަށް ޖަލަށްލުން
-
ޖަލު އަދަބާ އެކު 100،000ރ. އާއި 10،000،000ރ. އިން ޖޫރިމަނާ ކުރުން
ޑައިމޯފިން ޓްރެފިކިންގެ ދައުވާ ލިބޭ އަށް މީހުންނަށް މިއަދު ގާޒީ ދީބަނާޒު ފަހުމީ ވަނީ ވަކީލުން ހަމަޖައްސަން ފުރުސަތު ދެއްވާފަ އެވެ. އެންމެން ވެސް ވަކީލުންނަށް އެދުމުން އޭނާ އެންގެވީ އަންނަ މަހުގެ 13ގެ ހެނދުނު 9ގައި ބާއްވަން ހަމަޖެހިފައިވާ އަޑުއެހުމަށް ވަކީލުން ހަމަޖައްސައިގެން ދައުވާއަށް ޖަވާބުދާރީވުމަށް ވެސް ތައްޔާރަށް ކޯޓަށް ހާޒިރުވުމަށެވެ.
ދައުވާ ލިބޭ މީހުންގެ ތެރެއިން ޖުމާންއަށް ޗިޓު ހަވާލުކުރުމުން ވެސް މިއަދު ކޯޓަށް ހާޒިރުވެފައެއް ނުވެ އެވެ. އެހެންވެ، ގާޒީ ދީބަނާޒު ވިދާޅުވީ، އިދާރީ ގޮތުން ސާފުކުރަން ޖެހޭ ކަންކަން ސާފުކުރުމަށް ފަހު އޭނާ ޖޫރިމަނާ ކުރާނެ ކަމަށެވެ.
މި މައްސަލައިގައި އެންމެ ފުރަތަމަ ހައްޔަރު ކުރި މީހުންގެ ތެރެއިން ފަހަރަކު މީހަކު ދޫވަމުން ގޮސް މިހާރު ބަންދުގައި ތިބީ ހަމައެކަނި ދެ ބިދޭސީންނެވެ. އެންމެ ފަހުން އެ ދެ މީހުންގެ ބަންދަށް ޖެހި 30 ދުވަހުގެ މުއްދަތު މި މަހުގެ 21ގައި ހަމަވާތީ އޭގެ ކުރިން ބަންދު މުރާޖައާގެ އަޑުއެހުމެއް ބާއްވާނެ ކަމަށް މިއަދު ގާޒީ ދީބަނާޒު ވިދާޅުވި އެވެ.
އެނގުން މުހިންމު - މި މައްސަލައިގައި ހިމެނޭ ދިވެހިން ކޯޓުން ދޫކޮށްލީ، ތަހުގީގު މަރުހަލާ ނިމުނުއިރު ވެސް ފެނުނު މަސްތުވާތަކެއްޗާއި އެ މީހުންނާ ގުޅުވޭނެ ހެކި ފުލުހުން ދައްކާފައި ނުވާ ކަމަށް ބުނެ އެވެ. މި މައްސަލައިގެ ތަހުގީގު ފުރިހަމަކުރަން ޕީޖީން ވަނީ ފުލުހުންނަށް އިތުރު މުއްދަތު ވެސް ދީފަ އެވެ.
ކޮމެންޓް (1)
ސުނާ