އަހުމަދު މުހައްމަދު ފުލުހުންގެ ކޮމިޝަނަރަކަށް އައްޔަންކޮށްފި

ޕޮލިސް ކޮމިޝަނަރު ކަމަށް އަހުމަދު މުހައްމަދު (ޓޫފޯ)، ރައީސް މުހައްމަދު މުއިއްޒު ދެންމެ އައްޔަންކުރައްވައިފި އެވެ.

ވީކިހިނެއް؟ - މިއީ މި ސަރުކާރު އައި ފަހުން އައްޔަންކުރެއްވި ތިންވަނަ ޕޮލިސް ކޮމިޝަނަރެވެ. ޕޮލިސް ކޮމިޝަނަރުގެ މަގާމު ދެވަނަ ފަހަރަށް ހުސްވީ ކުރިން އެ މަގާމުގައި ހުންނެވި އިސްމާއީލް ނަވީން ފުލުހުންގެ ހިދުމަތުން ރިޓަޔާކުރެއްވުމުންނެވެ.

ތަފްސީލް - އެސިސްޓެންޓް ކޮމިޝަނަރުގެ މަގާމުގައި ހުންނެވި އަހުމަދު މުހައްމަދު ޕޮލިސް ކޮމިޝަނަރުގެ މަގާމަށް ރައީސް މުއިއްޒު އައްޔަންކުރެއްވި ކަމަށް ފުލުހުންގެ ސޯޝަލް މީޑިއާ ހޭންޑަލްތަކުގައި ވަނީ މިއަދު ޕޯސްޓްކޮށްފަ އެވެ.

ފުލުހުންގެ ހިދުމަތަށް އަހުމަދު މުހައްމަދު ވެންނެވީ 1995ގަ އެވެ. އިންޑިއާގެ ސަރުދާރު ވަލާބައީ ޕަޓޭލް ނެޝަނަލް ޕޮލިސް އެކަޑަމީން ފުލުހުންގެ މަތީ ތަމްރީނުތައް ހާސިލްކުރެއްވުމުގެ އިތުރުން އޭނާ ވަނީ ވިލާ ކޮލެޖުން ޝަރީއާގެ ދާއިރާއިން ފުރަތަމަ ޑިގްރީއާއި މާސްޓާސް ހާސިލްކުރައްވައިފަ އެވެ.

އެނގުން މުހިންމު - އަހުމަދު މުހައްމަދަކީ، ފުލުހުންގެ އާ ގާނޫނުގެ ދަށުން ފުލުހުންގެ ވަޒީފާއިން ވަކިކުރަން ފެންނަ ކަމަށް 2021ގައި ޕޮލިސް ބޯޑުން ލަފާ ދިން ހަތް ފުލުހުންގެ ތެރޭގައި ހިމެނޭ ބޭފުޅެކެވެ.

އޭނާ ވަކިކުރަން 9 އޯގަސްޓު 2021ގައި ޕޮލިސް ބޯޑުން ލަފާދިނީ ފުލުހުންގެ ފައިސާއިން ރިޝްވަތު ނެންގެވި ކަމަށް ބުނާ މައްސަލައަކާ ގުޅިގެންނެވެ. އޭރު ސަރުކާރުގައި އެކުލަވާލި ޕޮލިސް ބޯޑުގެ ލަފަޔާ އެއްގޮތަށް އަހުމަދު މުހައްމަދު ވަޒީފާއިން ވަކިކުރީ އޮކްޓޫބަރު 2021ގަ އެވެ.

ނަމަވެސް އަހުމަދު މުހައްމަދަށް އަލުން ވަޒީފާ ދިނީ މިދިޔަ 3 ސެޕްޓެމްބަރުގަ އެވެ.