'ވިލިމާލޭގެ ރުއްގަސް ކަނޑައި ހިންގާ މަޝްރޫއުތަކުން އާންމުންގެ ދުޅަހެޔޮ ކަމަށް ކުރިއެރުމެއް ނުލިބޭނެ'

ދުވަސްވީ ބޮޑެތި ގަސްތަކެއް ހުރި ވިލިމާލޭގެ ފުނަވަލު ސަރަހައްދުގައި އަޅަން ނިންމާފައިވާ ބޯހިޔާވަހިކަމުގެ މަޝްރޫއު އާއި އެރަށުގައި އަޅާ ހޮސްޕިޓަލުގެ މަސައްކަތް ހުއްޓާލައި އެ މަޝްރޫއުތައް ވިލިމާލެނޫން އެހެން ސަރަހައްދެއްގައި ކުރުމަށް ތިމާވެށި ހިމާޔަތްކުރާ ފަރާތްތަކުން ސަރުކާރަށް ގޮވާލައިފި އެވެ.

ވީ ކިހިނެއް؟ - މިގޮތަށް ގޮވާލާފައިވަނީ، ވިލިމާލޭގެ ފުނަވަލާއި ދުވަސްވީ ގުދުރަތީ ތަރިކައިގެ ދިފާއުގައި އާންމު ރައްޔިތުންތަކެއް ފާޅުކުރަމުންދާ ކަންބޮޑުވުންތަކެއްގެ މައްޗަށް ތައްޔާރުކޮށްފައިވާ އާންމު ސިޓީއެއްގަ އެވެ.

މިކަންބޮޑުވުންތައް ފާޅުކުރަމުންދަނީ:

ބުނީ ކީކޭ؟ - އެ މަޝްރޫއުތައް ވިލިމާލޭގައި ކުރިއަށް ނުގެންދިއުމަށް ގޮވާލައި މިއަދު ނެރެފައިވާ އާންމު ސިޓީގައި ބުނީ، އެ މަޝްރޫއުތަކުން ވިލިމާލޭގެ ގަސްތަކާއި، މުޅި މާހައުލީނިޒާމު އެގޮތުގައި ދަމަހައްޓާ ދިރުންތަކަށް އިޔާދަނުކުރެވޭނެ ގެއްލުންތަކެއް ވާނެ ކަމަށެވެ.

އެގޮތުން ބުނީ:

"މި އެންމެހާ ކަންކަމަށް ރިއާޔަތްކޮށް، ޒިންމާދާރު މަގު ހިޔާރުކޮށް، މި މަޝްރޫއު ވިލިމާލެ ނޫން ތަނަކަށް ބަދަލުކުރުމަށް ސަރުކާރަށާއި ކަންނިންމުމުގައި ބައިވެރިވާ ޕަބްލިކް އަދި ޕްރައިވެޓް ހުރިހާ ފަރާތްތަކަށް ގޮވާލަމެވެ. ރާއްޖޭގެ ދިރިއޮތް ވެށްޓާއި އާންމު ސިއްހަތު ރައްކާތެރި ކުރުމާއި ގާނޫނީ ހަމަ ނެގެހެއްޓުމުގެ ޒިންމާއަކީ ޕްރައިވެޓް ކުންފުނިތައް އިސްތިސްނާވާ ކަމެއް ނޫންކަން މި މަޝްރޫއުތައް ހިންގާ ކުންފުނިތަކުގެ ސަމާލުކަމަށްޓަކައި ހަނދާންކޮށްދެމެވެ،" އެ ސިޓީގައިވެ އެވެ.

މީގެ އިތުރުން ވިލިމާލޭގައި އަޅާ ހޮސްޕިޓަލު ވެސް، މާލެ ސަރަހައްދުން ހިއްކާފައިވާ ގުޅިފަޅާއި ގިރާވަރު އަދި ފުށިދިއްގަރު ފަޅުފަދަ ތަނަކަށް ބަދަލުކުރުމަށް ވެސް ގޮވާލި އެވެ.

ރައްޔިތުންގެ އާންމު ސިއްހަތާއި މަސްލަހަތަށް ސަމާލުކަން ނުދީ މި މަޝްރޫއު ވިލިމާލޭގައި ހިންގުމުގެ މާނައަކީ ކޮބައިކަން ސާފެއް ނުވާ ކަމަށާއި ރާއްޖޭގެ އެކި ކަންކޮޅުތަކުގައި ސިއްހީފަރުވާގެ ހާލަތު އިންތިހާއަށް ދަށްއިރު، އަތޮޅުތެރޭގައި ސިއްހީ ހިދުމަތަށް އިހުމާލުވެ، އަދިވެސް މާލެ ސަރަހައްދަށް މިފަދަ ސިއްހީ މަރުކަޒުތައް އިތުރު ކުރުމަކީ މި ސަރަހައްދު އިތުރަށް ތޮއްޖެއްސުން ކަމަށް ބުންޏެވެ. 

އެގޮތުން ބުނީ:

"މިކަންކަމަށް ބަލާއިރު، 17 ބުރީގެ 3 ޓަވަރު ވިލިމާލޭގެ ރުއްގަސްތައް ނައްތާލައިގެން އެޅުމުގެ ބަދަލުގައި މިކަންކުރުމަށް އެކަށޭނަ ހުސްބިމެއްގައި ކުރުމަށް ސަރުކާރަށް ގޮވާލަމެވެ. ދިރިއޮތް ފަރުފަޅު ދާއިމަށް ފަނާކޮށްގެން، ރައްޔިތުންގެ ދަރަނީގެ ބޮޑު ހޭދައެއް ކޮށްގެން ރާއްޖޭގެ 58 ރަށެއްގައި ހިއްކާފައިވާ ބިންތަކުުގެ ބޭނުން ނުހިފައި، ދުވަސްވީ ރުއްގަސް ނައްތާލައިގެން މިފަދަ ބިނާތައް ހެދުމަށް އުޅުމަކީ ބޯހިޔާވަހިކަމުގެ ހައްލު ރައްޔިތުންނަށް ހޯދުމުގެ ނިޔަތެއްގައި ކުރާކަމެއްކަމަށް ބެލޭނެ ޖާގައެއް ނެތެވެ،" ސިޓީގައިވެ އެވެ.

"ހަމަ އެފަދައިން 100 އެނދުގެ ހޮސްޕިޓަލަކީ ރާއްޖޭގެ ސިއްހީ ހިދުމަތްތަކުން މަހުރޫމު ވެފައިވާ ގިނަ ރައްޔިތުންގެ ދިރިއުޅުމަށް ލުއިހޯދަން ކުރާކަމެއްގެ ގޮތުގައި ނުދެކެމެވެ."