ބޮޑުތަކުރުފާނު މަގު ޖުމްހޫރީ މައިދާން ތަރައްގީ ކުރުމަށް މަސައްކަތް ފެށިފައި މަގުގެ ބައެއް ސަރަހައްދުތައް ބަންދު ކޮއްފައި. (ދައުރު ފޮޓޯ/ އަބްދުﷲ އަނޫފް ޖުނައިދު)
ތާރު އަޅަން ޖުމްހޫރީ މައިދާން ސަރަހައްދުގެ ބައެއް ބަންދުކޮށްފި
މާލޭގެ އުތުރު ފަރާތު ބޮޑުތަކުރުފާނުމަގުގައި ތާރުއެޅުމަށް، ޖުމްހޫރީ މައިދާން ހިމެނޭ ސަރަހައްދު އަނެއްކާ ބަންދުކޮށްފި އެވެ.
ވީކިިހިނެއް؟ - މިދިޔަ މަހު ފަހުކޮޅު ވެސް އެ ސަރަހައްދު ބަންދުކޮށް، ހުޅުވާލުމަށް ފަހު އަނެއްކާ ރޭ 8 ޖަހާއިރުން ފެށިގެން އާންމު ޓްރެފިކަށް އެ ސަރަހައްދު ވަނީ ބަންދުކޮށްފަ އެވެ.
ތަފްސީލް - ފުލުހުން ރޭ ކުރި ޕޯސްޓުން ފެންނަ ގޮތުގައި، މި ފަހަރު ވެސް ބަންދުކުރި ސަރަހައްދަކީ މިދިޔަ މަހު ފަހުކޮޅު ވެސް ދުވަސްކޮޅަކަށް ބަންދުކުރި ސަރަހައްދެވެ. އެއީ:
-
ބޮޑުތަކުރުފާނު މަގުގެ އުތުރުފަރާތުން، ޝަހީދު ހުސައިން އާދަމް ބިލްޑިން އިން ފެށިގެން ހުސައިނީ ގޯޅިއާ ހަމައަށް
-
ބޮޑުތަކުރުފާނު މަގުން އަމީރު އަހުމަދު މަގަށް ދާން އޮންނަ ޗާންދަނީ މަގުގެ ބައަކާއި ޖުމްހޫރީ ހިނގުން ވެސް ބަންދު
-
އެމްޓީސީސީ އިމާރާތް ވަށައިގެން، ކަނޑި ދޮންމަނިކު ގޯޅި އާއި މުހައްމަދު އިސްމާއީލްދީދީ ގޯޅި ބަންދު
-
އެމްއެމްއޭ އިމާރާތުގެ ދެކުނަށް އޮންނަ އިބްރާހީމް ހަސަންދީދީ މަގު ބަންދު
އެނގުން މުހިއްމު - ބޮޑުތަކުރުފާނުމަގު ފުޅާކޮށް، ތަރައްގީ ކުރުމުގެ މަސައްކަތް ފަށާފައިވަނީ މިދިޔަ އޯގަސްޓު މަހު އެވެ.
މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
-
ބޮޑުތަކުރުފާނުމަގު އުތުރު ފަރާތުން ފުޅާކޮށް ހަތަރު ލޭންއަށް މަގު ހެދުން
-
830 މީޓަރުގެ މަގުގައި ތާރު އެޅުން (ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމަޔަށް)
-
ދުވާރުތައް ހެދުން
-
ފެން ހިންދާ ނިޒާމް ގާއިމުކުރުން
-
ރޯޑް މާކިން އަދި ސައިން ބޯޑް ހަރުކުރުން.
-
737 މީޓަރުގެ ސަރަހައްދެއްގައި ޝީޓް ޕައިލިންގެ މަސައްކަތް ކުރުން