ބައްސާމް ކްރިމިނަލް ކޯޓުގެ އަޑުއެހުމަކަށް ވަޑައިގަންނަވަނީ. (ދައުރު ފޮޓޯ/ އަބްދުﷲ އަނޫފް ޖުނައިދު)
މަނީ ލޯންޑަރިންގެ ދައުވާ ވެސް ސާބިތުވެ ބައްސާމަށް އިތުރު 5 އަހަރުގެ ޖަލު ހުކުމެއް
ފުޓުްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް އުފުލި މަނީ ލޯންޑްރިންގެ ދައުވާ ވެސް ސާބިތުވެ އިތުރު ފަސް އަހަރު ދުވަހަށް ޖަލަށް ލާން މިއަދު ހުކުމްކޮށްފި އެވެ.
ހުލާސާ - ބައްސާމަށް ދައުވާކުރީ:
-
އެފްއޭއެމްއަށް 2018ގައި ފީފާއިން ޖަމާކުރި ޑޮލަރުގެ ތެރެއިން 10،000 ޑޮލަރު 26 އޮގަސްޓް 2018ގައި ބައްސާމްގެ އަމިއްލަ އެކައުންޓަށް ޖަމާކުރި މައްސަލައިގައި
-
ބައްސާމްގެ އަމިއްލަ އެކައުންޓަށް ޖަމާކުރި އެފްއޭއެމްގެ 10،000 ޑޮލަރުގެ ބޮޑު ބައެއް އޭނާ އާއި އަންހެނުންގެ ހިއްސާ އޮންނަ ގްލޭސިއާ އިންވެޓްމަންޓްސްގެ ބޭނުންތަކަށް ބޭނުންކޮށްފައިވާ ކަމަށް ދައުލަތުން ތުހުމަތުކުރޭ
-
އެ ފައިސާގެ ތެރެއިން 2،000 ޑޮލަރު ބައްސާމް ކުއްޔަށް ނަގައިގެން އުޅުއްވި ރެހެންދި ފްލެޓުގެ ކުލި ދެއްކެވި ކަމަށް ވެސް ތުހުމަތުކޮށްފައިވޭ
ވީ ކިހިނެއް؟ - ބައްސާމްގެ މައްޗަށް ދެ ދައުވާއެއް އުފުލި އެވެ. އެއީ ހިޔާނާތުގެ ކުށުގެ ދައުވާ އާއި މަނީ ލޯންޑަރިންގެ ދައުވާ އެވެ.
ކުރިމިނަލް ކޯޓުން މި މަހުގެ 8 ވަނަ ދުވަހު ވަނީ ބައްސާމްގެ މައްޗަށް ހިޔާނާތުގެ ދައުވާ ސާބިތުވެފައިވާ ކަމަށް ކަނޑައަޅައި ހަތަރު އަހަރުގެ ޖަލު ހުކުމެއް އިއްވައިފަ އެވެ. ނަމަވެސް މަނީ ލޯންޑަރިންގެ ދައުވާއާ މެދު އެ ދުވަހު ގޮތެއް ނުނިންމަ އެވެ.
ތަފްސީލް - މިއަދު ކުރިމިނަލް ކޯޓުގައި އެ ދައުވާއަށް ހުކުމްކުރީ:
-
ފަސް އަހަރު ދުވަހަށް ޖަލަށް ލާން
-
ލޯންޑަކުރި ފައިސާގެ އަދަދު 154,000ރ. 6 މަސްދުވަހުގެ ތެރޭގައި މީރާއަށް ދެއްކުމަށް
ބައްސާމްގެ މައްޗަށް ކުށް ސާބިތުވާ ކަމަށް ކްރިމިނަލް ކޯޓުގައި މައްސަލަ ބެއްލެވި ގާޒީ އިސްމާއީލް ޝަފީއު ހުކުމްކުރައްވަމުން ފާހަގަކުރެއްވީ:
-
ބައްސާމަށް ލިބުނު 10،000 ޑޮލަރަކީ އޭނާގެ މުސާރަ ކަމަށް އޭނާ ވިދާޅުވި ނަމަވެސް ފައިސާ ޖަމާކުރި ރަސީދުގައި ލިޔެފައިވަނީ "ސޭލްސް އޮފް ޑޮލަރު"
-
ބައްސާމަށް އުޖޫރައެއް ގޮތުގައި ދޭން ނިންމާފައިވަނީ މަހަކު 3،000 ޑޮލަރު، އެ އަދަދަށްވާ ދިވެހި ފައިސާ 5 އޮގަސްޓް 2018ގައި ބައްސާމްގެ އެކައުންޓަށް ޖަމާކުރި
-
މުސާރަ ނުވަތަ އެލަވަންސަށްވާ ފައިސާ ޖަމާކުރީ މަހުގެ ފަހުކޮޅު، 26 އޮގަސްޓް 2018ގައި އެލަވަންސްގެ ތިން ގުނަ އަދަދެއް ޖަމާކުރުމުން ވެސް އެއީ އެލަވަންސްގެ ފައިސާ ނޫންކަން ޔަގީންވޭ
-
ޑޮލަރު މާރުކުރަން 10،000 ޑޮލަރު އެފްއޭއެމްއިން ބައްސާމްގެ އެކައުންޓަށް ޖަމާކުރުމަށް ފަހު އެ އަދަދަށްވާ ދިވެހި ފައިސާ އެފްއޭއެމްއަށް ނުދޭކަން ބައްސާމް ވެސް އެއްބަސްވޭ
-
މި ކަންކަމަށް ބެލުމުން ބައްސާމަށް ޖަމާކުރި ފައިސާއަކީ ޑޮލަރު މާރުކުރަން ދިން ފައިސާ ކަމާއި އެ ފައިސާއަށް ބައްސާމް ހިޔާނާތްތެރިވިކަން ސާބިތުވޭ