'ވިލުންތެރި ރާއްޖެ 2045'އާ ބެހޭ ވަށްމޭޒު ޖަލްސާގެ ފުރުސަތު ހުޅުވާލައިފި

ގައުމީ ތަރައްގީގެ ޕްލޭން "ވިލުންތެރި 2045: އެންމެންނަށް ފާގަތިކަން"ގެ މަސައްކަތް ހަލުވިކަމާ އެކު ކުރިއަށްދާ އިރު މި މަސައްކަތުގައި އެކި ދާއިރާތަކުގެ ފަންނީ ތަޖުރިބާކާރުންނާ އެކު ބާއްވާ ވަށްމޭޒު ބައްދަލުވުންތަކުގައި ބައިވެރިވުމުގެ ފުރުސަތު ނެކްސިއާ މޯލްޑިވްސްއިން ހުޅުވާލައިފި އެވެ.

މި މަޝްރޫއު ކުރިއަށް ގެންދާ ނެކްސިއާއިން ރާވާފައިވަނީ ގައުމީ ތަރައްގީގެ ޕްލޭން ތައްޔާރުކުރާ އިރު އެކި ފަރާތްތަކުގެ ބައިވެރިވުން ވީހާވެސް ފުޅާކޮށް ހޯދާށެވެ.

އެހެންކަމުން މިފަހަރު މި ހުޅުވާލީ އެކި ދާއިރާތަކުގެ ފަންނީ ތަޖުރިބާކާރުންނަށް އެ ދާއިރާތަކުގެ ކުރިމަގު އޮންނަންވީ ގޮތުގެ ތަސައްވުރު އެކުލަވާލުމުގެ ވަށްމޭޒު ޖަލްސާތަކުގައި ބައިވެރިވުމުގެ ފުރުސަތެވެ.

މިގޮތުން އިގްތިސާދީ، އިޖުތިމާއީ، ތިމާވެށި، ގަވާނަންސް، އަދި ސްޕެޝަލް ޕްލޭނިންގެ ދާއިރާތަކުގެ ތަޖުރިބާކާރުން އެއިން ކޮންމެ ދާއިރާއަކަށް ހާއްސަކޮށްފައިވާ ވަށްމޭޒު ބައްދަލުވުންތަކުގައި ބައިވެރިވެ އެ ދާއިރާތައް ރާއްޖޭގައި ކުރިއަރައިގެން ދާން ބޭނުންވާ ގޮތާއި، ހުރި ގޮންޖެހުންތަކާއި ހައްލުތަކާ ގުޅޭ ގޮތުން ކުރެވޭ މަޝްވަރާކުރެވޭނެ އެވެ. އަދި ގައުމީ ތަރައްގީ ޕްލޭން އެކުލަވާލާއިރު ހުށައަޅާ ހިޔާލުތަކަށް ސަމާލުކަން ދޭނެ އެވެ.

ނެކްސިއާއިން ބުނީ ގައުމީ ތަރައްގީއަށް މުހިއްމު ދާއިރާތަކުން 62 މައުލޫއުއަށް ޖުމްލަ 20 ވަށްމޭޒު ޖަލްސާ ކުރިއަށް ގެނދަން މަސައްކަތް ކުރަމުން އަންނަ ކަމަށެވެ.

ގައުމީ ތަރައްގީގެ ޕްލޭން އެކުލަވާލަން އާއްމުންގެ ހިޔާލު ހޯދުމަށް ނެކްސިއާއިން މިހާރު އަންނަނީ 'ކުރިމަގު ސައްލާތައް' ރާއްޖޭގެ މީހުން އުޅޭ ހުރިހާ ރަށެއްގައި ބާއްވަމުންނެވެ. އެ ސައްލާތަކުގައި ރައްޔިތުން ފާޅުކުރާ އުންމީދުތަކާއި ހިޔާލުތައް، ތަޖުރިބާކާރުންގެ ވަށްމޭޒު ޖަލްސާތަކާ ހަމައަށް ގެންދާނެ ކަމަށް ނެކްސިއާއިން ބުންޏެވެ.

ގައުމީ ތަރައްގީގެ ޕްލޭން އެކުލަވާލަން ނެކްސިއާއިން މިހާތަނަށް ރާއްޖޭގެ 100އަށް ވުރެ ގިނަ ރަށުގައި ކުރިމަގު ސައްލާ ވަނީ ބާއްވައިފަ އެވެ. 

އެ ސައްލާތަކުގައި ރައްޔިތުން އެންމެ ބޮޑަށް ފާހަގަކުރި ކަންކަމުގެ ތެރޭގައި ހިމެނެނީ:

މީގެ އިތުރުން 'ރަށުވަންތަކަން' ގެއްލިގެން ނުދާނެ ގޮތަށް ރާއްޖޭގެ މާހައުލަށް ފެތޭ އަދި ވަށައިގެންވާ ވެއްޓާއި މާހައުލީ ނިޒާމްތައް ފަނާނުވާ ފަދަ ތަރައްގީގެ ތަސައްވުރުތައް ސައްލާގެ ބައިވެރިން ވަނީ ނެކްސިއާއާ ހިއްސާކޮށްފަ އެވެ.

ވަށްމޭޒު ބައްދަލުވުންތަކުގައި ތަޖުރިބާކާރުންގެ ހުށައެޅުންތައް ބޭނުންވަނީ ރައްޔިތުންގެ އެ އުއްމީދުތައް ހާސިލްކުރަން ހުރި ގޮންޖެހުންތަކާއި ހައްލުތަކުގެ މައްޗަށެވެ.

"މި ހުރިހާ މަސައްކަތެއްގެ ނަތީޖާއަކަށް ވެގެންދަނީ ފުޅާ ދާއިރާގެ ހިޔާލާއި މަޝްވަރާ އަދި އިލްމީ ދިރާސާ އާއި ހެކީގެ މައްޗަށް އެކުލެވޭ ސިޓިޒަން ސެންޓްރިކް ޕްލޭނެއް ހެދިގެން ދިއުން،" ނެކްސިއާގެ އޮފިޝަލަކު ވިދާޅުވި އެވެ.

އެހެންކަމުން ނެކްސިއާއިން އެދެނީ ތަފާތު ދާއިރާތަކުގެ ފަންނީ ތަޖުރިބާކާރުން ވަށްމޭޒު ޖަލްސާތަކުގައި ބައިވެރިވުމަށެވެ.