ސުޕްރީމް ކޯޓުގެ ފަނޑިޔާރުން ވަކިކުރީ ރައީސްގެ ބާރުގެ ދަށަށް ޖުޑިޝަރީ ގެންނަން: އެމްޑީޕީ

ސުޕްރީމް ކޯޓުގެ ދެ ފަނޑިޔާރުން ކަމަށްވާ ޑރ. އަޒްމިރާލްދާ ޒާހިރު އާއި މަހާޒު އަލީ ޒާހިރު ފަނޑިޔާރުކަމުން މިއަދު ވަކިކުރި ކުރުމަކީ ޖުޑިޝަރީ ރައީސް މުހައްމަދު މުއިއްޒުގެ އަތް ދަށަށް ގެނައުމަށް ހިންގި ގައިރު ގާނޫނީ ކަމެއް ކަމަށް އިދިކޮޅު އެމްޑީޕީން މިއަދު ބުނެފި އެވެ. 

ވީ ކިހިނެއް؟ - މަޖިލީހުގެ މިއަދުގެ ޖަލްސާގައި މަހާޒު އާއި އަޒްމިރާލްދާ ވަކިކުރަން ނިންމި ނިންމުމާ ގުޅިގެން އެމްޑީޕީން މިއަދު ނެރުނު ބަޔާނެއްގައި ބުނީ:

"މިއީ ގާނޫނުއަސާސީ އާއި ގާނޫނުތަކާ ހިލާފަށް ކޮށްފައިވާ ކަމެކެވެ. މި ދެ ފަނޑިޔާރުން ވަކިކުރުމަކީ އަދުލު އިންސާފު ގާއިމުކުރުމުގެ ބާރު ރައީސް ޑރ. މުހައްމަދު މުއިއްޒުގެ ފުރިހަމަ ކޮންޓްރޯލްގެ ދަށަށް ގެނައުމަށް ހިންގި، ގައިރު ދުސްތޫރީ އަދި ގައިރު ގާނޫނީ އަމަލެކެވެ،" އެމްޑީޕީގެ ބަޔާނުގައިވެ އެވެ. 

ތަފްސީލް - މީގެ އިތުރުން، ކޮމިޓީ މަރުހަލާގައި ދެ ފަނޑިޔާރުން ޖަވާބުދާރީވުމަށް ފުރުސަތު ދިނުމަށް އެދުނު ނަމަވެސް ކޮމިޓީން އެކަމަށް ފުރުސަތު ނުދިންކަން ފާހަގަކޮށް އެމްޑީޕީން ބުނީ، "އެއްވެސް އަސާސެއް ނެތް ދޮގު ތުހުމަތުތަކުން ދިފާއުވުމުގެ ހައްގުން އެ ފަނޑިޔާރުން މަހުރޫމް ކޮށްފައިވުމަކީ ބަލައިގަނެވޭނެ ކަމެއް ނޫން" ކަމަށެވެ. އަދި ބުނީ:

"މިއީ ރާއްޖޭގެ ޖުޑީޝިއަރީއަށް އޮތް އިތުބާރު އެއްކޮށް ގެއްލިގެން ގޮސް، ފޫނުބެއްދޭ ވަރުގެ ގެއްލުންތަކެއް ގައުމަށް ލިބޭނެ ކަމެކެވެ." އެމްޑީޕީގެ ބަޔާނުގައި ބުންޏެވެ.