ފަނޑިޔާރުން ވަކިކުރާ މައްސަލަ ދިރާސާކުރާ ޖުޑީޝަރީ ކޮމިޓީ ސިއްރުކޮށްފި

ސުޕްރީމް ކޯޓުގެ ދެ ފަނޑިޔާރުން ކަމަށްވާ މަހާޒު އަލީ ޒާހިރާއި ޑރ. އަޒްމިރަލްދާ ޒާހިރު ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ފޮނުވާފައިވާ މައްސަލަ ދިރާސާކުރަމުންދާ ޖުޑީޝަރީ ކޮމިޓީ ވަކި ހިސާބަކުން ސިއްރުކުރަން މިއަދު ނިންމައިފި އެވެ.

ވީ ކިހިނެއް؟ - ދެ ފަނޑިޔާރުން ވަކިކުރުމަށް ކޮމިޝަނުން ނިންމީ، އަޒްމިރަލްދާގެ ފިރިކަލުން އަދި އައިޖީއެމްއެޗުގެ ޑޮކްޓަރު އިސްމާއީލް ލަތީފް މަސާޖު ޕާލާއަކުން ހައްޔަރުކޮށް ބަންދުކުރުމާ މެދު ގޮތެއް ނިންމަން ކްރިމިނަލް ކޯޓަށް ގެންދިޔަ މަޖިލީހަށް އަޒްމިރަލްދާ އާއި މަހާޒު ނުފޫޒު ފޯރުވި ކަމަށް ބުނާ މައްސަލާގަ އެވެ.

މިއަދު ބޭއްވި ކޮމިޓީ ބައްދަލުވުމުގައި އިދިކޮޅު އެމްޑީޕީގެ ޕާލިމެންޓަރީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ގެންދެވީ ތަހުގީގު ރިޕޯޓްގައި ހުރި ތަފުސީލުތައް ވިދާޅުވަމުންނެވެ. ކޮމިޓީ ސިއްރުކުރަން ހުށަހެޅީ އެކަމާ ގުޅުވައިގެންނެވެ.

ތަފްސީލް - ޕީއެންސީގެ ޕާލިމެންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު ކޮމިޓީ ސިއްރުކުރުމަށް ހުށަހަޅުއްވަމުން ވިދާޅުވީ:

ޝާހިދު ކޮމިޓީ ފައްޓަވަމުން އެ ގޮތަށް ހުށަހެޅުއްވި ނަމަވެސް ފުރަތަމަ އެއްވެސް މެންބަރަކު އެ ހުށަހެޅުއްމަށް ތާއީދެއް ނުކުރައްވަ އެވެ.

ނަމަވެސް ނާޒިލް ތަހުގީގު ރިޕޯޓުގެ ތަފުސީލުތަކަށް ވަޑައިގަތުމަށް މަސައްކަތް ކުރެއްވުމުން ފަރެސްމާތޮޑާ ދާއިރާގެ މެންބަރު އަޝްރަފު ރަޝީދު ތާއީދުކުރެއްވި އެވެ. އަދި ކުރެންދޫ ދާއިރާގެ މެންބަރު މުހައްމަދު ޝާބިން ހަބީބް ވެސް ވަނީ އިސްމާއީލް ލަތީފްގެ މައްޗަށް ސާބިތުނުވާ ތުހުމަތެއްގެ ތަފުސީލުތައް ވިދާޅުވަމުންދާނަމަ ކޮމިޓީ ސިއްރުކުރަން ޖެހޭނެ ކަމަށް ވިދާޅުވެފަ އެވެ.

ކޮމިޓީގެ މުގައްރިރު އަދި މަނަދޫ ދާއިރާގެ މެންބަރު ހުސްނީ މުބާރަކް ވޯޓަށް އަހަން މަސައްކަތް ކުރެއްވުމާއެކު ނާޒިލް އާއި ކެންދޫ ދާއިރާގެ މެންބަރު މައުރޫފް ޒާކިރު ކޮމިޓީ ދޫކުރަައްވައި ނުކުމެވަޑައިގަތެވެ. ނުކުންނަވަން ވަޑައިގަންނަވަމުން ވެސް ދެ މެންބަރުން އަޑުގަދަކުރައްވައި ނުރުހުން ފާޅުކުރެއްވި އެވެ.

ކޮމިޓީން ސިއްރުކުރުމަށް ފާސްކުރީ ފަސް މެންބަރުންގެ ވޯޓަކުންނެވެ. އެއާއެކު ކޮމިޓީގެ ލައިވް ސްޓްރީމް ހުއްޓާލި އެވެ. އަދި ކޮމިޓީގައި ތިއްބެވި ޓީވީ ސްޓޭޝަންތަކުގެ ކެމެރާމަނުން ކޮމިޓީން ނެރުނެވެ.