ކަޅުތެޔޮ ޖެހި މައްސަލާގައި ހައްޔަރު ކުރި ރިޝްމާހު (ފޮޓޯ/ޕޮލިސް)
މަރިޔަމް ޒުބައިރު ގަޔަށް ކަޅުތެޔޮ ޖެހި މައްސަލާގައި ބަންދުކުރި މީހާ ދޫކޮށްލައިފި
އެމްޑީޕީގެ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދި)ގެ ގަޔަށް ކަޅުތެޔޮ ޖެހި މައްސަލާގައި ހައްޔަރުކުރި މީހާ ބަންދުން އިއްޔެ ދޫކޮށްލައިފި އެވެ.
ވީކިހިނެއް؟ - މަރިޔަމް ޒުބައިރުގެ ގަޔަށް ކަޅުތެޔޮ ޖެހީ މިދިޔަ މަހުގެ 16 ވަނަ ދުވަހުގެ ރެ އެވެ. އެ މައްސަލާގައި މީހަކު ހައްޔަރުކުރީ މިދިޔަ މަހުގެ 27ގަ އެވެ.
ހައްޔަރުކުރި މީހާއަކީ:
-
އަހުމަދު ރިޝްމާހް، 20، ސަންލައިޓްވިލާ/ގއ. ދާންދޫ
ޖެހިގެން އައި ދުވަހުގެ އޭނާގެ ބަންދަށް 15 ދުވަސް ކްރިމިނަލް ކޯޓުން ޖެހި އެވެ. އެ މުއްދަތު ހަމަވެގެން އިއްޔެ ކްރިމިނަލް ކޯޓަށް ހާޒިރުކުރި އެވެ.
ތަފްސީލް - ކްރިމިނަލް ކޯޓުގެ ގާޒީ އާމިނަތު އަޒްލިފާ ނެރުއްވި އަމުރުގައިވާ ގޮތުން އޭނާ ބަންދުުން ދޫކޮށްލަން ނިންމެވީ:
-
ތުހުމަތުކުރެވޭ ވަރަށް ހެކި ހުރި ނަމަވެސް ކުރާ ތުހުމަތަކީ ކުޑަ ކުށަކަށް ވާތީ
-
ބަންދަށް 15 ދުވަސް ހޭދަކޮށްފައިވުމުގެ އިތުރަށް ތަހުގީގަށް އެއްބާރުލުން ދޭނެ ކަމަށް އެއްބަސްވެފައިވާތީ
-
ބަންދުން ދޫކޮށްލީ ޝަރުތުތަކެއް ކުރުމަށް ފަހު؛ ޝަރުތަކާ ހިލާފުވެއްޖެ ނަމަ އަލުން ބަންދު ކުރެވޭނެ ކަމަށް އަމުރުގައިވޭ
އެނގުން މުހިންމު - މަރިޔަމް ޒުބައިރުގެ ގަޔަށް ކަޅުތެޔޮ ޖަހާފައިވަނީ ރައީސް މުހައްމަދު މުއިއްޒުގެ ދަރިކަލަކު ވޭޕް ބޭނުންކުރުމާ ވިދިގެން ވޭޕް ރާއްޖޭގައި މަނާކުރި ކަމަށް ބުނެ އޭނާ ދެއްކި ވާހަކަތަކެއްގެ މައްސަލަ ބޮޑުވެފައި ވަނިކޮށެވެ. އެގޮތުން:
-
ރައީސްގެ އަނބިކަނބަލުން ސާޖިދާ މުހައްމަދު ވަނީ މަރިޔަމް ޒުބައިރުގެ މައްޗަށް މަދަނީ ދައުވާކޮށް ކޯޓަށް މައްސަލަ ހުށަހަޅާފައިވޭ
-
އެ މައްސަލާގައި މަރިޔަމް ޒުބައިރު ފުލުހަށް ވެސް ހާޒިރުކޮށްފައިވޭ