ފުލުހުންނާއި ސިފައިން ގުޅިގެން މިރޭ މާލޭގައި ހިންގާ ސަލާމަތީ ކުއްލި އޮޕަރޭޝަންގައި ހެންވޭރުކޮޅު ގެޔަކަށް ވަދެ ފުލުހުން ފާސްކުރާ އިރު އެ ގޭގެ ތެރެއިން މީހަކު ފުލުހުންނާ މުއާމަލާތްކުރަނީ (ފޮޓޯ/މުހައްމަދު މުޒައްޔިން ނާޒިމް/ދައުރު)
މިރޭ ސިފައިންނާއި ފުލުހުން ގުޅިގެން ފެށި ގައުމީ ސަލާމަތާ ބެހޭ ހާއްސަ ކުއްލި އޮޕަރޭޝަންގައި މިހާތަނަށް ތިން މީހަކު ހައްޔަރުކޮށްފި ކަމަށް، ފުލުހުން ދެންމެ ބުނެފި އެވެ.
ވީ ކިހިނެއް؟ - މި އޮޕަރޭޝަންގައި މާލެއިން ހެންވޭރު ރާޅުގަނޑު ސަރަހައްދުގައި ހުރި ގެއަކާއި ގަލޮޅު ދަނޑު ކައިރީގައި ހުރި ގެއަކަށް ފުލުހުން ވަދެ މިހާރު ވެސް އަންނަނީ ފާސްކުރަމުންނެވެ.
ތަފްސީލް - ފުލުހުން އާންމުކުރި ކުރު ބަޔާނެއް ބުނީ މިހާތަނަށް ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
"އެ މީހުންނާ ގުޅުން ހުރި ތަންތަން ބަލައި ފާސްކުރުމުގެ މަސައްކަތް ކުރަމުންދާ ވާހަކަ ދަންނަވަމެވެ،" ފުލުހުންގެ ބަޔާނުގައި ބުންޏެވެ.
ހެންވޭރު ރާޅުގަނޑު ސަރަހައްދުގައި ހުރި ގެއެއްގެ ތެރެއަށް ވަން ފުލުހުން ތިބީ މޫނު ނިވާކޮށްގެންނެވެ. އެގޭގެ ބިއްލޫރި ކުޑަދޮރަކުން އެެތެރެ ފެންނަ ބައެއް ފޮޓޯތައް 'ދައުރު'ގެ ރިޕޯޓަރު ނެގި އެވެ. ބައެއް ފޮޓޯތަކުން ފެންނަނީ ކަޅު ހެދުމެއްގައި މޫނު ނިވާކޮށް ހުރި އަންހެނަކު ފުލުހަކާ އަތުން މުއާމަލާތްކުރާ ތަނެވެ.
ބައެއް މީޑިއާތަކުން ބުނާ ގޮތުގައި އެގެއިން ފިރިހެނަކު ހައްޔަރުކޮށްގެން ވެސް ގެންދިޔަ އެވެ.
ގަލޮޅު ދަނޑު ކައިރީގައި ހުރި ގެއެއްގެ ތެރޭގައި ވެސް ފުލުހުން އަންނަނީ ހަރަކާތްތެރިވަމުންނެވެ. އެ ގެ ހުންނަ ޝަބުނަމް މަގު އޮތީ ބަންދުކޮށްފަ އެވެ.
ފުލުހުން ބުނީ އޮޕަރޭޝަނާ ބެހޭ މައުލޫމާތު ހާމަކުރެވެން އޮތް މިންވަރަކުން އާންމުކުރަމުން ގެންދާނެ ކަމަށެވެ.
ކޮމެންޓް (2)
ތެފައާސާ.
ޙުސައިން