'ވަގު ގޯތި' ތަހުގީގުގެ އިތުބާރު ހިފެހެއްޓުމަށް ރަޖުނީ އެކަހެރިކޮށްފި

ނުހައްގުން ވިނަރެސް ފެލެޓެއް ހޯދި ކަމަށް ތުހުމަތުވާ އަދި އެޗްޑީސީއާ ގުޅޭ ތަހުގީގު ހިންގަމުން އަންނަ ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ވެރިޔަކަށް ހުންނެވި ސުޕްރިޑެންޓް އޮފް ޕޮލިސް ރަޖުނީ ޝުއައިބު، އެ މަސައްކަތުން އެކަހެރިކޮށްފައިވާ ކަމަށް ފުލުހުން މިރޭ ބުނެފި އެވެ. 

ވީ ކިހިނެއް؟ - މިދިޔަ ސަރުކާރުގައި މާލޭ މީހުންނަށް ގޯތި ދިނުމަށް ހިންގި ބިންވެރިޔާ ސްކީމްގެ ލިސްޓުގައި ނުހިމެނޭ ބަޔަކަށް ގޯތި ދިން ކަމަށް ބުނާ މައްސަލައެއް މިދިޔަ ބުދަދުވަހު ފެންމަތިވެ، އެ މައްސަލަ ފުލުހުން އަންނަނީ ތަހުގީގުކުރަމުންނެވެ. އެގޮތުން: 

'ވަގު ގޯތީ'ގެ ތަހުގީގުން ރަޖުނީ އެކަހެރިކުރިކަން ފުލުހުން ހާމަކޮށްފައިވަނީ، އެ މުއައްސަސާގެ ތަރުޖަމާން އަހްމަދު ޝިފާން މިރޭ އެކްސްގައި ކުރެއްވި ޕޯސްޓެއްގަ އެވެ.

ބުނީ ކީކޭ؟- އެ ޕޯސްޓުގައި ޝިފާން ވިދާޅުވި ގޮތުގައި އިކޮނޮމިކް ކްރައިމް ޑިޕާޓްމަންޓްގެ ވެރިޔާގެ ހައިސިއްޔަތުން ރަޖުނީ ކުރައްވަމުން އައި މަސައްކަތްތައް ވަގުތީ ގޮތުން އެހެން  ބޭފުޅަކާ މިހާރު ހަވާލުކޮށްފައިވާ ކަމަށެވެ.

"މިކަމަކީ އިކޮނޮމިކް ކްރައިމް އިންވެސްޓިގޭޝަންސްގައި މިވަގުތު ކުރަމުންގެންދާ ބިންވެރިޔާ އަދި ގެދޮރުވެރިޔާ ސްކީމާ ގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީންކުރުމަށްޓަކައި ގެނައި ބަދަލެކެވެ،" ޝިފާން ވިދާޅުވި އެވެ.  

ރަޖުނީ މަސައްކަތުން އެކަހެރިކުރަން ނިންމީ، އެއްވެސް ނުރަނގަޅު އަމަލެއް އޭނާ ހިންގަވާފައިވާކަން މިހާތަނަށް ފާހަގަކުރެވިގެން ނޫން ކަމަަށް ވެސް ޝިފާން ވިދާޅުވި އެވެ.