'ވަގު ގޯތި' މައްސަލަ: ލިޔެކިޔުންތަކުގެ ފޮރެންސިކް ތަހުލީލު ހަދަން އެމްޑީޕީއިން ގޮވާލައިފި

'ބިންވެރިޔާ' ސްކީމުުން ބިން ހޯދަން ބަޔަކު ހުށަހެޅި 'ވަގު' ލިޔުންތަކުގެ ފޮރެންސިކް ތަހުލީލެއް ހަދައި، އެ ރިޕޯޓު އާންމުކުރުމަށް އިދިކޮޅު އެމްޑީޕީއިން ފުލުހުންނަށް ގޮވާލައިފި އެވެ.

ވީ ކިހިނެއް؟ - މިދިޔަ ސަރުކާރުގެ ބިންވެރިޔާ ސްކީމުން ބިން ނުލިބޭ ބަޔަކަށް ވަގު ލިޔުންތަކެއް ހުށަހަޅައިގެން ބިން ލިބުނު ކަމަށް ބުނާ ލިޔުންތަކެއް މިދިޔަ ބުދަ ދުވަހު ސޯޝަލް މީޑިއާގައި ވަނީ އާންމުވެފަ އެވެ. އޭގެ ތެރޭގައި އެޗުޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ އެއްބަނޑު އެއްބަފާ ބޭބެ މުހައްމަދު ފަޒީލް ރަޝީދު ވެސް ހިމެނެ އެވެ.

އެ ލިޔުންތަކާ ގުޅިގެން ފުލުހުން ތަހުގީގެއް ފަށާފައިވާއިރު، ގޯތި ލިބުނު ކަމުގެ ރަޖިސްޓްރީ ދިނީ ކުރީގެ ސަރުކާރުން ކަމަށް ފަޒީލް ތަހުގީގުގައި ވިދާޅުވި ކަމަށް، ތަހުގީގު ފަށައި، ޖެހިގެން އައި ދުވަހު ބޭއްވި ނޫސް ކޮންފަރެންސެއްގައި ފުލުހުން ވަނީ ބުނެފަ އެވެ.

ފުލުހުންގެ ފަރާތުން އިސްބޭފުޅަކަށް ހުންނެވި އެސިސްޓެންޓް ކޮމިޝަނަރު އޮފް ޕޮލިސް އަބްދުﷲ ޝަރީފް ވިދާޅުވީ، މި ތަހުގީގާ ގުޅިގެން ހަ ފަރާތަކާ މިހާތަނަށް ސުވާލުކޮށްފައިވާ ކަމަށެވެ. އޭގެ ތެރެއިން، ގޯތި ލިސްޓުގައި ނުހިމެނުނަސް ގޯތި ލިބުނު ކަމަށް ބުނާ އެންމެންނާ ވެސް ފުލުހުން ސުވާލު ކުރުމުން ބުނެފައިވަނީ، ގޯތީގެ ރަޖިސްޓްރީ އާއި އެގްރިމަންޓް ދީފައި ވަނީ ކުރީގެ ސަރުކާރުން ކަމަށެވެ.

"އަޅުގަނޑުމެން [ތަހުގީގުގައި] މި ކުރި މަސައްކަތުން އަދި ސުވާލު ކުރި މީހުންގެ ފަރާތުން ވެސް އަޅުގަނޑުމެންނަށް ފާހަގަވެފައިވާ ހުރީ، މި ފަރާތްތަކަށް ލިބިފައި ހުރި [ގޯތީގެ ރަޖިސްޓްރީ އާއި އެއްބަސްވުމުގެ] ޑޮކިއުމަންޓްތަކަކީ ކުރީ ދައުރުގައި [ރައީސް އިބްރާހިމް މުހައްމަދު ސޯލިހްގެ ވެރިކަމުގައި] ލިބިފައި ހުރި ޑޮކިއުމަންޓްތަކެއް ކަމަށް، މިހާ ހިސާބަށް ތަހުގީގަށް ފާހަގަ ކުރެވެނީ،" 24 ގަޑިއިރުވީ ތަހުގީގާ ގުޅޭ ގޮތުން ޝަރީފް ފުރަތަމަ ވިދާޅުވީ މިގޮތަށެވެ.

ނަމަވެސް ފަހުން އޭނާ އެ ވާހަކަ ބަދަލުކުރައްވައި ވިދާޅުވީ، ކުރީ ސަރުކާރުގައި ދިން ލިޔުންތަކެއް ކަމަށް ބުނަނީ ސުވާލު ކުރި މީހުން ކަމަށެވެ.

އޭގެ ފަހުން ކުރީ ސަރުކާރުގައި ގޯތިތަކާއި ފްލެޓްގެ ކަންކަމުގައި އިސްކޮށް އުޅުއްވި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީން ވަނީ އެކަން ދޮގުކުރައްވާފަ އެވެ.

ބުނީ ކީކޭ؟ - އެމްޑީޕީއިން މިއަދު ބޭއްވި ނޫސްވެރިންގެ ބައްދަލުވުމުގައި އެމްޑީޕީ ސަރުކާރުގައި ރައީސް އޮފީހުގެ ލީގަލް ސެކްޝަންގެ ހެޑްގެ ގޮތުގައި މަސައްކަތް ކުރެއްވި އަހްމަދު މައުރޫފް ވިދާޅުވީ ތައްޔާރުނުވެ، ތަހުގީގަކާއި ތަފްސީލަކާ ނުލައި ފުލުހުން މީގެ ކުރިން ނޫސް ކޮންފަރެންސެއްގައި ވާހަކަ ނުދައްކާ ކަމަށެވެ.

ލިޔެކިޔުމެއް ހިމެނޭ މިފަދަ މައްސަލައެއްގައި ފުލުހުން އެ ލިޔެކިޔުމުގެ ފޮރެންސިކް ތަހުލީލެއް ނުހަދަނީ ކީއްވެގެންތޯ ވެސް އޭނާ ވަނީ ސުވާލު އުފައްދަވައިފަ އެވެ.

"އާންމުކޮށް އަމަލުކުރާ ގޮތަކީ، ލިޔެކިޔުމަކާ ބެހޭ މައްސަލައެއް ފެންމަތިވީމަ އެކަމުގައި ޝާމިލުވާ މީހުން ގެނެސްގެން ސުވާލު ކުރުމުގެ ބަދަލުގައި އެ ލިޔެކިޔުމުގެ ސައްހަކަން ކަށަވަރު ކުރުން. އެ ގޮތްތައް މި ޒަމާނުގައި އެބަހުރި. ހާއްސަކޮށް މޯލްޑިވްސް ޕޮލިސް ސާވިސްގައި މި ހުރި ފޮރެންސިކް ލެބަކީ، އެ ބޭފުޅުން ވިދާޅުވާ ގޮތުގައި އޭޝިއާ ސަރަހައްދުގައި ހުރި އެންމެ ފެންވަރު ރަނގަޅު ލެބޯޓްރީތަކުގެ ތެރެއިން ލެބޯޓްރީއެއް،" މައުރޫފް ވިދާޅުވި އެވެ.

"ލިޔެކިޔުމަކާ ގުޅޭ ސުވާލެއް އުފެދިއްޖެ ނަމަ ނުވަތަ ލިޔެކިޔުމެއްގެ ސައްހަކަމާ މެދު ސުވާލު އުފެދިއްޖެ ނަމަ މަދު ގަޑިކޮޅެއްގެ ތެރޭގައި އެ ލިޔެކިޔުމެއް އެނަލައިޒްކޮށް އެއީ ސައްހަ އެއްޗެއްތޯ ނުވަތަ ނޫންތޯ ކަށަވަރުކުރެވޭ. ނަމަވެސް މި މައްސަލައިގައި ފުލުހުން މި އަމަލުކުރި ގޮތަކީ، ކަނޑައެޅިގެން ލިޔެކިޔުމެއްގެ ސައްހަކަމާ މެދު ސުވާލު އުފެދިފައި އޮއްވާ، އޭގެ ފޮރެންސިކް ތަހުލީލެއް ހެދުމެއް ނެތި އަރާ އެ ލިޔެކިޔުމާ ގުޅޭގޮތުން ވާހަކަ މި ދެއްކީ،" އޭނާ ވިދާޅުވި އެވެ.

ތަފްސީލު - މައުރޫފް ވިދާޅުވީ ލިޔެކިޔުމަކާ ބެހޭގޮތުން ފުލުހުން ހަދާ ފޮރެންސިކް ތަހުލީލަކުން އެ ލިޔެކިޔުމަކާ ބެހޭ ވަރަށް އަސާސީ ކަންކަން ވެސް މި ޒަމާނުގައި ދެނެގަނެވިދާނެ ކަމަށެވެ. އޭގެ މިސާލުތަކެއްގެ ގޮތުގައި އޭނާ ފާހަގަކުރެއްވި ކަންކަމަކީ:

މިއީ މި ޒަމާނުގައި ވަރަށް އާދައިގެ އަދި ކުޑަ ވަގުތުކޮޅެއްގެ ތެރޭގައި ކުރެވެން އޮތް ކަމެއް ނަމަވެސް، އެރެއިން އެރެއަށް އެއްޗެއް ބުނަން ޖެހިގެން ފުލުހުން އަވަސްވެގަތީ، މައުރޫފް ވިދާޅުވި ގޮތުގައި "ސިޔާސީ ނޫސް ކޮންފަރެންސެއް" ބޭއްވުމަށް ކަމަށެވެ.

"އެހެންވީމަ މި ކަމުގައި ފުލުހުން ދެން އިންސާފުވެރި ތަހުގީގެއް ހިންގަފާނެ ކަމަށް ނުވަތަ ރަނގަޅު، ފުރިހަމަ ތަހުގީގެއް ހިންގަފާނެ ކަމަކަށް މިހާރު އަޅުގަނޑުމެން ދެން ގަބޫލުކުރާކަށް ބޭނުމެއް ނޫން،" މައުރޫފް ވިދާޅުވި އެވެ.

"ޗެލެންޖުކޮށްފައި ދަންނަވަން، މިހާރު ސުވާލު އުފެދިފައި އޮތް ޑޮކިއުމަންޓުގެ ރަނގަޅު ފޮރެންސިކް ތަހުލީލެއް ހަދާފައި އޭގެ ރިޕޯޓު ހާމަކުރާކަށް ފުލުހުންނަށް ކެރިވަޑައެއް ނުގަންނަވާނެ. އެ ރިޕޯޓު ހާމަކޮށްފިއްޔާ ފުލުހުން އެ ދެއްކި ވާހަކަ އާއި ސަރުކާރުގެ ޕްރޮޕަގަންޑާ ބޭޒާރުވެގެންދާނެ،" އޭނާ ވިދާޅުވި އެވެ.

"ޔަގީނާ ގާތަށް ދަންނަވަން ކެރޭ، އޭގެ ރަނގަޅު ފޮރެންސިކް ތަހުލީލެއް ހަދައިފި ނަމަ ފެންނާނެ އެއީ މި ސަރުކާރުގެ ވެރިން ހުޅުމާލެއިން ގޯތިތަކެއް ދަމައިގަންނަންވެގެން ހެދި ޑޮކިއުމަންޓްތަކެއް ކަން. އަދި އަޅުގަނޑުމެންނަށް ވަރަށް ބޮޑަށް ބެލެވޭ މިދިޔަ ސަރުކާރު ނިމުނުފަހުން އުފައްދާފައި އޮތް ކަރުދާހެއްކަން އެނގޭ ހިސާބަށް ވެސް އެކަން ގޮސްދާނެ،" އޭނާ ވިދާޅުވި އެވެ.

ގުޅުން ހުރި - ގޯތި ދިނުމުގެ ކަންކަމުގައި ކުރިން އިސްކޮށް އުޅުއްވި ހައުސިންގެ ސްޓޭޓް މިނިސްޓަރު އަކްރަމް ކަމާލުދީންއަށް ތުހުމަތު އަމާޒުވާ މޭރުމަކުން ފުލުހުން ވާހަކަދެއްކިއިރު، މައުރޫފް ވިދާޅުވީ އަދި މިހާތަނަށް އަކުރަމްއާ ސުވާލު ވެސް ނުކުރާ ކަމަށެވެ.

"މި މައްސަލައިގައި ފުލުހުން މި އަމަލުކުރި ގޮތުން އެނގޭ، ފުލުހުން އެ ތިބީ ސިޔާސީ ގޮތުން ވަކި ކޮޅެއް ނަގާފައިކަން." މައުރޫފް ވިދާޅުވި އެވެ.