އަލިފާނުގެ ހާދިސާ ތަހުގީގުކުރަން އިންޑިއާގެ ޓީމެއް އަތުވެއްޖެ

ހައުސިން މިނިސްޓްރީގައި ހިނގި އަލިފާނުގެ ބޮޑު ހާދިސާ ތަހުގީގުކުރަން  އިންޑިއާގެ  ތަޖުރިބާކާރު ޓީމެއް ރާއްޖެ އަތުވެއްޖެ އެވެ.

ވީ ކިހިނެއް؟ - ތިން މިނިސްޓްރީއެއް ހިންގަމުން ގެންދިޔަ އިމާރާތްތައް އެއްކޮށް އަނދައިގެންދިޔަ އަލިފާނުގެ އެ ހާދިސާ ހިނގީ މި މަހުގެ 12 ވަނަ ދުވަހު އެވެ.

ތަފްސީލް - އެކަމާ ގުޅޭ ގޮތުން ޕޮލިސް ކޮމިޝަނަރު އަލީ ޝުޖާއު މިއަދު މީޑިއާތަކަށް ފޮނުއްވި މެސެޖެއްގައި ވިދާޅުވީ އެ ހާދިސާ ތަހުގީގުކުރަން އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު ރާއްޖެ އައިސް، ދިވެހި ފުލުހުންނާ އެކު ހަރަކާތްތެރިވަމުން އަންނަ ކަމަށެވެ.

އެނގުން މުހިންމު - އަލިފާނުގެ ހާދިސާއާ ގުޅޭ ގޮތުން ތަހުގީގަށް ބޭނުން ކުރެވިދާނެ މައުލޫމާތެއް ލިބިފައިވާ ނަމަ އެ މައުލޫމާތެއް ހިއްސާ ކުރަން ވެސް ފުލުހުން ވަނީ އެދިފަ އެވެ. އެގޮތުން، އެ މައުލޫމާތު ދޭން ޖެހެނީ މޭޖާ ކްރައިމް އިންވެސްޓިގޭޝަންގެ ނަންބަރު 9911099 އަށް ގުޅައިގެންނެވެ.

އަލިފާނުގެ ހާދިސާއަށް ފަހު ތިން މިނިސްޓްރީގެ މަސައްކަތް ވަނީ ދަރުބާރުގެއަށް ބަދަލުކޮށްފަ އެވެ. ދަރުބާރުގޭގައި ވަސީލަތްތައް ހަމަކޮށް މިދިޔަ އާދީއްތަ ދުވަހު އެ ތަނުން މިނިސްޓްރީތަކުގެ ހިދުމަތް ދޭން ވެސް ފެށި އެވެ.