ހައުސިން މިނިސްޓްރީގައި އަލިފާން ރޯވި ދުވަހު ސިފައިން އަލިފާން ނިއްވުމުގެ މަސައްކަތުގައި އުޅެނީ. (ދައުރު ފޮޓޯ/ އަބްދުﷲ އަނޫފް ޖުނައިދު)
އަލިފާނުގެ ހާދިސާގެ މައުލޫމާތެއް އޮތް ނަމަ ހިއްސާކުރަން އެދިއްޖެ
މިދިޔަ ބުރާސްފަތި ދުވަހު ތިން މިނިސްޓްރީއެއް އަނދައި ހުލުވި މައްސަލާގައި ތަހުގީގަށް ބޭނުންކުރެވިދާނެ މައުލޫމާތެއް ލިބިފައިވާ ނަމަ ފުލުހަށް ހިއްސާކުރުމަށް މިއަދު އެދިއްޖެ އެވެ.
ވީ ކިހިނެއް؟ - އެންވަޔަރަމަންޓް މިނިސްޓްރީ ހިންގާ ގްރީން ބިލްޑިން އާއި ކޮންސްޓްރަކްޝަން މިނިސްޓްރީ އާއި ހައުސިން މިނިސްޓްރީ ހިންގާ ޓިނު އިމާރާތުގައި އަލިފާނުގެ ހާދިސާ ހިނގި ސަބަބެއް އަދި ނޭނގެ އެވެ. އެ މައްސަލަ ފުލުހުން ވަނީ ތަހުގީގު ކުރަން ފަށައިފަ އެވެ.
ބުނީ ކީކޭ؟ - ފުލުހުން މިއަދު 'އެކްސް'ގައި ކުރި ޕޯސްޓެއްގައިވާ ގޮތުން، އަލިފާނުގެ ހާދިސާއާ ގުޅޭ ގޮތުން ތަހުގީގަށް ބޭނުން ކުރެވިދާނެ މައުލޫމާތެއް ލިބިފައިވާ ނަމަ އެ މައުލޫމާތެއް ހިއްސާ ކުރަން ޖެހެނީ މޭޖާ ކްރައިމް އިންވެސްޓިގޭޝަންގެ ނަންބަރު 9911099 އަށެވެ.
އެނގުން މުހިންމު - އަލިފާނުގެ އެ ބޮޑު ހާދިސާ ތަހުގީގުކުރަން ބޭރުގެ ފޮރެންސިކް ޓީމަކާ އެކު މަސައްކަތްކުރަން ތައްޔާރުވަމުން އަންނަ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވަނީ ކުރިން ވިދާޅުވެފަ އެވެ.
އަލިފާނުގެ ހާދިސާއަށް ފަހު ތިން މިނިސްޓްރީގެ މަސައްކަތް ވަނީ ދަރުބާރުގެއަށް ބަދަލުކޮށްފަ އެވެ. ދަރުބާރުގޭގައި ވަސީލަތްތައް ހަމަކޮށް މިދިޔަ އާދީއްތަ ދުވަހުން އެ ތަނުން މިނިސްޓްރީތަކުގެ ހިދުމަތް ދޭން ވެސް ފެށި އެވެ.
ރައީސް މުހައްމަދު މުއިއްޒު ވިދާޅުވެފައިވަނީ ދާއިމީ އިމާރާތެއް ލިބެން ދެން މިނިސްޓްރީތަައް ހިންގުމަށް ތަނެއް ކުއްޔަށް ހިފުމުގެ ވިސްނުން ނުގެންގުޅުއްވާ ކަމަށެވެ.
ކޮމެންޓް