އަލިފާނުގެ ހާދިސާގައި އިމާރާތް ގެއްލުނު މިނިސްޓްރީތައް ހިންގަން ތަނެއް ކުއްޔަން ނުހިފަން ނިންމައިފި

މިދިޔަ ބުރާސްފަތި ދުވަހު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އަނދައި ހުލިވި މައްސަލާގައި، އެ ތިން މިނިސްޓްރީ ހިންގުމަށް ދާއިމީ ހައްލެއް ލިބެން ދެން ތަނެއް ކުއްޔަށް ނުހިފަން ނިންމައިފި އެވެ.

ވީ ކިހިނެއް؟ - ތިން މިނިސްޓްރީ ވެސް ވަގުތީ ގޮތުން ހިންގަމުން އަންނަނީ ދަރުބާރުގޭގަ އެވެ. ދަރުބާރުގޭގައި މިނިސްޓްރީތައް ހިނގަމުންދާ ގޮތް ބައްލަވައިލެއްވުމަށާއި މިނިސްޓްރީތަކުގެ މުވައްޒަފުންނާ ބައްދަލުކުރެއްވުމަށް ރައީސް މުހައްމަދު މުއިއްޒު މިއަދު އެ ތަނަށް ވަޑައިގަތެވެ.

ތަފްސީލް - އެ ބައްދަލުވުމުގައި ރައީސް މުއިއްޒު ދެއްކެވި ބައެއް ވާހަކަފުޅުތައް ރައީސް އޮފީހުގެ ވެބްސައިޓުގައި ޝާއިއުކުރި އެވެ. އޭގައި ލިޔެފައިވާ ގޮތުގައި، ދާއިމީ އިމާރާތެއް ލިބެންދެން ސަރުކާރުގެ ތަނެއްގައި މިނިސްޓްރީތަކުން ހިދުމަތް ދިނުމަށް ވިސްނަވާފައިވާ ކަމަށް ރައީސް ވަނީ ވިދާޅުވެފަ އެވެ. 

ދަރުބާރުގޭގައި މިނިސްޓްރީތަކުގެ މަސައްކަތްތައް ހިންގުމަށް އެ ތަނަށް ވަސީލަތްތައް އިތުރު ކުރުމަށް މަސައްކަތް ކުރައްވަމުންގެންދަވާ ކަމަށް ވެސް ރައީސް ވަނީ ވިދާޅުވެފަ އެވެ. އެގޮތުން، އެ މަނިކުފާނު ވިދާޅުވީ:

އެ މަނިކުފާނު ވަނީ، އަލިފާނުގެ ހާދިސާއާ ގުޅިގެން ތިން މިނިސްޓްރީ ހިންގުން ވަގުތީ ގޮތުން ދަރުބާރުގެއަށް ބަދަލުކޮށް، ހިދުމަތް ފޯރުކޮށްދިނުމަށްޓަކައި އެކުލަވާލައްވާފައިވާ ޓާސްކް ފޯހާއި ބައެއް ކުންފުނިތަކުގެ ވެރިންނާ ވެސް ބައްދަލުކުރައްވައިފަ އެވެ. 

ފަސްމަންޒަރު - ބުރާސްފަތި ދުވަހު ހެނދުނު ހައުސިން މިނިސްޓްރީގައި ހިފި އަލިފާންގަނޑު މުޅިން ކޮންޓްރޯލް ކުރެވުނީ ހަ ގަޑިއިރެއްހާ އިރު ފަހުން އެ ދުވަހު މެންދުރުގެ ވަގުތެއްގަ އެވެ. އޭރު ހައުސިން މިނިސްޓްރީގެ އިތުރަށް ކޮންސްޓްރަކްޝަން މިނިސްޓްރީއާއި ކުރިމަތީގައި ހުންނަ އެންވަޔަރަމަންޓް މިނިސްޓްރީ ހިންގާ ގްރީން ބިލްޑިން ވެސް އަނދައި ހުލިވި އެވެ.