އުމަރު ޒާހިރުގެ ހާލުކޮޅު ކުރިއަށް ވުރެ މިއަދު ސީރިއަސް

ދައުލަތުގެ ހިދުމަތްތެރިޔާ އުމަރު ޒާހިރަށް ކޮވިޑް-19 ޖެހި، ހޮސްޕިޓަލްގައި އެޑްމިޓްކުރި އިރަށް ވުރެ މިއަދު ހާލުކޮޅު ސީރިއަސްކަމަށާއި އޮކްސިޖަން ވެސް ދެމުން ގެންދާ ކަމަށް، އާއިލާއިން ބުނެފި އެވެ.

ކޮވިޑް-19 އަށް އުމަރު ޒާހިރު ޕޮޒިޓިވް ވީ ފުވައްމުލަކުގައި އަމިއްލަފުޅަށް އިމާރާތްކޮށްދެއްވި މިސްކިތެއް ހުޅުވަން އެ ރަށަށް ކުރެއްވި ދަތުރުފުޅަށް ފަހު މާލެއަށް އެނބުރި ވަޑައިގަތް ފަހުން ހުންއައިސް، ހާލުކޮޅު ގޯސްވުމުން ހެދި ޓެސްޓްތަކުންނެވެ. އަދި މީގެ ހަތަރު ދުވަސް ކުރިން ދަރުމަވަންތަ ހޮސްޕިޓަލްގައި އެޑްމިޓްކުރި އެވެ.

އާއިިލާގެ ފަރާތުން ވާހަކަ ދެއްކެވި ބޭފުޅަކު ވިދާޅުވީ މިއަދު ނޭވާލައްވަން އުނދަގޫވުމާ އެކު އޮކްސިޖަން ދެމުން ގެންދާ ކަމަށެވެ. 

އުމުރުފުޅުން 85 އަހަރުގެ ކުރީގެ މިނިސްޓަރު، އަދި ވަރަށް ޒުވާން އިރުއްސުރެ ދައުލަތުގެ އެކި މަގާމުތަކުގައި އެހާމެ ބުރަކޮށް އުޅުއްވި ހިދުމަތްތެރިޔާ މިދިއަ ދެ އަހަރެއްހާ ދުވަހު އުޅުއްވީ ކޮވިޑް-19 އަށް ވަރަށް ބޮޑަށް ސަމާލުވެގެންނެވެ. ގެއާ ކައިރީގައި ހުންނަ މިސްކިތަށް ވެސް ވަޑައިގަންނަވަން ފެށީ މާލޭގައި ކޮވިޑްގެ ހާލަތު ވަރަށް ބޮޑަށް ރަނގަޅުވި ފަހުން ކަމަށް، އާއިލާގެ ބޭފުޅަކު ވިދާޅުވި އެވެ.

"އެއީ ވެސް ފަތިސް ނަމާދަށް،" އޭނާ ވިދާޅުވި އެވެ.

އެންމެ ފަހުން އުމަރު ޒާހިރު އާންމުންގެ ތެރެއިން ފެނުނީ މާލެއަކުންނެއް ނޫނެވެ: ފުވައްމުލަކުގަ އެވެ. އެ ސިޓީގެ ފުނާޑު އަވަށުގައި 2 ޑިސެމްބަރުގައި އޮތް، އެ މަނިކުފާނު އިމާރާތްކޮށްދެއްވި މިސްކިތް 'މަސްޖިދުއް ސިއްދީގު' ހުޅުވުމުގެ ރަސްމިއްޔާތުގަ އެވެ.

އުމަރު ޒާހިރު ވިދާޅުވެފައިވާ ގޮތުގައި މިސްކިތް އިމާރާތްކޮށްދެއްވީ އާއިލާ އާއި ގާތް ބައެއް ބޭފުޅުންގެ ވެސް އެހީގަ އެވެ.

ކުރިން އެ އަވަށުގައި، 'މަސްޖިދުއް ސިއްދީގު'ގެ ނަމުގައި ހުރި މިސްކިތުގެ ޖާގައަކީ 100 މީހުންނެވެ. ނަމަވެސް އަވަށު މީހުން އުމަރު ޒާހިރުގެ އަރިހުން އެ މިސްކިތް ބޮޑުކޮށްދެއްވަން އެދުމުން، އެކަން ގަބޫލުފުޅުކުރައްވާ، 300 މީހުންގެ ޖާގައިގެ މިސްކިތެއް ބިނާކުރައްވަން އެހީތެރިވެދެއްވީ ކަމަށް، ބައެއް މީޑިއާތަކަށް ވިދާޅުވި އެވެ.

މިސްކިތް ހުޅުއްވައިދެއްވީ ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.

އުމަރު ޒާހިރު އެޑްމިޓްކުރުމުން ވަރަށް ގިނަ ބަޔަކު ގެންދަނީ އަވަސް ޝިފާއަކަށް އެދި ދުއާކުރަމުންނެވެ. 

އުމަރު ޒާހިރަކީ ރާއްޖޭގައި ދޭ ދެވަނައަށް އެންމެ މަތީ ޝަރަފު ކަމަށްވާ، ނިޝާން އިއްޒުއްދީނުގެ އިއްޒަތުގެ ލަގަބު 2008 ގައި އަރުވާފައިވާ ބޭފުޅެކެވެ.