ޓޯކުރި ގިނަ ޓެކްސީތައް އިހުތިޖާޖުގައި ބައިވެރިއެއް ނުވޭ؛ ވަގުތުން ދޫކޮށްލަން ޖެހޭ: ޑްރައިވަރުންގެ ޖަމިއްޔާ

ޓެކްސީ ޑްރައިވަރުން ކުރި އިހުތިޖާޖާ ގުޅިގެން ފުލުހުން ހިފެހެއްޓި ގިނަ ޓެކްސީތަކަކީ އެކަމުގައި ބައިވެރިނުވާ ކާރުތަކެއް ކަމަށް ބުނެ، ޑްރައިވާސް އެސޯސިއޭޝަނުން ފުލުހުންގެ އަމަލުތައް ކުށްވެރިކޮށް އެ ޓެކްސީތަކާއި ހައްޔަރުކޮށްފައި ތިބި ޑްރައިވަރުން ދޫކޮށްލުމަށް ރޭ ގޮވާލައިފި އެވެ. 

ވީ ކިހިނެއް؟ - ޓެކްސީ ޑްރައިވަރުން މިދިޔަ ބުދަ ދުވަހު ހުޅުމާލޭގައި އިހުތިޖާޖުކޮށްފައި ވަނީ ސަރުކާރުން ޓެކްސީ ދިނުމުގެ ހިދުމަތް ފަށަން އުޅޭތީ އެކަމާ ނުރުހުން ފާޅުކުރުމުގެ ގޮތުންނެވެ. އެ އިހުތިޖާޖުގެ ތެރެއިން ހުުޅުމާލޭ ހައިވޭ ބަންދުކޮށް އިހުތިޖާޖުކުރި އެވެ. އެގޮތުން:

ބުނީ ކީކޭ؟ - ފުލުހުންގެ އެ އަމަލުތައް ކުށްވެރިކޮށް ޓެކްސީ ޑްރައިވާސް އެސޯސިއޭޝަނުން ރޭ ނެރުނު ބަޔާނެއްގައި ބުނީ ޓެކްސީ ޑްރައިވަރުން ކުރި އިހުތިޖާޖުގެ ތެރެއިން މަގު ބަންދުކޮށް، އާންމު ދަތުރުފަތުރަށް އުނދަގޫވާ ގޮތަށް ގަސްތުގައި ޑްރައިވަރުން އަމަލުކުރި ކަމަށް ފުލުހުން ތުހުމަތުކުރި ނަމަވެސް އެއީ ހަގީގަތެއް އޮތް ވާހަކައެއް ނޫން ކަމަށެވެ. އެކަން ހިނގައި ދިޔަ ގޮތް ތަފްސީލްކޮށްދެމުން އެ ބަޔާނުގައި ބުނީ: 

"ކުރިއަށް އޮތް ތަނުގައި މިފަދަ އެއްވެސް ކަމެއް ތަކުރާރުނުވާނެ ގޮތަށް އަމަލުކުރުމަށް މި ދާއިރާއާ ގުޅުންހުރި ފަރާތްތަކަށް މި ޖަމިއްޔާއިން އިލްތިމާސްކުރަމެވެ،" ބަޔާނުގައި ބުންޏެވެ. 

ތަފްސީލް - ބަޔާނުގައި ބުނި ގޮތުގައި، ޑްރައިވަރުންތަކެއް ހައްޔަރުކޮށް، ގިނަ އަދަދެއްގެ ޓެކްސީތައް ފުލުހުން ޓޯކުރީ އެ އިހުތިޖާޖު ނިންމާލުމަށް ފަހު އެ މީހުން ދިޔަ މަގުމަތީގަ އެވެ. އަދި ޓޯކޮށް، މަސް ދުވަހަށް ހިފަހައްޓާފައި ހުރި ވަރަށް ގިނަ އަދަދެއްގެ ޓެކްސީތަކަކީ އިޖުތިޖާޖުގައި ބައިވެރިނުވާ ޓެކްސީތައް ކަމަށް ވެސް ޖަމިއްޔާގެ ބަޔާނުގައި ބުންޏެވެ. އަދި މިފަދަ ގޮތަކަށް ޓެކްސީތައް ޓޯކޮށްފައިވުމުން ޓެކްސީ ދުއްވާ ފަރާތްތަކާއި ކާރުވެރިންނަށް މާލީ ބޮޑެތި ގެއްލުންތައް ކުރިމަތިވަމުން ދާ ކަމަށް ވެސް ބަޔާނުގައި ބުންޏެވެ. 

"މި އަނިޔާވެރި އަމަލު ވަގުތުން ވަގުތަށް ހުއްޓާލައި ހައްޔަރުގައިވާ ފަރާތްތަކާއި ޓޯކޮށްފައިވާ ކާރުތައް މި ހިނދުން މިހިދަށް ދޫކޮށްލުމަށް ގޮވާލަމެވެ. އެއްވެސް އިންޒާރެއް ނެތި އަދި ދުއްވަމުން ދިޔަ ކާރުތަކަށް އެއްވެސް ވަރަކަށް ފުލުހުން މިކަމުގައި އަމަލުކުރަންވީ މަގެއް ދައްކައި ނުދީ، އިހުތިޖާޖުގައި ބައިވެރިވި ފަރާތްތަކާއި އިހުތިޖާޖުގައި ބައިވެރިނުވާ ގިނަ އަދަދެއްގެ ކާރުތައް ޓޯކުރުމަކީ ތަހުޒީބު ޑިމޮކްރަސީއެއްގައި ކޮށްގެންވާނެ އަމަލެއް ނޫނެވެ،" ޖަމްއިއްޔާގެ ބަޔާނުގައިވެ އެވެ. 

ބަޔާނުގައި ފާހަގަކުރި ގޮތުގައި މިހާތަނަށް އެ މީހުން ކުރި ޑިމާންޑްތަކަށް ސަރުކާރުން އެއްވެސް ވަރެއްގެ އިޖާބައެއް ދީފައެއް ނުވެ އެވެ. އެގޮތުން، އެ ތަނުން ބުނީ: 

ފާހަގަކޮށްލެވޭ - ޖަމިއްޔާގެ ބަޔާނުގައި ޔަގީންކަން ދިން ގޮތުގައި ހައްޔަރުކޮށްފައިވާ ޑްރައިވަރުންނާއި ޓެކްސީތައް ދޫކޮށްލަން ދެން ޑްރައިވަރުންގެ މުޒާހަރާ ކުރިއަށް ގެންދާނެ އެވެ. އެ ތަނުން ބުނީ ޓެކްސީ ޑްރައިވަރުންގެ ކަންބޮޑުވުންތައް އަޑުއަހައި ހައްލުކޮށް ދިނުމަށް ސަރުކާރުން އަދިވެސް މަސައްކަތް ކުރާނޭ ކަމަށް އުންމީދުކުރާ ކަމަށެވެ.

އެނގުން މުހިންމު - މީގެ ކުރިން އިއުލާންކޮށްފައިވާ ގޮތުގައި، ސަރުކާރުން ފަށާ ޓެކްސީލައިންގެ ހިދުމަތް ދޭނީ ސަރުކާރު ހިއްސާވާ ކުންފުންޏަކާ ހަވާލުކޮށްގެންނެވެ. އެ ޓެކްސީ ލައިންގެ ބައެއް ކާރުތައް ދުވަހު ކުއްޔަށް ޓެކްސީ ކުރަން ދޫކުރާނޭ ކަމަށް ވެސް ސަރުކާރުން ބުނެފައިވެ އެވެ. މީގެ އިތުރުން، ސަރުކާރުން ބުނެފައި ވަނީ ޓެކްސީ ލައިން ފެށި ނަމަވެސް މިހާރު ޓެކްސީގެ ހިދުމަތް ދޭ ޑްރައިވަރުންނަށް އެކަމުން އުނދަގުލެއް ނުވާނޭ ކަމަށެވެ.